Kugiya ge Israyela vya ma ne ful pul zi
8
1 Wak honna ma mwaɗak ge mbi ne ho̰ aŋ nama ma̰ mbe no, aŋ ke mborra nama pal, go no, aŋ ba kat ne ndwara, aŋ ba zuli ta se ceɗed, aŋ ba ame suwal ge Bage ɗiŋnedin ne guni tene hon aŋ bá ma na me. 2 Aŋ mbo dwat ne viya̰ ge daage mwaɗak ge Bage ɗiŋnedin Dok ge aŋ ne, ne e aŋ mborra nama go ɗiŋ del wara anda ful pul zi. Ago Bage ɗiŋnedin e aŋ njot yál, ndwara kugi aŋ, ne da pe, na kwa aŋ dulwak, ko aŋ mbo koy na wak honna ma ko de. 3 Na sḛ e aŋ njot yál, ne kyamal, amma wa aŋ ne maan, kaŋzam ge aŋ ne aŋ bá ma ne wa̰ na pe to. Ne da pe, aŋ kwa go, ndu dasana kat ne ndwara da ne kaŋzam ta ɗeŋgo to, amma ne fare ma pet ge ne ndage ne Bage ɗiŋnedin wak zi ya. 4 Aŋ ba̰r ma be vḛne ne aŋ ta to, ko aŋ koo ma puy, a be ɗage del wara anda mbe ma pul zi to. 5 Kwa me go Bage ɗiŋnedin Dok ge aŋ ne, yuwale aŋ dimma ne ndu ne yuwale na vya go. 6 Koy me wak honna ma ge Bage ɗiŋnedin Dok ge aŋ ne, ke me mborra na koo pul ma go, sya me na vo me.Vyale me Dok ne kaŋzam ge suwal Kanan ne pe to
7 Ago Bage ɗiŋnedin Dok ge aŋ ne mbo gene aŋ mbo suwal ge siŋli ya, suwal ge ne maŋgaɗam ma, ne mam so̰o̰l ma, ge a ne so ɗiŋ mbo babur pul ya, ɗiŋ mbo njal ma pe ya. 8 A suwal ge ne gḛme ma ne oyo̰r ma, ne fere ma, ne uwara grenad ma, ne uwara olive ma ne daaram ma ne go ne. 9 A suwal ge kaŋzam ne go zuliya bindik ne, a̰me mbo woɗege aŋ to. A suwal ge walam ma ne fool ŋgirma ma ne njal ma ne go ne.
10 Swaga ge aŋ ne mbo zam’a, aŋ huri, aŋ ka ke gugu hon Bage ɗiŋnedin Dok ge aŋ ne, ne na ne ho̰ aŋ suwal ge siŋli mbe no pe. 11 Kaage aŋ vyale ne Bage ɗiŋnedin Dok ge aŋ ne, ɗiŋ aŋ sen na wak honna ma, ne na wak yuwaleya ma, ne na eya ma ge mbi ne hon aŋ nama ma̰ mbe no to. 12 Swaga ge aŋ ne mbo zam’a, aŋ huri, aŋ sin zok ge siŋli ma, aŋ kat nama zi, 13 swaga ge aŋ nday ma, ne aŋ gii ma, ne mbo zuli ya se, aŋ bware ma ne aŋ dinar ma, ne aŋ kaŋ ge daage ma pet a zuli se me ɗe, 14 ke me haŋgal, na kaage aŋ hufugi ne pala ga̰l ɗo, aŋ vyale Bage ɗiŋnedin Dok ge aŋ ne, ge ne ndage aŋ ne suwal Masar diŋ ya zum, ne mo̰r zi ya to. 15 Bage ɗiŋnedin ɗame aŋ ge ful pul ge ne ke naa vo zi, ge suwal ge maŋgay ma, ne hurtu ma ne go, ge suwal ge mam ne go to. Bage ɗiŋnedin e mam ɓulla ne njal ge ndaar zi ya, ne aŋ pe. 16 E aŋ zam maan ge aŋ bá ma ne kwa na to ge ful mbe pul zi. E aŋ njot yál ndwara kugi aŋ, ne da pe na ba ke aŋ kwaɗa go̰r go. 17 Kaage aŋ dwat go, aŋ ɓó kaŋ gan mbe ma no da ne aŋ pool saar ta to. 18 Dwa me ne Bage ɗiŋnedin Dok ge aŋ ne, na ge ne ho̰ aŋ pool ge ɓol kaŋ gan mbe ma, da ne pe no uwale, ma̰ no wi wak tuli ge na ne ke ne aŋ báŋ ma no.