Dwage Eya 10

Poreya ge Bage ɗiŋnedin ne

1 Swaga mbe go, Bage ɗiŋnedin jya̰ mbi go: «Cé gwal ge njal ma azi dimma ne ge dḛ zaŋgal go, ndé ya njal pala digi mbi ta ne nama. Mo vyan sandu ge uwara ɗu me. 2 Mbi ba njaŋge fare ge ne ka gwal ge dḛ zaŋgal ge mo ne ɓá nama uzi kekece mbe ge gwal ge giya̰l mbe ma ta. Mo ba e nama sandu zi.» 3 Mbi vya̰ sandu ne uwara akasiya, mbi ce gwal ge njal ma no azi dimma ne ge dḛ zaŋgal go, go̰r go, mbi nde njal pala digi ne gwal mbe ma mbi tok go no. 4 Bage ɗiŋnedin njaŋge eya ge wol ma ge gwal ge giya̰l ma go dimma ne njaŋge ge dḛ zaŋgal go go. Waage aŋ nama dḛ njal pala digi ne ol zi ya dam ge aŋ ne kote ya na ndwara se go. Ho̰ mbi nama no. 5 Mbi gwan kan mbi koo ne njal pala digi ya se, mbi e gwal mbe ma ge sandu ge mbi ne vya̰ mbe zi no, a gá na zi dimma ne Bage ɗiŋnedin ne ho̰ na wak go.

6 Israyela vya ma ɗage ne tub ge Yaakan vya ma ne wak ya, a mbo ya Mosera go no. Aaron su swaga mbe go, a mbu na go. Na vya Eleyazar ga ke temel tuwaleya na byalam go no. 7 A ɗage ne swaga mbe go, a mbo Gudgoda ya no, ne Gudgoda go, a mbo Yotbata ya no. A suwal ge maŋgaɗam ma ne go gḛ ne. 8 A swaga mbe go ge Bage ɗiŋnedin ne mbege pehir ge Levi ne, ne in na sandu wak tuli pe, ne mbo ya ke temel na ndwara se pe, ne e ɓase ma wak busu na dḭl zi pe me. A nama temel kerra ma ne ɗiŋ ma̰ no. 9 Da ne pe no, pehir ge Levi ne swaga joo a̰me ne Israyela vya ma buwal zi to, Bage ɗiŋnedin sḛ a nama kaŋ joo ne, dimma ne Bage ɗiŋnedin Dok ge aŋ ne ne ho̰ na wak go. 10 Mbi ga njal pala digi ya gyala wara anda ne ɗaal wara anda ne ge dḛ zaŋgal go. Swaga mbe go, Bage ɗiŋnedin gwan za̰ mbi kaɗeya uwale, hṵ aŋ uzi to no. 11 Jya̰ mbi no go: «Ɗage digi, gwa̰ mbo mḛ ɓase mbe ma ndwara zḛ, ne da pe, nama mbo ame suwal ge mbi ne ke wak tuli ne guni tene hon nama báŋ ma na ya.»

Yuwaleya ne laar wanna ma ne gwan pala se pe

12 Ne se no, o Israyela! A ma kaŋ ge Bage ɗiŋnedin Dok ge aŋ ne ne ɓyare ne aŋ ta ne ɗaa? Bage ɗiŋnedin Dok ge aŋ ne ɓyare go aŋ ho̰ na hormo, aŋ mbo wak yuwaleya ma pal, aŋ laar wa̰ na, aŋ ke na temel mo̰r ne dulwak ɗu ne aŋ sḛ ma mwaɗak me. 13 Aŋ koy na wak honna ma ne na eya ma ge na ne hon aŋ ma̰ mbe ma no, ne kwaɗa ge aŋ ne pe. 14 Ago digi ya ma, ne suwar, ne kaŋ ge ne na pal ma pet, a Bage ɗiŋnedin Dok ge aŋ ne kaŋ ma ne. 15 Ɗeŋgo Bage ɗiŋnedin tá aŋ báŋ ma, na laar wa̰ nama, nama go̰r go tá nama vya-kon ma, ndwara go aŋ, ne pehir ge ɗogle ma buwal zi dimma ne aŋ ne kwa na ma̰ ne se no go. 16 Ne da pe no ɗe, dimma ne aŋ ne vya̰ ba̰y ne na pe go, ho̰ me na aŋ dulwak ma me, kaage aŋ gwan ke pala ndaar ne na to. 17 Ago Bage ɗiŋnedin Dok ge aŋ ne a Dok ge dok ma ne, ne Bageyal ge bageyal ma ne ne, Dok ge ɓaŋlaŋ, Bage pool pet, Bage ne mbya a sya na vo, Bage be vareya, Bage be er fare ne potɗa a̰me pe to. 18 A Bage ne ɗaŋge kya̰le ma ne kumur ma pe ne, na laar wa̰ gwasal ma, ka hon nama kaŋzam ma ne kaŋ parra ma. 19 Aŋ me, aŋ laar wa̰ gwasal ma, ago aŋ dḛ ka gwasal suwal Masar ya. 20 Aŋ mbo hon Bage ɗiŋnedin Dok ge aŋ ne hormo ɗeŋgo, ne ke na temel mo̰r, aŋ mbarge da ne na, ne guni ta ne na dḭl ɗeŋgo. 21 Mbya aŋ siya̰le na, a aŋ Dok ne, a na sḛ ke kaŋ ge ɓaŋlaŋ ma, ne ge ajab ma, ne aŋ pe, aŋ ndwara go ne. 22 Aŋ báŋ ma mbo suwal Masar ya naa wara ɓyalar, se no Bage ɗiŋnedin Dok ge aŋ ne zuli aŋ ya se ceɗed dimma ne guwa̰r ge ne digi zi ya ma go.