Pehir ma ataa a gá katɗa maŋgaɗam Urdun le may ya
32
1 Ruben vya ma poseya ne Gad vya ma ka da ne kavaar ma gḛ ge be to. Swaga ge a ne kwa go suwal Yazer ma ne suwal Galaad siŋli ne kavaar ma pe ɗe, 2 a mbo ya ɓol Musa ma ne bage tuwaleya Eleyazar ɓanna ne ga̰l ge ɓase ma ne ma, a jan nama go: 3 «Suwal Atarot, ne Dibon, ne Yazer, ne Nimra, ne Hechbon, ne Eleyale, ne Sebam, ne Nebo, ne Beyon, 4 suwal ge Bage ɗiŋnedin ne é Israyela vya ma ame nama mbe ma no, a suwal ge siŋli ma ne kavaar ma pe ne. Mo dore ma a naa ge ne kavaar ma ne. 5 I kaɗe mo, kwa i a̰se, ho̰ i suwal mbe ma no, kaage mo ya̰ i har maŋgaɗam Urdun le may ya to.»6 Musa jan Gad vya ma ne Ruben vya ma go: «A kwaɗa go aŋ ná vya ma mbo mbal pore, aŋ sḛ ma gá katɗa go go hini me ɗaa? 7 Aŋ te iyal Israyela vya ma sḛ gyana ndwara tele nama be mbo wat suwal ge Bage ɗiŋnedin ne ho̰ nama go to ɗaa? 8 Aŋ bá ma ke go mbe no ca, swaga ge mbi ne teme nama ne Kades-Barneya ya mbo ya ndil suwal Kanan go. 9 A mbo ɗiŋ baal pul ge Echekol ne ya, a ndi suwal ya no mwaɗak, swaga ge a ne gwa̰ ya, a iya Israyela vya ma sḛ duur se no tiliŋ, a tele nama be mbo wat suwal ge Bage ɗiŋnedin ne ho̰ nama na ya no. 10 Dam mbe go, Bage ɗiŋnedin ɗage julili pore, guni tene no go: 11 ‹Naa ge a ne ɗage ne suwal Masar ya mbe ma no, ne del wara azi go waɗeya, a mbo wat suwal ge mbi ne ke wak tuli hon Abraham, ne Isaku, ne Yakub ya to bat. Ago a be bí mbi to›. 12 Ɗeŋgo a Kaleb ge Yefunne vya, na ge ne vuwal pe ge Kenaz ne zi, ma ne Juswa ge Nun vya, a bi Bage ɗiŋnedin pe ne. 13 Bage ɗiŋnedin ɗage julili pore Israyela vya ma pal no, é nama ŋgondoŋgeya ful pul zi no del wara anda, ɗiŋ hṵ doŋ pe mbe ge ne ke sone na ndwara se uzi no mwaɗak. 14 Ndi aŋ gwan he koo pul ge aŋ bá ma ne ge sone mbe, ndwara jage laar ol ge Bage ɗiŋnedin ne Israyela vya ma pal uwale ya’a! 15 Kadɗa aŋ saŋge na aŋ go̰r, na sḛ mbo gwan sot aŋ ful pul zi, aŋ mbo e Israyela vya ma ban uzi mwaɗak.»
16 A gwan’a Musa ta, a jan na go: «A ver ɗyagarta ma ya digi ne i kavaar ma pe, ne sin suwal ma ne i vya ma pe go go. 17 Amma i sḛ ma, i mbo nṵsi ta ne i kaŋ pore ma, i zut Israyela vya ma ndwara zḛ ɗiŋ i gene nama nama swaga katɗa ma ya. I vya ma mbo gá katɗa suwal ge ne ve ne gulum ga̰l ma diŋ ne naa ge ho̰l ge suwal mbe ne ma pe. 18 I mbo gwan’a i yàl ma diŋ to, ɗiŋ Israyela vya ge daage ɓol na joo ɓya. 19 I mbo gwan ɓol joo dagre ne nama maŋgaɗam Urdun le may ya to, ago i ɓol i joo ya go maŋgaɗam Urdun le ge ham ge ya.»
