Isiya Ma 15

Wak honna ne tuwaleya ma kerra pe

1 Bage ɗiŋnedin jan Musa go: 2 «Jya̰ Israyela vya ma go: Swaga ge aŋ ne mbo wat dḛ ya suwal ge mbi ne ho̰ aŋ na go, aŋ ka na go ɗe, 3 swaga ge aŋ ne mbo ɗage ya tyare tuwaleya hon Bage ɗiŋnedin, ko a tuwaleya ge tilla uzi ne, ko a tuwaleya ge wak tuli kerra ne ne, ko a tuwaleya kerra ge ne laar ɓyareya ne, ko a tuwaleya ge aŋ dam vḛso ma go ne, aŋ mbo tyare Bage ɗiŋnedin nday pool ma, ne gii ma, kaŋ ge hurra tuli na ndwara se. 4 Ndu ge ne gene na bobo ya hon Bage ɗiŋnedin, mbo tyare bobo ge swáma peɗem ne koro ataa ne num litre ɗu ne nus me na pe go. 5 Ne tame vya ge daage ge a ne tyare na pe, mo mbo tyare oyo̰r-jiya̰l litre pul ɗu ne nus ɓanna ne na, ne tuwaleya ge tilla uzi, ko ne tuwaleya ge ba̰a̰n ne pe. 6 Ne gamla pe, mo mbo tyare bobo ge swáma peɗem ne koro myanaŋgal, watɗa ne num litre azi me, 7 poseya ne oyo̰r-jiya̰l litre azi me. Mo mbo tyare nama bobo kaŋ ge hurra tuli hon Bage ɗiŋnedin. 8 Kadɗa mo tyare nday pool ne tuwaleya ge tilla uzi pe, ko ne tuwaleya ge wak tuli ne pe, ko ne tuwaleya ge ba̰a̰n ne pe hon Bage ɗiŋnedin ɗe, 9 mo mbo tyare nday pool mbe poseya ne swáma peɗem koro lamaɗo, watɗa ne num litre ataa, 10 ne oyo̰r-jiya̰l litre ataa me. Mbo kat kaŋ hurra tuli Bage ɗiŋnedin ndwara se.

11 A go mbe no aŋ mbo ka ke ne tuwaleya ge daage, ko ne ge nday ma ne, ko ne ge tame vya ma ne, ko ne ge ɓiya̰ ma ne me. 12 Aŋ mbo ke go no ne kavaar ge daage, ne bama tuwaleya ge kaŋ kyarga ne ma pal. 13 Vya suwal ma mwaɗak a mbo ka tyare bama tuwaleya ge tilla uzi kaŋ ge hurra tuli hon Bage ɗiŋnedin go mbe no. 14 Kadɗa vya gwasal ge ne ka mbay ne aŋ buwal zi, ko ge nama doŋ pe ma ne ke ya kaal aŋ buwal zi ɓyare ke tuwaleya ge tilla uzi kaŋ ge hurra tuli Bage ɗiŋnedin ndwara se ɗe, na tyare na dimma ca ne aŋ ne tyare go. 15 Mbo kat eya ge ɗu mbe ne ɓase ma pe, ne aŋ pe, ne vya gwasal ge ne ka mbay ne aŋ buwal zi ma pe me. Mbo kat eya ge ɗiŋnedin ne aŋ vya kon ma pe, ne aŋ pe, ne ndu ge ne ka mbay ne aŋ buwal zi pe me Bage ɗiŋnedin ndwara se. 16 Mbo kat eya ge ɗu, ne wak honna ge ɗu ne aŋ pe, ne vya gwasal ge ne ka mbay ne aŋ buwal zi pe me.»

Tuwaleya ge kaŋzam wak ge zḛ ge ne

17 Bage ɗiŋnedin jan Musa go: 18 «Jya̰ Israyela vya ma go: Swaga ge aŋ ne mbo det ja suwal ge mbi ne ɗame aŋ mbo na ya go, 19 swaga ge aŋ ne mbo zam kaŋzam ge suwal mbe ne ya ɗe, aŋ mbo tyare bobo hon Bage ɗiŋnedin. 20 Aŋ mbo ke paŋgaso ne aŋ kaŋ siyal wak ge zḛ ge, ge aŋ ne abe na ne aŋ twal pot swara ya. 21 Aŋ mbo tyare aŋ kaŋzam wak ge zḛ ge ma hon Bage ɗiŋnedin ɗiŋ mbo aŋ vya kon ma.

