Juswa 11

Pore mballa ge Merom go

1 Swaga ge Yabin, gan ge suwal Hasor ne, ne za̰ halla ge Juswa ne há suwal ma ɗe, hal goŋle Yobab gan ge suwal Madon ne, ma ne gan ge suwal Chimron ne, ne gan ge suwal Akechaf ne, 2 ne gan ma ge a ne ka ne kuu ya, njal pala digi ya ma, ne gan ma ge a ne ka ne babur pul go, le mbii maŋgaɗam Kinerot wak go ma, ne nama ge ne ka ne le lwalwak go ma, ne nama ge ne ka ne suwal Dor go ma, le ge sya ge go ma pal. 3 Kanan ma ka le ham, ne le sya, Amoriya ma, ne Hittitiya ma, ne Pereziya ma, ne Yebus ma ka njal pala digi, Hivit ma ka njal Hermon pe zi, suwal Mispa go.

4 Gan mbe ma mwaɗak, poseya ne bama asagar ma pet a zut pore. A ka ɓase zuliya ceɗed dimma ne kafeɗem ge ne maŋgaɗam ga̰l yuwam wak go go, poseya ne tisi ma, ne pus pore ma gḛ ge be to. 5 A ɓan bama pe dagre, a mbo goɗe katɗa mam Merom wak go ndwara mbal pore ne Israyela ma. 6 Bage ɗiŋnedin jan Juswa go: «Sya nama vo to, ago kwap, gyala mbe no go tem, mbi ma̰ ɓyan nama sya mwaɗak aŋ tok go. Mo ma̰ kun nama tisi ma koo too ma, mo til nama pus pore ma uzi me.»

7 Juswa ɓanna ne ɓase ma pet, a mbo det nama tukcuk mam Merom wak go. 8 Bage ɗiŋnedin ɓyan nama Israyela ma tok go, a hal nama digi, a yan nama pe ɗiŋ mbo suwal Sidon ge ga̰l ya, ɗiŋ mbo Misrefot-Mayim ya, ɗiŋ mbo baal pul ge Mispe ne ya, le ge ham ge ya. A hun nama kakaɗak, a ya̰ a̰me ɗu ɓurra to bat. 9 Juswa ke ne nama dimma ne Bage ɗiŋnedin ne jya̰ na go. Kun nama tisi ma koo too ma uzi, til nama pus pore ma me.

Halla ge suwal Hasor ne

10 Swaga mbe go, Juswa gwan’a ame Hasor, hun na gan ne kasagar. Ago Hasor ka zaŋgal dḛ suwal ga̰l ge muluk mbe ne mwaɗak. 11 A hun naa ge ne suwal mbe go ma uzi kakaɗak, a ya̰ a̰me ɗu ne ndwara to bat. A til Hasor uzi. 12 Juswa ame suwal mbe ma mwaɗak, hun nama gan ma uzi pet, burmi nama naa ma uzi pet me, dimma ne Musa, dore ge Bage ɗiŋnedin ne ho̰ na wak go. 13 Amma Israyela ma be til suwal a̰me ɗu ge ne njal digi uzi to, a suwal Hasor ɗeŋgo ge Juswa ne tí na. 14 Israyela vya ma pál kaŋ kwaɗa ge daage pet ge suwal mbe ma ne, a pál nama kavaar ma me. A hun naa dasana ma uzi kakaɗak, be ge ya̰ a̰me ɗu ne ndwara to bat. 15 Kaŋ ge Bage ɗiŋnedin ne ho̰ na dore Musa wak ma, Musa gwan hon Juswa nama. Juswa ke nama no. Be ya̰ a̰me ɗu ne kaŋ ge Bage ɗiŋnedin ne ho̰ Musa wak ma go uzi to.

Juswa á suwal Kanan ameya mwaɗak

16 Juswa ame suwal mbe mwaɗak: suwal le ge njal go ma pet, ne le ge mbii ge pet, ne suwal Gochen mwaɗak, ne swaga ge lwalwak ma mwaɗak, ne babur pul pet, ne njal ge Israyela ne, ne babur pul ge ne maŋgaɗam wak go mwaɗak. 17 Ame suwal ne njal ge pala suli, na ge ne kwar ne Seyir ya, ɗiŋ mbo Baal-Gad ya, ge baal pul ge Liban ne go, ge njal Hermon pe se. Wan nama gan ma, hun nama uzi mwaɗak. 18 Juswa mbá pore ne gan mbe ma dam ma kaal. 19 Suwal a̰me ɗu be ke wak tuli ge kat halas ne Israyela vya ma to, a Hivit ma ge ne ka ne suwal Gabawon go ɗeŋgo. Amma ge may ma pet, a ame nama da ne pore mballa. 20 Ago, a Bage ɗiŋnedin sḛ togre nama dulwak ndwara mbal pore ne Israyela ne, ne da pe, Israyela ma burmi nama uzi kakaɗak, be ge kwa nama a̰se. Nama pú nama uzi dimma ne Bage ɗiŋnedin ne ho̰ Musa wak go.

21 Swaga mbe go, Juswa mbo det Anak ma, nama ge ne njal pe zi ma, ne nama ge ne suwal Hebron go ma, ne suwal Debir go ma, ne suwal Anab go ma, ne suwal Yuda ma ne suwal Israyela swaga ge njal ma go ma pet. Juswa burmi nama uzi kakaɗak ɓanna ne nama suwal ma. 22 Anak ma be gwan ga ge suwal Israyela go to, a gá ge suwal Gaza, ne suwal Gat, ne suwal Asdod go ɗeŋgo. 23 Juswa ame suwal mwaɗak dimma ne Bage ɗiŋnedin ne jya̰ Musa go. Juswa var Israyela vya ma na joo bama pehir ma go. Go̰r go, suwal gá halas be ge pore mballa.