Dwage Eya 6

Mo laar wa̰ Dok ge mo ne

1 No a wak honna ma ne eya ma ge Bage ɗiŋnedin Dok ge aŋ ne, ne ho̰ mbi na wak go, mbi hate aŋ nama ma ne, ne da pe, aŋ ke mborra nama pal ge suwal ge aŋ ne mbo ame na joo dḛ ya go. 2 Ne da pe, aŋ ne aŋ vya ma, ne aŋ vya-kon ma aŋ sya Bage ɗiŋnedin Dok ge aŋ ne vo, ndwara koy na eya ma, ne na wak honna ma ge mbi ne ho̰ aŋ nama, aŋ dam ma zi pet. Ne da pe, aŋ ke kaal suwar pal. 3 O! Israyela, za̰ me nama, koy me nama, ke me mborra nama pal, ne da pe, aŋ ba ɓol tuli, aŋ ba zuli se ɓase ge suwal ge ne ɓul pam ma ne daaram go, dimma ne Bage ɗiŋnedin Dok ge aŋ bá ma ne ne jya̰ aŋ go.

4 Za̰ Israyela! Bage ɗiŋnedin a nee Dok ne, Bage ɗiŋnedin a myalam ɗu kikit. 5 Mo laar na wa̰ Bage ɗiŋnedin Dok ge mo ne ne dulwak ɗu, ne mo sḛ mwaɗak, ne mo pool mwaɗak me. 6 Fare ge mbi ne jan mo nama ma̰ mbe ma no, mbo kat mo dulwak zi. 7 Mo mbo hate mo vya ma fare mbe ma swaga ge mo ne mbo katɗa mo yadiŋ, ko viya̰ pul go, ko swaga ge mo ne fí se, ko swaga ge mo ne kore digi go. 8 Mo mbo vwal eya mbe ma mo tok go ne mo sḭ́ḭ́l go me, dimma ne kaŋ sayda go. 9 Mo mbo njaŋge nama mo zok wak keŋ ma ta, ne mo viya̰ wak ma go me.

10 Swaga ge Bage ɗiŋnedin Dok ge aŋ ne, ne mbo gene aŋ ya mbo suwal ge na ne guni tene hon aŋ bá Abraham, ne Isaku, ne Yakub ya ɗe, aŋ mbo ɓol suwal ga̰l ge siŋli ge aŋ ne sḭ nama to ma. 11 Aŋ mbo ɓol zok ma wiya ne kaŋ kwaɗa ma ge aŋ sḛ ma ne ka̰ nama zi ne to ma, ne tub ma ge aŋ sḛ ma ne á nama ne to ma, ne uwara oyo̰r ma ne olive ma ge aŋ sḛ ma ne ɗḭ nama ne to ma. Swaga ge aŋ mbo zam ya, aŋ huri, 12 kaage aŋ vyale Bage ɗiŋnedin ge ne abe aŋ ne suwal Masar diŋ ya zum, ne swaga mo̰r zi ya to bat. 13 Aŋ mbo sya Bage ɗiŋnedin Dok ge aŋ ne vo, aŋ ka ke na temel mo̰r ɗeŋgo, aŋ mbo ka guni ta da ne na dḭl ɗu kikit. 14 Aŋ mbo ke dok ge ɗogle ma, dok ge naa ge a ne ve aŋ se mbe ma no ne ma temel mo̰r to bat. 15 Ago Bage ɗiŋnedin Dok ge aŋ ne, na ge ne aŋ buwal zi a Dok ge yil ne, na kaage aŋ e na pore burmi aŋ pe ne suwar pal uzi to bat. 16 Aŋ mbo kugi Bage ɗiŋnedin Dok ge aŋ ne dimma ne aŋ ne kugi na Masa go go to bat. 17 Amma aŋ mbo koy wak honna ma ge Bage ɗiŋnedin Dok ge aŋ ne, ne na njaŋgeya ma, ne na eya ma, ge ne ho̰ aŋ nama kwaɗa. 18 Aŋ ke me kaŋ ge dosol ne ge jwap Bage ɗiŋnedin ndwara se, ne da pe aŋ ba ɓol tuli ge suwal ge Bage ɗiŋnedin ne ke wak tuli hon aŋ bá ma na go, 19 Aŋ mbo yan aŋ naa ge ho̰l ma pet aŋ ndwara zḛ dimma ne Bage ɗiŋnedin ne jya̰ go.

20 Dam ge aŋ vya ma ne mbo ele aŋ dḛ ya go: «Njaŋgeya ma, ne eya ma, ne wak honna ma ge Bage ɗiŋnedin Dok ge nee ne ne ho̰ aŋ nama mbe ma no nama sḭ gyana ɗaa?» 21 Aŋ mbo jan nama go: «I ka dḛ mo̰r ge Faraon ne ge suwal Masar go, Bage ɗiŋnedin abe i ne suwal Masar diŋ ya zum ne pool ge na ne no. 22 Bage ɗiŋnedin ke kaŋ ŋgayya ge ajab ma, ne ge ɓaŋlaŋ ma i ndwara go, ge suwal Masar go, Faraon ma ne na naa ma pet pal. 23 Abe i ne suwal mbe diŋ ya zum, ndwara gene i mbo suwal ge na ne ke wak tuli hon i bá ma na ya no. 24 Bage ɗiŋnedin ho̰ i na wak go i ke mborra na eya ma pal mwaɗak, i ho̰ na hormo, ne da pe, i ba kat ne tuli ɗaɗak, go no na ba koy i katɗa ne ndwara. Da ne pe no, nee ka ne ndwara ne se ma̰ no. 25 A ɗeŋger ge nee koy wak honna ge Bage ɗiŋnedin Dok ge nee ne dimma ne na sḛ ne ho̰ nee na wak go.»