Tuwaleya ne sone kerra ge be laar ɓyareya to ne pe

22 Kadɗa aŋ ke sone ya be kwarra zi to, aŋ mbo ɓol wak honna ge Bage ɗiŋnedin ne ho̰ Musa pal to, 23 wak honna ge Bage ɗiŋnedin ne ho̰ aŋ na ne Musa ta, ne dam ge Bage ɗiŋnedin ne ho̰ na wak ya day mbo ya aŋ vya kon ma ta, 24 kadɗa a ke sone mbe kwarra zi to, ko kwarra to ge ɓase ma ne zi sone mbe ke no, ɓase ma mwaɗak a mbo tyare nday pool ɗu ne tuwaleya ge tilla uzi pe, kaŋ ge hurra tuli ne Bage ɗiŋnedin pe. A mbo tyare na poseya ne na bobo ge swáma peɗem ma ne ge oyo̰r jiya̰l ne, wak honna pal, a mbo tyare bemjere ɗu ne tuwaleya ge sone ne pe me.

25 Bage tuwaleya mbo ke tuwaleya ne pore sone ge ɓase ge Israyela vya ma ne pe, a mbo ɓol poreya. Ago a sone kerra ge be kwarra to ne. A mbo gene bobo ge tilla uzi ya hon Bage ɗiŋnedin, ne tyare kavaar ge ne tuwaleya ge ne sone pe Bage ɗiŋnedin ndwara se, ne bama sone kerra ge be kwarra to pe. 26 Ɓase ge Israyela vya ma ne pet poseya ne vya gwasal ge ne ka mbay ne nama buwal zi ma, a mbo ɓol poreya, ndwara go ɓase ke sone be kwarra to.

27 Kadɗa a ndu ɗu ke sone be kwarra to ne, na tyare ɓiya̰ kale ge del ɗu ne tuwaleya ge sone ne pe. 28 Bage tuwaleya mbo ke tuwaleya ne pore sone ge ndu ge ne ke sone be kwarra to Bage ɗiŋnedin ndwara se pe. Swaga ge bage tuwaleya ne mbo ke tuwaleya ya ne pore na sone pe, na sḛ mbo ɓol poreya. 29 Ndu ge ne ke sone ya be kwarra to Bage ɗiŋnedin ndwara se, ko vya twala, ko vya gwasal ge ne ka mbay ne aŋ buwal zi, eya ge ɗu mbe mbo kat ne na pe. 30 Amma kadɗa vya twala, ko vya gwasal ge ne ka mbay ne aŋ buwal zi ke sone ya ne laar ɓyareya, sal Bage ɗiŋnedin, a mbo ban ndu mbe ne ɓase ma buwal zi uzi. 31 Na sḛ sḛ́ fare ge Bage ɗiŋnedin ne, yele na wak honna pala. A mbo ban ndu mbe uzi, na sḛ mbo in dṵṵl ge na sone ne.»

Mḛreya ne dam ɗigliya pe

32 Swaga ge Israyela vya ma gale ne ful pul zi ɗe, a ɓol ndu a̰me ne abe uwara dam ɗigliya go. 33 Nama ge a ne ɓó na ne swaga abe uwara go ma mbo ne na ya Musa ma ne Aaron ma ne ɓase ma ndwara se. 34 A dol bama ndwara na pal, ago a be ɓol fare ge a ba ke ne na to gale. 35 Bage ɗiŋnedin jan Musa go: «Ndu mbe no mbya a hun na. Ago ɓase ma mbá na ne njal uzi gulum go̰r zum ya.» 36 Ɓase ma mwaɗak, a mbo ne na gulum go̰r zum ya, a mbal na ne njal uzi, su dimma ne Bage ɗiŋnedin ne ho̰ Musa na wak go.

Ba̰r wak ge kanna ŋgoŋgos

37 Bage ɗiŋnedin jan Musa go: 38 «Jya̰ Israyela vya ma go, nama ka̰ nama ba̰r wak ma ŋgoŋgos, nama vwa taal bolo ge ba̰r wak ge ŋgoŋgos ma ta. Na ka go no ɗiŋ mbo aŋ vya kon ma. 39 Swaga ge aŋ ne vwal nama aŋ ba̰r ma wak go, aŋ mbo ka ndil nama, mbo kat kaŋ vot pala ne eya ge Bage ɗiŋnedin ne ma pe, ne kerra pal pe me, na kaage aŋ ke laar ɓyareya ge aŋ ne ma to, ko ene na gene aŋ sḭḭm zi to me. 40 Go no, aŋ mbo ka dwat mbi wak honna ma pal, ne ke mborra nama pal, aŋ mbo kat mbegeya ne Dok ge aŋ ne pe. 41 Mbi, Bage ɗiŋnedin Dok ge aŋ ne, mbi ndage aŋ ne suwal Masar diŋ ya zum ne ndwara kat aŋ Dok. Mbi Bage ɗiŋnedin mbi aŋ Dok ne.»