Juswa 22

FARE WAK AYA NE SIYA GE JUSWA NE

(Jus 22—24)

Gwan di ge pehir ge ne Urdun le may ya ma ne

1 Swaga mbe go, Juswa tol Ruben vya ma, ne Gad vya ma poseya ne pehir le ɗu ge Manasa ne, 2 jan nama go: «Aŋ koy wak honna ge Musa dore ge Bage ɗiŋnedin ne ho̰ aŋ ma pet, aŋ gwa̰ ne aŋ pala fare janna ge mbi ne ma pe se pet me. 3 Dam ma bergetek ɗiŋ ma̰ no, aŋ be ya̰ aŋ ná vya ma to, aŋ gwa̰ ne aŋ pala wak honna ge Bage ɗiŋnedin, Dok ge aŋ ne pe se. 4 Se no, ne jo̰ Bage ɗiŋnedin Dok ge aŋ ne hon aŋ ná vya ma ɗigliya ya go, dimma ne na ne jya̰ nama go, gwa̰ me di, ge aŋ joo ma ge Musa, dore ge Bage ɗiŋnedin ne ne ho̰ aŋ na maŋgaɗam Urdun le may ya. 5 Ɗeŋgo, koy me wak honna ma ne eya ma ge Musa dore ge Bage ɗiŋnedin ne ne ho̰ aŋ nama kwaɗa, ke me mborra nama pal. Aŋ laar na wa̰ Bage ɗiŋnedin Dok ge aŋ ne, ke me mborra na koo pul ma go, koy me na wak honna ma, ho̰ me ta na, ke me na temel mo̰r ne dulwak ɗu, ne aŋ sḛ ma mwaɗak me.» 6 Juswa e nama wak busu, ya̰ nama mborra. A gwan di.

7 Musa ho̰ pehir le ɗu ge Manasa ne joo suwal Basan go, Juswa ho̰ pehir le ɗu ge ne gá ge may joo ge bama ná vya ma buwal zi ge maŋgaɗam Urdun le ge sya ge go no me. Swaga ge Juswa ne ya̰ nama mborra, e nama wak busu, 8 jya̰ nama no go: «Gwa̰ me di ne aŋ kaŋ ɓolla ma, vog ge nday ma ne, ne fool kaal ma, ne dinar ma, ne fool ŋgirma ma, ne walam ma, ne ba̰r ma gḛ ge be to. Mbo me var aŋ ná vya ma kaŋ paal ma ge aŋ naa ge ho̰l ma ne.»

Twal tuwaleya sinna Urdun le may ya

9 Ruben vya ma, ne Gad vya ma, ne pehir le ɗu ge Manasa ne ma gwan mbo suwal Galaad, ge joo ge a ne ɓo na ne wak honna ge Bage ɗiŋnedin ne ta, ne Musa tok go ya. A ya̰ Israyela vya ma suwal Kanan go, Silo go. 10 Swaga ge a ne dé ya maŋgaɗam Urdun wak go, na ge ne le ge suwal Kanan ne go, a sin twal tuwaleya ge ɓaŋlaŋ swaga mbe go.

11 Israyela vya ma za̰ go, Ruben vya ma, ne Gad vya ma, ne pehir le ɗu ge Manasa vya ma ne sḭ twal tuwaleya ya maŋgaɗam Urdun wak go, le ge suwal Kanan ne go, tok le ge Israyela vya ma ne go. 12 Swaga ge Israyela vya ma ne za̰ fare mbe ɗe, a kote ta ya Silo go, ndwara mbo det nama pore mballa. 13 Israyela vya ma teme Pineyas ge bage tuwaleya Eleyazar vya ya Ruben vya ma, ne Gad vya ma, ne pehir le ɗu ge Manasa vya ma ne ta suwal Galaad go. 14 Mbo dagre ne ga̰l ma wol. Ga̰l mbe ma mwaɗak a ka ga̰l ge bama vuwal pe ma ne. A tá ga̰l ma ɗu ɗu ne Israyela hir ge daage zi.

15 A mbo ya Ruben vya ma, ne Gad vya ma, ne pehir le ɗu ge Manasa vya ma ne ta, suwal Galaad go, a jan nama go: 16 Ɓase ge Bage ɗiŋnedin ne ma jan go: «Aŋ te ke ma sone ge go Dok ge Israyela ne ndwara se ɗaa? Aŋ saŋge Bage ɗiŋnedin aŋ go̰r kyaɗa, aŋ ba mbo sin twal tuwaleya ne aŋ sḛ ma pe ɗaa? Ma̰ no aŋ kuri Bage ɗiŋnedin wak. 17 Ya̰l ge nee ne ke Pehor go, ne jo̰ Bage ɗiŋnedin iya ɓase ma ne mbogom puy ɗe, nee gale be hat harcal to bà, go no puy be mbyat nee to’a? 18 Aŋ ɗe, ma̰ no, aŋ saŋge Bage ɗiŋnedin ya aŋ go̰r. Ma̰ no kadɗa aŋ kuri Bage ɗiŋnedin wak ɗe, pore ge Bage ɗiŋnedin ne kwap det ɓase ge Israyela vya ma ne ma pal pet. 19 Kadɗa joo ge aŋ ne Seŋgre ɗe, mbo me ya kat suwal ge Bage ɗiŋnedin ne go, swaga ge Bage ɗiŋnedin gúr ge mbegeya ne go, mbo me ya wan swaga ma i buwal zi. Amma kuri me Bage ɗiŋnedin wak to, kuri me i wak to me. Kaage aŋ sin twal tuwaleya ge ɗogle ge twal tuwaleya ge Bage ɗiŋnedin Dok ge nee ne ne ziyar go to. 20 Swaga ge Akan ge Zera vya ne ke sone ge ɓaŋlaŋ, ne abe kaŋ ge ne mbya burmi uzi ma ɗe, a be na ɓo mḛreya ne ya̰l ge na ne pe ne hini to, pore ge Dok ne te be det ɓase ge Israyela vya ma ne pal pet to’a?»

