Eya ne vḛso Paska pe
16
1 Koy me vḛso Paska kerra ne Bage ɗiŋnedin Dok ge aŋ ne pe ge saba siyal go. Ago a saba siyal go, ɗaal zi, Bage ɗiŋnedin ndage aŋ ne suwal Masar diŋ ya zum no. 2 Ne vḛso Paska ge Bage ɗiŋnedin Dok ge aŋ ne pe, aŋ mbo tyare nday ko gii ge swaga ge Bage ɗiŋnedin ne tá na ne na dḭl pe go. 3 Swaga vḛso go, aŋ mbo ka zam katugum ge be jiya̰l hore. Aŋ mbo zam katugum ge be jiya̰l hore ɗiŋ dam ɓyalar ndwara dwat aŋ pala go aŋ ka harge ta harge wat ne suwal Masar diŋ ya zum. Swaga zam katugum ge njot yál mbe no go, dam ma ge aŋ ne ma pul zi mwaɗak, aŋ mbo ka dwat ne watɗa ge aŋ ne wá ne suwal Masar diŋ ya zum. 4 Dam ɓyalar mbe ma pul zi, na kaage a ɓo jiya̰l hore aŋ suwal diŋ to. Duur ge a ne ke tuwaleya ne na, na dwa digi ɗiŋ mbo cya̰wak to me. 5 Aŋ mbo ke tuwaleya ge Paska ne ge suwal ge daage ge Bage ɗiŋnedin Dok ge aŋ ne ne hon aŋ na go to. 6 Amma aŋ mbo ke tuwaleya ge vḛso Paska ne ge swaga ge Bage ɗiŋnedin ne tá na ne na dḭl pe go. Aŋ mbo vyan kavaar mbe gasamal le gyala dimma go, ndwara go, swaga ge aŋ ne ɗage ne suwal Masar diŋ ya zum go. 7 Aŋ mbo swar duur mbe, aŋ zam na ge swaga ge Bage ɗiŋnedin ne tá na go. Kwap cya̰wak aŋ jyat aŋ yàl ma diŋ ya. 8 Aŋ mbo ka zam katugum ge be jiya̰l hore ɗiŋ dam myanaŋgal, dam ge ɓyalar go, aŋ mbo ke koteya ge ga̰l ne Bage ɗiŋnedin Dok ge aŋ ne pe. Aŋ mbo ke temel dam mbe ma pul zi to.Eya ne vḛso Pantekot pe
9 Dam ge aŋ ne kan siyal go, aŋ mbo isi dam wara anda para lamaɗo. 10 Go no, aŋ mbo ke vḛso Pantekota ne Bage ɗiŋnedin Dok ge aŋ ne pe. Aŋ mbo hon bobo ma laar ɓyareya ge aŋ ne, amma mbyatɗa ge kaŋ ge Bage ɗiŋnedin Dok ge aŋ ne ne hon aŋ ma pal. 11 Aŋ ne aŋ vya ge sonmo ma, ne ge gwale ma, ne aŋ dore ma, ne aŋ kale ma, ne Levi vya ma ge ne ka ne aŋ suwal diŋ ma, ne dwaga ma, ne kya̰le ma, ne kumur ge ne ka ne aŋ suwal diŋ ma, aŋ mbo ke laar saal Bage ɗiŋnedin ndwara se ge swaga ge na sḛ ne tá na ne na dḭl pe go. 12 Aŋ ka me ne kwarra go, aŋ ka dḛ zaŋgal mo̰r ge suwal Masar diŋ. Koy me eya mbe no, aŋ ke me mborra na pal.
Eya ne vḛso ge gúr ma ne pe
13 Swaga ge aŋ ne á aŋ gḛme ma potɗa ya, ne ɓerse aŋ oyo̰r jiya̰l ma, aŋ mbo ke vḛso ge gúr ma ne ɗiŋ dam ɓyalar. 14 Aŋ ne aŋ vya ge sonmo ma, ne ge gwale ma, ne aŋ dore ma, ne aŋ kale ma, ne Levi vya ma, ne dwaga ma, ne kya̰le ma, ne kumur ge ne ka ne aŋ suwal diŋ ma, aŋ mbo ke laar saal dagre ne ta dam vḛso mbe ma go. 15 Aŋ mbo ke vḛso Bage ɗiŋnedin Dok ge aŋ ne ndwara se ɗiŋ dam ɓyalar ge swaga ge na sḛ ne tá na ne na dḭl pe go. Aŋ ke me laar saal ge be to, ne da pe Bage ɗiŋnedin e wak busu aŋ gaaso ma ne aŋ kaŋ ge aŋ ne ke ma pal pet.
16 Del ge daage pul zi, aŋ naa sonmo ma mwaɗak, a mbo ka mbo ya Bage ɗiŋnedin ndwara se, ge swaga ge na sḛ ne tá na ne na pe go ndwara ataa: ge vḛso ge katugum ge be jiya̰l hore ne go, ge vḛso Pantekot go, ge vḛso ge gúr ma ne go me. A mbo ka mbo ya Bage ɗiŋnedin ndwara se tok baŋ to. 17 Amma ndu ge daage mbo he na bobo ya na tok go mbyatɗa ge honna ge Bage ɗiŋnedin ne ho̰ na pal.
Eya ne naa ge kun sarya ma pe suwal ma go
18 Ge suwal ge Bage ɗiŋnedin Dok ge aŋ ne ne ho̰ aŋ ma go pet, aŋ mbo e naa ge kun sarya ma ne naa ge ndil temel ma ne aŋ pehir ma go. A mbo ka kun sarya ge dosol ɓase ma pal. 19 Kaage aŋ er fare ge dosol swaga kun sarya go to, ko aŋ e ndu a̰me pe to, ko aŋ ame bobo to, ago bobo dame naa ge ɗalla ma ndwara dame, e naa ge zwama ma jan fare ge ne na viya̰ go to. 20 Aŋ á ta yan fare ge dosol pe, ne da pe, aŋ ba kat ne ndwara, aŋ ba ame suwal ge Bage ɗiŋnedin Dok ge aŋ ne ne hon aŋ na mbe no.
Dok tele sḭḭm kerra tele