17
1 Bage ɗiŋnedin jan Musa go:2 «Jya̰ Eleyazar ge bage tuwaleya Aaron vya go, na abe siim ge ne hṵli go ma, na ka̰ nama uzi ya kaal, ago nama sḛ ma mbegeya.3 Hṵli ge naa ge ne ke sone ge a ne su mbe ma ne, a fyaɗe nama se ndwara so̰me twal tuwaleya se, ne jo̰ a tyare nama Bage ɗiŋnedin ndwara se, a mbegeya. A mbo gá kaŋ sayda ne Israyela vya ma pe.»4 Bage tuwaleya Eleyazar abe hṵli ge ne ɗeere ne fool ŋgirma ge naa ge ne tí mbe ma ne, fyaɗe nama se, so̰me twal tuwaleya se ne nama.5 A kaŋ saareya ne ne Israyela vya ma pe, ne da pe, ndu ge ne hir ge Aaron ne zi to, na mbo ya tyare dukan Bage ɗiŋnedin ndwara se to. Ndu ge ne ke no ya, na saŋge dimma ca ne Kore ma ne naa ge ne na pe go ma go, dimma ne Bage ɗiŋnedin ne jya̰ Musa go.
Ɓase ma ɗage sun ta Musa ma ne Aaron pal
6 Dam ge Kwap go ɗe, ɓase ge Israyela vya ma ne a ɗage sun ta Musa ma ne Aaron pal, a jan go: «A aŋ sḛ ma hṵ ɓase ge Bage ɗiŋnedin ne ma ne.» 7 Ɓase ma kote ta ya ke ho̰l ne Musa ma ne Aaron. Swaga ge a ne saŋge bama ndwara gúr swaga ɓol ta pal ya ɗe, pḭr kulbi gúr se, hormo ge Bage ɗiŋnedin ne dyan ya me. 8 Musa ma ne Aaron mbo ya gúr swaga ɓol ta wak go. 9 Bage ɗiŋnedin jan Musa go: 10 «Abe me ta uzi ne ɓase mbe ma no ta, ne sese no, mbi ya burmi nama uzi.» A kubi bama pul se. 11 Musa jan Aaron go: «He hṵli, abe ol ne twal tuwaleya pal ya na go, ka̰ dukan na wak zi, gene na avun cap mbo ɓase ma ndwara zi ya ndwara pore nama, ago Bage ɗiŋnedin saŋge pore go, mbogom ɗage ya digi me.» 12 Aaron abe ol dimma ne Musa ne jya̰ na go, sya ne na mbo ɓase ma buwal zi ya, ndi mbogom ɗage ya mbal ɓase ma. Na sḛ kan dukan ol wak zi, pore ɓase ma. 13 Mḛ naa ge siya ma ne naa ge ndwara ma buwal zi, mbogom mbe abe. 14 Mbogom mbe hṵ naa dudubu wol para anda ne kikis ɓyalar (14 700), be isi naa ge a ne su Kore pe go ma to. 15 Aaron gwan’a Musa ta, gúr swaga ɓol ta viya̰ wak pal, mbogom me abe.
Calaŋ ge Aaron ne
16 Bage ɗiŋnedin jan Musa go: 17 «Jya̰ Israyela vya ma go, nama ga̰l ma ne bama pehir ma go, nama ho̰ mo calaŋ ma ya ɗu, ɗu, ndwara go calaŋ wol para azi. Njaŋge pehir ge daage dḭl na calaŋ ta. 18 Njaŋge Aaron dḭl ge calaŋ ge Levi ne ta, ago ga̰l ge pehir ge daage ne da ne calaŋ ɗu ɗu. 19 Mo mbo kan calaŋ mbe ma ge gúr swaga ɓol ta zi, ge gwal ge eya ne ma ndwara zḛ, swaga ge mbi ne ɓol aŋ go. 20 Ndu ge na calaŋ ne ɓóy na wak ya, a ndu ge mbi ne tá na ne, go no mbi mbo tele Israyela vya ma be sun ta aŋ pal.»
21 Musa jan Israyela vya ma, ga̰l ge pehir ge daage ne hon na calaŋ ya, calaŋ ɗu ɗu wol para azi, calaŋ ge Aaron ne kat nama calaŋ ma buwal zi me. 22 Musa kan calaŋ mbe ma Bage ɗiŋnedin ndwara se, gúr swaga ɓol ta zi. 23 Dam ge kwap ge go, swaga ge Musa ne mbo ya gúr swaga ɓol ta zi ɗe, ɓol calaŋ ge Aaron ne, na ge ne pehir ge Levi ne zi wak ɓoyya, na wak ɓoyya ma folla zum, uwara amande tolla, a zon’a me. 24 Musa abe calaŋ ma ne Bage ɗiŋnedin ndwara se ya zum. Mbo ya Israyela vya ma ta mwaɗak, a kwar nama, ndu ge daage ame na calaŋ.
25 Bage ɗiŋnedin jan Musa go: «Gwa̰ ne calaŋ ge Aaron ne ge sandu wak tuli ta ya, na ka kaŋ sayda koyya ne naa ge kuri wak ma pe, ne da pe, mo tele nama be ge sun ta mbi pal, go no a ba su to.» 26 Musa ke tem dimma ne Bage ɗiŋnedin ne ho̰ na wak go.