21 Ruben vya ma, ne Gad vya ma, ne pehir le ɗu ge Manasa vya ma ne, a gwan ne ga̰l ge Israyela vya ma ne ma janna go: 22 «Bage ɗiŋnedin a Dok ge dok ma ne, Bage ɗiŋnedin a Dok ge dok ma ne, kwa kwa, Israyela vya ma mbo kwa me. Kadɗa i ke ho̰l, ko i ke sone ge ɓaŋlaŋ Bage ɗiŋnedin ndwara se ɗe, ya̰ me i ne ndwara dam mbe no go to. 23 Kadɗa i sḭ twal tuwaleya mbe no ndwara abe ta ya uzi ne Bage ɗiŋnedin ta, ko ndwara tyare tuwaleya ge tilla uzi ma, ne tyare bobo ge kaŋ kyarga ne ma, ne tuwaleya ge ba̰a̰n ne ma pe ɗe, Bage ɗiŋnedin sḛ na mḛre i. 24 A go to, i ka da ne vo go, dḛ dam ge kwap ge go, aŋ vya ma mbo jan i vya ma go: ‹A ma kaŋ ne aŋ, ne Bage ɗiŋnedin Dok ge Israyela ne buwal zi ne ɗaa?› Da ne pe no, i sḭ na no. 25 Bage ɗiŋnedin é maŋgaɗam Urdun warbe ya i ge Ruben ma ne Gad vya ma ne aŋ buwal zi. Aŋ vya ma mbo jan i vya ma go: ‹Aŋ ne joo a̰me ge Bage ɗiŋnedin ne to›. Ne fare janna ge aŋ vya ma ne pe, aŋ vya ma mbo e i vya ma be ge sya Bage ɗiŋnedin vo. 26 Da ne pe no, i jya̰ ta no go: ‹Sḭ me nee twal tuwaleya ne nee sḛ ma pe›. I sḭ na da ne tyare tuwaleya ge tilla uzi ma, ko ne tuwaleya a̰me pe to. 27 Amma a kaŋ sayda ne nee ne aŋ buwal zi, ko i vya ma ne aŋ vya ma buwal zi me, a kaŋ ge mbo ka e i mbo ke i tuwaleya ge tilla uzi ma, ne i tuwaleya ge ba̰a̰n ne ma, ne i tuwaleya ge may ma Bage ɗiŋnedin ndwara se ya ne. Ne da pe, na kaage aŋ vya ma jya̰ i vya ma dḛ go, aŋ ne kaŋ a̰me joo ne Bage ɗiŋnedin to to.» 28 I jya̰ ta go: «Kadɗa, a jan i, ko i vya ma ka̰l mbe no ya, i mbo jan nama go: ‹Ndi me dir ge twal tuwaleya ge Bage ɗiŋnedin ne ge i bá ma ne sḭ na no. A be ne tyare tuwaleya ge tilla uzi ma, ko ne tuwaleya ge may ma pe to, amma a kaŋ sayda ne, nee ne aŋ buwal zi.› 29 I ne dwatɗa a̰me ge kuri Bage ɗiŋnedin wak to, ko ge saŋge Bage ɗiŋnedin i go̰r ma̰ no, i ba sin twal tuwaleya ne tyare i tuwaleya ge tilla uzi ma, ne i tuwaleya ge ba̰a̰n ne ma, ko ne i tuwaleya ge may ma to. I mbo ka mbo tyare i tuwaleya ma ge twal tuwaleya ge Bage ɗiŋnedin Dok ge i ne pal, na ge ne na gúr ge mbegeya wak ya pal ɗeŋgo.»

30 Swaga ge bage tuwaleya Pineyas, ne ga̰l ge ɓase ma ne ma, ne ga̰l ge vuwal pe ge Israyela vya ma ne ma, ne za̰ fare janna ge Ruben vya ma, ne Gad vya ma, ne pehir le ɗu ge Manasa vya ma ne ma ɗe, nama sḛ ke tuli. 31 Pineyas ge bage tuwaleya Eleyazar vya, jan nama go: «Ma̰ no, i kwa ya go go, Bage ɗiŋnedin ya nee buwal zi, ago, aŋ be ke ya̰l a̰me ge ɓaŋlaŋ Bage ɗiŋnedin ndwara se to, ne no pe, aŋ zur Israyela vya ma ya go ne Bage ɗiŋnedin tok go.» 32 Pineyas ge bage tuwaleya Eleyazar vya ma ne ga̰l ma gwan ne suwal Galaad ya, ne Ruben vya ma ne Gad vya ma ta ya suwal Kanan go, Israyela vya ma ta, a wan nama fare ma pe. 33 Fare mbe ke Israyela vya ma sḛ tuli. Israyela vya ma uware Dok, a gwan fa fare ge mbo ke pore ndwara burmi suwal ge Ruben vya ma ne Gad vya ma ne to. 34 Ruben vya ma ne Gad vya ma hon twal tuwaleya mbe dḭl Sayda. A jya̰ go: «Twal tuwaleya mbe sayda ne, ne nee ne aŋ buwal zi, go Bage ɗiŋnedin Dok ne».