Dwage Eya 3

Halla ge gan Og ne

1 Nee sele, nee he viya̰ mbo le suwal Basan ya no. Og, gan ge suwal Basan ne ma ne na naa ma, a ɗage pore ya nee ndwara zi, a mbo ya det nee suwal Edrey go no. 2 Bage ɗiŋnedin jya̰ mbi no go: «Sya na vo to, mbi hon mo na ma ne na suwal mwaɗak ya mo tok go. Ke na dimma ca ne mo ne ke ne Sihon gan ge Amoriya ma ne ge ne ka suwal Hechbon go go.» 3 Bage ɗiŋnedin Dok ge nee ne gwan ɓyan Og gan ge suwal Basan ne ma ne na naa ma mwaɗak nee tok go no. Nee pú nama pe uzi no mwaɗak, be ge ya̰ ndu a̰me ɗu ɓurra to. 4 Swaga mbe go, nee ame na suwal ma pet, nee be ya̰ na suwal a̰me ɗu to. Suwal ma wara myanaŋgal ge le Argob go, ge Og gan ge suwal Basan ne ne ka ke muluk nama pal ma. 5 Suwal mbe ma mwaɗak a ka verra se ne gulum ga̰l, nama gulum mbe ma wak ma ka da ne viya̰ wak ge fetɗa ma. Uwale suwal vya ge be gulum ga̰l to ma nama ziyar go gḛ ge be to me. 6 Nee hṵ naa ge ne suwal mbe go ma uzi pet, naa sonmo, ne naa zaab, ne naa jabso pet. Nee ke ne nama dimma ne nee ne ke ne suwal ma ge Sihon gan ge suwal Hechbon ne go. 7 Nee pá ɗeŋgo kavaar ma ne kaŋ kwaɗa ma ge suwal mbe ma ne ma.

Varra ge suwal Galaad ne

8 Dam mbe ma pul zi, nee ame suwal ma ge ne maŋgaɗam Urdun le may ya ma, ne gan ge Amoriya ma ne ma azi tok go no. Ne mam Arnon wak go ɗiŋ mbo njal Hermon ya. 9 Naa ge suwal Sidon ma tol njal Hermon Siriyon, Amoriya ma tol na Senir me. 10 Nee ame me suwal ge ne babur go ma pet, ne suwal Galaad mwaɗak, ne suwal Basan ge gan Og ne mwaɗak ɗiŋ mbo suwal Salka ma ne Edrey ya. 11 Og gan ge Basan ne ga ne ndwara ne ɗu ne pehir ge Refayim ne zi. Na sandu siya ka walam, se no ya Ammon vya ma suwal Rabba go. Na twala da ne kil azi ne nus, na fiyal da ne kil ɗu me, kil ge ndu pool ne.

12 Swaga mbe go, nee ame suwal mbe ma mwaɗak. Mbi ho̰ Ruben vya ma ne Gad vya ma suwal, ne Aroyer ge ne mam Arnon wak go no ɗiŋ mbo njal ge Galaad ne le ɗu dig ya, ne nama suwal lew ma mwaɗak. 13 Mbi ho̰ pehir le ɗu ge Manasa ne suwal Galaad le ge ne ga ma ne suwal Basan ge gan Og ne ma no mwaɗak, ndwara go suwal Argob ma ne suwal Basan jwak. Suwal mbe ma no, a ka tol nama suwal ge Refayim ma ne. 14 Yayir ge Manasa vya ame suwal ge Argob ne ma no mwaɗak ɗiŋ mbo warbe ge Gechur ma ne Maaka ma ne ya no, sya suwal Basan dḭl na dḭl ta no. Da ne pe no, ɗiŋ ma̰ no a tol na no go «Suwal ge Yayir ne.» 15 Mbi ho̰ Makir ge Manasa vya suwal Galaad. 16 Mbi ho̰ Ruben vya ma ne Gad vya ma swaga ge suwal Galaad ma ne mam Arnon buwal zi. Mam Arnon ka warbe ge nama suwal le ge mbii ge ne, mam Yabbok me ɗe, kat nama warbe ne Ammon vya ma suwal me, 17 a ɓó babur pul ɗiŋ mbo maŋgaɗam Urdun wak ya, ne maŋgaɗam Kinneret wak go ɗiŋ mbo maŋgaɗam ga̰l ge yuwam wak ya, ɗiŋ mbo njal Pisga pe ya, le ge ham ge go.

18 Swaga mbe no go, mbi jya̰ nama no go: «Se no ɗe, Bage ɗiŋnedin Dok ge aŋ ne ho̰ aŋ joo suwal mbe no. Amma aŋ pet, naa ge ne mbya mbal pore ma, aŋ nṵsi me ta ne aŋ kaŋ pore ma, aŋ mbo aŋ ná vya, Israyela vya ma ndwara zḛ. 19 Aŋ gwale ma, ne aŋ vya ge jabso ma, ne aŋ kavaar ma, mbi kwa kwa go, aŋ da ne kavaar ma gḛ, a nama mbo ga suwal ge mbi ne ho̰ aŋ nama diŋ ne ɗeŋgo, 20 ɗiŋ nama ɓol nama swaga katɗa ma ge Bage ɗiŋnedin Dok ge aŋ ne, ne mbo hon nama ya ge maŋgaɗam Urdun le may ya dimma ne aŋ ne ɓó go gale ɓya, go no ndu ge daage ba ɗage gwan’a ge swaga ge mbi ne ho̰ na go gale.»

21 Swaga mbe go uwale, mbi ho̰ Juswa mbi wak go: «Mo kwa kaŋ ma pet ge Bage ɗiŋnedin Dok ge aŋ ne, ne ke gan ge azi mbe ma da ne mo ndwara. Bage ɗiŋnedin mbo ke ne gan ma ge mo ne mbo ɓol nama ya maŋgaɗam Urdun le may ya ma mbe go no ca. 22 Kaage aŋ sya nama vo to, ago Bage ɗiŋnedin Dok ge aŋ ne, mbo mbal pore ne aŋ pe.»

Dok kuri Musa, na wá suwal Kanan diŋ to

23 Swaga mbe go, mbi kaɗe Bage ɗiŋnedin, mbi jya̰ na no go: 24 «O Bageyal Bage ɗiŋnedin, mo ɗageya e pe ŋgay mbi ge mo dore ga̰l ge ɓaŋlaŋ ge mo ne, ma ne mo pool ma. A ma dok a̰me ne digi zi ya, ko suwar pal ge ne mbya ke kaŋ ge mo ne ke mbe ma no ne ɗaa? 25 Mbi kaɗe mo, ya̰ mbi har maŋgaɗam Urdun le may ya mbo ndil suwal ge siŋli ma, ne njal ge siŋli mbe ma ne Liban nde.» 26 Amma ne aŋ pe, Bage ɗiŋnedin hó na laar mbi pal no, be za̰ mbi to. Bage ɗiŋnedin jya̰ mbi no go: «Mbyat mo go! Gwan jan mbi fare mbe no to bat. 27 Ndé njal Pisga pala digi, ndi mo ndwara le kuu, le mbii, le ham, ne le sya, ndi suwal mbe ne mo ndwara fa̰ ɗeŋgo, ago mo mbo har maŋgaɗam Urdun le may ya to bat. 28 Ho̰ Juswa mo wak, ho̰ na pool, sirsi na, ago a na sḛ mbo ɗame ɓase mbe ma mbo le may ya, mbo ame suwal mbe ge mo ne kwa na mbe no ne.» 29 Ago mbe no, nee ga katɗa baal pul se go go ne Bet-Pehor ndwara ŋga no.