Musa teme naa wol para azi mbo ndil suwal Kanan
13
1 Bage ɗiŋnedin jan Musa go: 2 «Teme naa mbo ndil suwal Kanan ge mbi ne ho̰ Israyela vya ma, ndu ɗu ne pehir ge daage go, nama ka ga̰l ge bama pehir ma ne.» 3 Musa teme nama ne ful pul ge Paran ne go, wak honna ge Bage ɗiŋnedin ne pal. Naa mbe ma mwaɗak a ka ga̰l ge Israyela vya ma ne.4 Nama dḭl ma no:
Ne pehir ge Ruben ne zi, a Chammwa ge Zakkur vya,
5 ne pehir ge Simeyon ne zi, a Chafat ge Hori vya,
6 ne pehir ge Yuda ne zi, a Kaleb ge Yefunne vya,
7 ne pehir ge Isakar ne zi a Yigal ge Yusuf vya,
8 ne pehir ge Efrayim ne zi, a Hoseya ge Nun vya,
9 ne pehir ge Bayami ne zi, a Palti ge Rafu vya,
10 ne pehir ge Zabulon ne zi, a Gaddiyel ge Sodi vya,
11 ne pehir ge Yusuf ne zi, ne pehir ge Manasa ne go, a Gaddi ge Susi vya,
12 ne pehir ge Dan ne zi, a Ammiyel ge Gemalli vya,
13 ne pehir ge Aser ne zi, a Setur ge Mikayel vya,
14 ne pehir ge Neftali ne zi, a Nahbi ge Vofsi vya,
15 ne pehir ge Gad ne zi, a Gewuyel ge Maki vya.
16 No a naa ge Musa ne teme nama mbo ndil suwal Kanan ma dḭl ma ne. Musa syal Hoseya ge Nun vya dḭl Juswa.
17 Musa teme nama mbo ndil suwal Kanan, jan nama go: «He me viya̰ ne Negev go, aŋ mbo ndé njal pala digi. 18 Ndi me suwal mbe, naa ge ne ka ne na go ma, ko a naa ge pool ma ne, ko naa ge taŋgay ma ne, ko a woɗege gwa, ko a ɓase de, 19 ko suwal ge naa mbe ma ne ka ne na go a siŋli, ko a sone de, ko nama suwal ga̰l ma be ver seɗe to, ko a ve digi da ne gulum ga̰l de, 20 ndi me suwal mbe don kaŋ, ko don kaŋ to, ko da ne uwara ma, ko a be uwara ma de. Ke me ta naa sonmo, gene me na uwara tolla ma ya.» Ago ka swaga ge oyo̰r ne e pe zonna go.
21 A ɗage, a ndil suwal ne ful pul ge Sin ne go ɗiŋ mbo Rehov, viya̰ ge mbo suwal Hamat ya. 22 A ɗage ne Negev go, ɗiŋ a det mbo Hebron ya, swaga ge Ahiman, Chechay, ne Tamay ge Anak vya ma ne ka ne go.
A sḭ suwal Hebron, suwal Sohan ge ne suwal Masar go ndwara zḛ del ɓyalar. 23 A det ɗiŋ mbo baal pul ge Echekol ne ya, swaga mbe go, a vyan oyo̰r tok ne na tolla jyan, naa azi ka in na ta buwal zi ne uwara. A yel uwara grenad tolla ma, ne fere ma me. 24 A tó swaga mbe baal pul ge Echekol ne, ne Israyela vya ma ne vya̰ oyo̰r ne swaga mbe go pe.
25 Swaga ge dam wara-anda ne mbya, naa ge ne mbo ndil suwal ma gwan’a ne bama swaga ndil suwal ya. 26 A gwan’a ɓol Musa ma ne Aaron ma, ne ɓase ge Israyela vya ma ne ma mwaɗak ge Kades go, ful pul ge Paran ne zi. A wan nama fare pe poseya ne ɓase ma mwaɗak, a ŋgay nama uwara tolla ma ge suwal mbe ne me. 27 A wan Musa fare pe go: «I mbo suwal ge mo ne teme i na ya, fareba, a suwal ge ne ɓul pam ma ne daaram ne, na uwara tolla ma no. 28 Amma naa ge ne ka ne suwal mbe go ma, a naa ge pool ma ne, nama suwal ga̰l ma ve ver se ne gulum ga̰l, i kwa Anak vya ma ge swaga mbe ya me. 29 Amalek vya ma ka ya Negev go, Hittitiya ma, Yebus ma, ne Amoriya ma ka ya njal pe zi, Kanan ma ka ya maŋgaɗam ga̰l yuwam wak go ne maŋgaɗam Urdun wak go.» 30 Kaleb e ɓase ge ne ɗage gool Musa pal ma haŋgal se, jan nama go: «Mbo me nee, nee mbo ame suwal mbe, a ŋgat nee mbo hal nama.» 31 Amma naa ge a ne mbo poseya ne na ma, a jan go: «Nee mbyat mbo ke pore ne nama to, ago a waɗe nee da ne pool.» 32 A ka jan Israyela vya ma fare ge sone ma ge suwal ge bama ne mbo ndil na mbe no pal, a ka jan go: «A suwal ge ne pur na naa uzi ne, naa ge i ne kwa nama suwal mbe go ma mwaɗak, a naa ge don ga̰l gegerndeŋ ma ne. 33 Suwal mbe go, i kwa naa ge don twala ma, Anak vya ma, pehir ge naa ge don twala ma ne, i ndi ta nama ndwara zi dimma ne tere ma go, nama sḛ ma ndi i go mbe no me.»