20 Musa jan nama go: «Kadɗa aŋ ke mbe go, aŋ abe aŋ kaŋ pore ma mbo mbal pore dimma ne Bage ɗiŋnedin ne ho̰ aŋ wak go, 21 kadɗa aŋ abe aŋ kaŋ pore ma ya, aŋ har maŋgaɗam Urdun le may ya dimma ne Bage ɗiŋnedin ne ɓyare go, diŋ yan na naa ge ho̰l ma ne na ndwara zḛ uzi, 22 Kadɗa aŋ ame suwal mbe ya mwaɗak, aŋ ba ɗage gwanna ya gale ɗe, fare a̰me mbo kat aŋ pal to Bage ɗiŋnedin ndwara se, ko Israyela vya ge may ta. Go no suwal mbe no mbo gá aŋ joo Bage ɗiŋnedin ndwara se. 23 Amma kadɗa aŋ ke ya go to, aŋ ke sone Bage ɗiŋnedin ndwara se, ka me ne kwarra go, aŋ sone ma mbo gwan aŋ pal. 24 Sḭ me aŋ suwal ma ne aŋ vya ma pe, ve me ɗyagarta ma digi ne aŋ kavaar ma pe me, amma koy me wak tuli ge aŋ ne ke.»
25 Gad vya ma ne Ruben vya ma jan Musa go: «I mo dore ma, i mbo ke dimma ne mo ne jya̰ i go. 26 I vya ma ne i gwale ma, ne i kavaar hir ge daage ma mwaɗak a mbo gá katɗa Galaad suwal ma go. 27 Amma i mo dore ma, i mbo nṵsi ta ne i kaŋ pore ma Bage ɗiŋnedin ndwara se mbo mbal pore dimma ne mo ne jya̰ i go.»
28 Ne nama pe, Musa hon bage tuwaleya Eleyazar ma ne Juswa ge Nun vya poseya ne ga̰l ge vuwal pe ge Israyela vya ma ne ma wak go: 29 «Kadɗa Gad vya ma ne Ruben vya ma har maŋgaɗam Urdun ya poseya ne aŋ mbo mbal pore Bage ɗiŋnedin ndwara se, swaga ge aŋ ne mbo ame suwal ma ya mwaɗak, aŋ mbo hon nama joo suwal Galaad. 30 Amma kadɗa a har ya mbo mbal pore ne aŋ dagre to, a mbo ɓol joo aŋ buwal zi suwal Kanan go to.» 31 Gad vya ma ne Ruben vya ma gwan ne Musa janna: «Kaŋ ge Bage ɗiŋnedin ne jya̰ i ge mo dore ma, i mbo ke mbe go no. 32 I mbo har ne i kaŋ pore ma mbo mbal pore Bage ɗiŋnedin ndwara se suwal Kanan ya. Amma i joo mbo kat maŋgaɗam Urdun le may go.»
33 Musa hon Gad vya ma ne Ruben vya ma, ne Manasa ge Yusuf vya hir le ɗu suwal ge Amoriya gan Sihon ne, ne suwal Basan ge gan Og ne, ndwara go nama suwal ga̰l ma ne nama suwal lew ma mwaɗak.
34 Gad vya ma sin suwal Dibon, ne Atarot, ne Aroyer, 35 ne Atarot-Chofan, ne Yazer, ne Yokboha, 36 ne Bet-Nimra, ne Bet-Haran. A ver suwal mbe ma digi ne gulum ga̰l, a ver ɗyagarta ne gii ma pe me.
37 Ruben vya ma sin suwal Hechbon, ne Eleyale, ne Kiryatayim, 38 ne Nebo, ne Baal-Meyon nama mbe ma no a è nama dḭl, ne Sibma. A hon suwal ge bama ne sḭ nama a̰me ma dḭl ge ɗogle ma.
39 Makir ge Manasa vya ma mbo det suwal Galaad pore, a ame na, a yan Amoriya ma ge ne ka na go ma. 40 Musa hon Makir ge Manasa vya suwal Galaad, gá kat na go. 41 Yayir ge Manasa vya mbo det suwal ge jyale ma pore, ame nama, syal nama dḭl Havot-Yayir, ndwara go Suwal ge Yayir ne ma. 42 Noba mbo det suwal Kenat, ame na poseya ne na suwal lew ma mwaɗak, syal na dḭl na ta, Noba.