Isiya Ma 28

Eya ma ne tuwaleya ma pe

Tuwaleya ge dam ne dam

1 Bage ɗiŋnedin jan Musa go: 2 «Ho̰ Israyela vya ma wak mbe ma no: Nama tyare mbi bobo ma ne katugum ma ne bobo ge tilla uzi ge hur tuli ma na swaga ma go tetem. 3 Jya̰ nama go: Dam ma mwaɗak, nama tyare mbi tuwaleya ge tilla uzi tame vya ge del ɗu ɗu ma azi, ge be saaso ma. 4 Mo mbo tyare tame vya ge ɗu cya̰wak, mo tyare ge azi ndwara pisil. 5 Ɓanna ne swáma peɗem koro ataa watɗa ne num ge ɗermel litre ɗu ne nus. 6 Tuwaleya ge tilla uzi ge gyala pal tetew mbe mbo kat kaŋ ge hur tuli dimma ne tuwaleya ge a ne tyare na hon Bage ɗiŋnedin njal Sinay pala digi go. 7 A mbo ka tyare oyo̰r jiya̰l litre ɗu ne nus ge tame vya ge a ne tyare na cya̰wak mbe pe go, a mbo tyare na Bage ɗiŋnedin ndwara se swaga ge mbegeya zi. 8 Tame vya ge azi ge a ne tyare na ndwara pisil a mbo tyare oyo̰r jiya̰l litre ɗu ne nus na pe go me hon Bage ɗiŋnedin dimma ne ge cya̰wak go. A mbo kat tuwaleya ge tilla uzi kaŋ ge hur tuli Bage ɗiŋnedin ndwara se.

Tuwaleya ge dam ɗigliya ne

9 Ge dam ɗigliya go, aŋ mbo tyare tame vya ge be saaso to ge del ɗu ɗu ma azi, ne swáma peɗem watɗa ne num, ne tuwaleya ge oyo̰r jiya̰l ne me. 10 Ge tuwaleya ge tilla uzi ge dam ɗigliya ne mbe no pal, aŋ mbo ka tyare tuwaleya ge tilla uzi ge dam ne dam poseya ne na tuwaleya ge oyo̰r jiya̰l ne ma me.

Tuwaleya ge saba dam ge zḛ ge ne

11 Saba dam ge zḛ ge ma go, aŋ mbo tyare Bage ɗiŋnedin nday pool azi, ne gamla ɗu, ne tame vya ge be saaso to ge del ɗu ɗu ma ɓyalar tuwaleya ge tilla uzi. 12 Ne swáma peɗem watɗa ne num koro lamaɗoɗo ne nday ge daage pe, ne swáma peɗem watɗa ne num koro myanaŋgal ne gamla pe, 13 ne swáma peɗem watɗa ne num koro atataa ne tame vya ge daage pe. No a tuwaleya ge tilla uzi ne, ge hurra tuli ne Bage ɗiŋnedin pe ma ne. 14 Nama tuwaleya ge oyo̰r jiya̰l ne ma mbo kat litre ataa ne nday pool ge daage pe, litre azi ne gamla pe, litre ɗu ne nus ne tame vya ge daage pe me. No a tuwaleya ge tilla uzi ge saba dam ge zḛ ge ma ne ge del zi ne. 15 Aŋ mbo tyare bemjere ɗu ne tuwaleya ge ne sone pe hon Bage ɗiŋnedin, poseya ne tuwaleya ge tilla uzi ge dam ne dam ɓanna ne na tuwaleya ge oyo̰r jiya̰l ne ma me.

Tuwaleya ge dam vḛso Paska ne

16 Dam wol para anda ge saba ge zḛ ge ne, mbo kat dam vḛso Paska ge Bage ɗiŋnedin ne. 17 Dam wol para anuwa̰y ge saba mbe ne, mbo kat dam vḛso, ɗiŋ dam ɓyalar ndu mbo zam katugum ge ne jiya̰l hore to bat. 18 Dam ge zḛ ge go, aŋ mbo ke koteya ge uzi hini cat ne uware Bage ɗiŋnedin pe, aŋ mbo ke temel a̰me pe dam mbe go to bat. 19 Dam mbe go, aŋ mbo tyare nday pool ma azi, ne gamla ɗu, ne tame vya ma ɓyalar tuwaleya ge tilla uzi hon Bage ɗiŋnedin. Kavaar mbe ma mbo kat be saaso to. 20 Aŋ mbo tyare nama ɓanna ne swáma peɗem watɗa ne num: Swama peɗem koro lamaɗoɗo ne nday ge daage pe, swáma peɗem koro myanaŋgal ne gamla pe, 21 ne swáma peɗem koro atataa ne tame vya ge daage pe. 22 Aŋ mbo tyare bemjere ɗu ne tuwaleya ge sone ne pe, ne pore sone ge aŋ ne ma pe. 23 Aŋ mbo tyare tuwaleya mbe ma no ɓanna ne tuwaleya ge tilla uzi ge cya̰wak ɗaɗak ne. 24 Aŋ mbo ka tyare nama dam ne dam, diŋ dam ɓyalar, mbo kat tuwaleya ge tilla uzi, kaŋ hur tuli ne Bage ɗiŋnedin pe. A mbo tyare nama ɓanna ne tuwaleya ge tilla uzi ge dam ne dam, ne nama tuwaleya ge oyo̰r jiya̰l ne ma. 25 Dam ge ɓyalar go me, aŋ mbo ke koteya ge uzi hini cat ne uware Bage ɗiŋnedin pe, aŋ mbo ke temel a̰me to bat.

Tuwaleya ge dam vḛso ge siyal ne

26 Dam ge aŋ ne tyare kaŋ wak ge zḛ ge ne go, aŋ mbo ke koteya ge uzi hini cat ne uware Bage ɗiŋnedin pe, aŋ mbo ke temel a̰me pe dam vḛso Pantekot mbe go to bat. 27 Aŋ mbo tyare nday pool ma azi, ne gamla ɗu, ne tame vya ge del ɗu ɗu ma ɓyalar tuwaleya ge tilla uzi, kaŋ ge hur tuli hon Bage ɗiŋnedin. 28 Nama tuwaleya ge swáma peɗem ne mbo kat, swáma peɗem koro lamaɗoɗo ne nday pool ma pe, koro myanaŋgal ne gamla pe, 29 koro atataa ne tame vya ge daage pe. 30 Aŋ mbo tyare bemjere ɗu, ne pore sone ge aŋ ne ma pe. 31 Aŋ mbo tyare tuwaleya mbe ma no ɓanna ne tuwaleya ge tilla uzi ge dam ne dam, ne bama tuwaleya ge kaŋ kyarga ne ma. Aŋ mbo tyare kavaar ge be saaso to ma, poseya ne bama tuwaleya ge oyo̰r jiya̰l ne ma.»