KATƊA GE ISRAYELA MA NE BABUR PUL GE MOWAB NE GO
(Isi 22—36)
Balak hal Balaam goŋle
22
1 Israyela vya ma ɗage, a mbo kat babur pul ge Mowab ne go, maŋgaɗam Urdun le may ya, ne Jeriko ndwara ŋga. 2 Balak ge Sippor vya kwa kaŋ ge Israyela vya ma ne ke Amoriya mwaɗak. 3 Swaga ge naa ge Mowab ma ne kwa ɓase ge Israyela vya ma ne ɗe, vo wan nama, a abe ndatɗa. 4 Mowab ma jan Madiyan ma ga̰l ma go: «Ɓase mbe ma no, a la̰me kaŋ ge ne nee ziyar go ma pet dimma ne nday ne la̰me zám zamma ne ful zi go.»Zaman mbe go, a Balak ge Sippor vya ka gan suwal Mowab go ne. 5 Hál goŋle Balaam ge Beyor vya, na ge ne ka ne suwal Petor go, maŋgaɗam wak go pal, jan na go: «Ndi naa ge ne ɗage ne suwal Masar ya ma, a tḭ suwal ja se, a mbo ja katɗa ne i ndwara ŋga. 6 Mbo ya vḛne wak ɓase mbe ma pal nde, ago nama pool waɗe ge mbi ne waɗe, tamekyala, mbi ma set pool ge hal nama, mbi yan nama ne mbi suwal go uzi. Ago mbi kwa kwa go, ndu ge mo ne e wak busu ya na pal, da ne wak busu ne na pal, ndu ge mo ne vḛne wak ya na pal, da ne wak vḛneya ne na pal.»
7 Ga̰l ge Mowab ma ne, ne ga̰l ge Madiyan ma ne, a gene bobo ma ya hon bage e waɗal, a det ya Balaam ta, a jan na fare ge Balak ne ma. 8 Balaam jan nama go: «Dwa me go go, mbi ma̰ gwan ne aŋ fare ge Bage ɗiŋnedin ma̰ jan mbi ya.» Ga̰l ge Mowab ma ne mbe ma gá katɗa Balaam ta. 9 Dok dyan tene ya Balaam ta, jan na go: «A wuɗi ma ne mo ta ne ɗaa?» 10 Balaam jan Dok go: «Balak ge Sippor vya, gan ge Mowab ma ne teme nama ya mbi ta ne, nama jya̰ mbi go: 11 ‹Naa ge ne ɗage ne suwal Masar ya ma, a tḭ suwal ja se, mbo ya, vḛne mo wak nama pal ne mbi pe, tamekyala mbi ma̰ set pool ge hal nama, mbi ma̰ yan nama ne mbi suwal go uzi.›» 12 Dok jan Balaam go: «Mbo poseya ne nama to, vḛne mo wak naa mbe ma pal to, a da ne wak busu ne bama pal.» 13 Balaam ɗage digi cya̰wak, jan ga̰l ge Balak ne ma go: «Gwa̰ me aŋ suwal ya, Bage ɗiŋnedin be vin go mbi mbo poseya ne aŋ to.» 14 Ga̰l ge Mowab ma ne mbe ma, a ɗage, a gwan Balak ta ya, a jan na go: «Balaam kuri go na mbo ya poseya ne i to.»
15 Balak gwan teme ga̰l ge ɗogle ma ya gḛ waɗeya, nama hormo waɗe nama ge zḛ ge ma waɗe. 16 A mbo ya Balaam ta, a jan na go: «Balak ge Sippor vya jan go: Kaage mo kuri be mbo ya mbi ta to. 17 Ago mbi mbo hon mo kaŋ kwaɗa ma gḛ, kaŋ ge daage pet ge mo ne ɓyare na ya ne mbi ta, mbi mbo hon mo na, mbo ya vḛne mo wak naa mbe ma pal ne mbi pe!»
18 Balaam vin, jan Balak dore ma go: «Kadɗa Balak hon mbi bware ma ne dinar ma ya wi zok puy ɗe, mbi day ge yele wak honna ge Bage ɗiŋnedin, Dok ge mbi ne ne pala go ŋgeɗo to bat. 19 Se no, aŋ me, dwa me mbi ta, mbi ma̰ kwar kaŋ ge Bage ɗiŋnedin ma gwan jan mbi ya.» 20 Dok mbo ya Balaam ta ɗaal zi, jan na go: «Kadɗa naa mbe ma mbo ya tol mo ɗe, ɗage digi, mbo ne nama. Amma ke ɗeŋgo kaŋ ge mbi ma̰ jan mo ya.»
Balaam kwara ná far na
21 Balaam ɗage digi cya̰wak, ndwar na kwara ná pal, mbo poseya ne ga̰l ge Mowab ma ne mbe ma. 22 Pore juliliya ge Dok ne ɗage digi bilu ne na ne mbo pe. Balaam ndwa na kwara ná pal, na dore ma azi a ka ɗame na. Swaga mborra go, maleka ge Bage ɗiŋnedin ne mḛ viya̰ go, tele na. 23 Kwara ná kwa maleka ge Bage ɗiŋnedin ne mḛya viya̰ go, ne kasagar swala na tok go, sele ne viya̰ go, wat sugur zi. Balaam iyal kwara ná ndwara gwan ne na ya viya̰ go. 24 Maleka ge Bage ɗiŋnedin ne mḛ koo pul go, gaaso ge oyo̰r ne ma buwal zi, gaaso mbe ma ka verra digi jwak. 25 Kwara ná kwa maleka ge Bage ɗiŋnedin ne, terse tene gulum ta zi, gyat Balaam koo gulum ta go. Balaam gwan iyal na. 26 Maleka ge Bage ɗiŋnedin ne mbo nama ndwara zḛ ya viya̰ ge gorse ɓermem go, ge ndu ne mbyat sele tok magul ko tok matoson pal to. 27 Swaga ge kwara ná ne kwa maleka ge Bage ɗiŋnedin ne ɗe, dol tene Balaam koo pul se, Balaam laar hot, ɗage iyal na ne na calaŋ. 28 Bage ɗiŋnedin hage kwara ná wak, jan Balaam go: «Mbi te ke mo da ɗo, mo ba iyal mbi ɗiŋ ndwara ataa ɗaa?» 29 Balaam jan kwara-ná go: «Ne mo ne cot tene ne mbi pe, te kasagar mbi tok go, mbi te ya hun mo.» 30 Kwara ná jan Balaam go: «Mbi te be mo kwara ná ge mo ne ndwar na pal ne zaŋgal ya day mbe ne to’a? Mbi ke mo kaŋ no ya dam ɗu ɗaa?» Balaam jan na go: «To!»
31 Swaga mbe go ɗe, Bage ɗiŋnedin hage Balaam ndwara, kwa maleka ge Bage ɗiŋnedin ne mḛya ne viya̰ go ne kasagar swala na tok go, gur na koo se, cwage na pala se. 32 Maleka ge Bage ɗiŋnedin ne jan na go: «Kyaɗa mo ba iyal mo kwara ná ɗiŋ ndwara go ataa ɗaa? Mbi mbo ya tele mo, ago swaga ge mo ne mbo na mbe kwaɗa mbi ndwara zi to. 33 Kwara ná kwa mbi, sele uzi no ɗiŋ ndwara ataa, te go na be sele uzi to, mbi te ya hun mo, mbi ya̰ na ne.» 34 Balaam jan maleka ge Bage ɗiŋnedin ne go: «Mbi ke sone, mbi be kwa go mo mḛ ya viya̰ go tele mbi to, se no, kadɗa mborra ge mbi ne a kwaɗa mo ndwara zi to ɗe, ya̰ mbi gwa̰ di.» 35 Maleka ge Bage ɗiŋnedin ne jan Balaam go: «Mbo poseya ne naa mbe ma, amma dwage ɗeŋgo fare ge mbi ma̰ jan mo ya.» Balaam mbo poseya ne naa ga̰l ge Balak ne mbe ma.
Ɓol ta ge Balaam ma ne Balak ne
36 Swaga ge Balak ne za̰ go Balaam yan ja mbo ya ɗe, wat ya na ndwara zum kun na Mowab suwal ga̰l go, na ge ne maŋgaɗam Arnon wak ya, suwal warbe wak ge aya dab ya. 37 Balak jan Balaam go: «Mbi te be teme naa mbo tol mo ya to’a? Kyaɗa mo ba mbo ya mbi ta to ɗaa? Mbi be mbyat ge hon mo hormo to ɗaa?» 38 Balaam jan Balak go: «Se no mbi yan ja mo ta. Mbi da ne pool he fare a̰me janna ne mbi pala bàŋ ɗar ɗaa? Mbi jan ɗeŋgo fare ge Dok ne e ya mbi wak zi janna.» 39 Balaam mbo poseya ne Balak, a det ya Kiryat-Hutsot go. 40 Balak tyare nday ma ne gii ma tuwaleya, teme Balaam ma ne ga̰l ma ge ne ka dagre ne na kaŋ ndwara. 41 Cya̰wak, Balak mbo ne Balaam ge Bamot-Baal ya, kwa Israyela vya ma mbut.