Temel Kerra Ge Levi Vya Ma Ne 13

Eya ne swama kunna pe

1 Bage ɗiŋnedin jan Musa ma ne Aaron go: 2 Kadɗa ndu a̰me duur mbal ya, ko kat ne kyaɗal, ko na bol ɗage twatɗa, na swaga mbe ma hat dimma ne na swama kunna ne go, a mbo gene na ya naa ge ke tuwaleya ma ta, ko Aaron ta, ko na vya a̰me ta. 3 Bage tuwaleya mbo ndil na swaga ge moy mbe, kadɗa na swaga ge moy mbe susu saŋge ya saal, al’a zi ya ɗugul, a swama kunna ne. Swaga ge bage tuwaleya ne ndil na ya tyatyat, mbo fut zum go, na yaɗat to. 4 Kadɗa na bol twa twat baŋ, na jwaŋ to, ko na susu pe be saŋge saal to me, bage tuwaleya mbo caɗe na uzi hini ɗiŋ dam ɓyalar. 5 Dam ge ɓyalar go, bage tuwaleya mbo gwan ndil na. Kadɗa na ɓol ya go, na swaga ge moy mbe mḛ mḛ, be zam zḛ na bol ta to, bage tuwaleya mbo gwan caɗe na uzi hini dam ta ɓyalar. 6 Dam ge ɓyalar go, bage tuwaleya mbo gwan ndil na ge ndwara azi. Kadɗa na swaga ge moy mbe wak ɓoy ya saal, be zam zḛ to, bage tuwaleya mbo jan go na yaɗat. A kyaɗal ne baŋ. Ndu mbe mbo usi na ba̰r ma uzi, mbo gá yaɗat. 7 Amma kadɗa na kyaɗal mbe pe fyaɗe tene ya se, go̰r ge bage tuwaleya ne ndi na, ne jya̰ go na yaɗat go, mbo gwan’a ndil tene ge ndwara azi bage tuwaleya ta. 8 Bage tuwaleya mbo gwan ndil na. Ne jo̰ kyaɗal mbe pe fyaɗe se ɗe, bage tuwaleya mbo fut zum go, na yaɗat to. A swama kunna ne.

9 Kadɗa ndu a̰me ɓol moy swama kunna ya, a mbo gene na ya bage tuwaleya ta. 10 Bage tuwaleya mbo ndil na. Kadɗa ndu mbe da ne swaga ɗageya ge saal ma na bol ta, na susu hatɗa saal, na jwaŋ wak ma pugi ja zum me, 11 no a swama kunna ge ne mbo ke kaal ne. Bage tuwaleya mbo fut zum go, na yaɗat to. Mbo caɗe na uzi hini ndwara gwan ndil na to, ago na sḛ yaɗat to.

12 Kadɗa Bage tuwaleya swaga ndil na go, kwa swama kunna mbe ya kanna na duur ta ko̰o̰k, ne na pala digi ɗiŋ mbo na koo se, 13 mbo ndil na tyatyat, kadɗa swama kunna mbe ame na duur ya mwaɗak, mbo fut zum go na yaɗat. Ne jo̰ na duur saŋge ya saal mwaɗak, na sḛ yaɗat. 14 Amma dam ge na duur ne ɗage ya fursiya, a mbo fut zum go na yaɗat to. 15 Bage tuwaleya mbo ndil na duur ge fursiya mbe ma, mbo fut zum go na yaɗat to. Ago fursiya mbe yaɗat to, a swama kunna ne. 16 Kadɗa na duur fursiya mbe wak ma saŋge ya saal, ndu mbe mbo gwan mbo bage tuwaleya ta ya. 17 Bage tuwaleya mbo ndil na tyatyat, kadɗa na jwaŋ wak mbe ma saŋge ya saal, mbo fut zum go, ndu mbe yaɗat, ndu mbe mbo gá yaɗat.

18 Kadɗa ndu a̰me ka ne ɓuy, zó̰ no. 19 Kadɗa ɓuy mbe wak gwan ɗage ya mballa, hat saal, ko hat kaal, ndu mbe mbo gwan’a bage tuwaleya ta. 20 Bage tuwaleya mbo ndil na, kadɗa na ya̰ jwaŋ ma ya na bol ta, na susu hatɗa saal me, bage tuwaleya mbo fut zum go na yaɗat to, a swama kunna ka̰ ya zum ɓuy byalam ma go ne. 21 Amma kadɗa bage tuwaleya ndil na ya, ɓol go, na susu saal to, jwaŋ wak be zam se to, na wak ɓoy ya saal, mbo caɗe ndu mbe uzi hini ɗiŋ dam ɓyalar. 22 Kadɗa na jwaŋ mbe dasare ya na ta mwaɗak, bage tuwaleya mbo fut zum go, na yaɗat to, a moy ne. 23 Amma kadɗa na jwaŋ mbe wak be zam se to, a pyalaŋ ge ɓuy ne ne baŋ, bage tuwaleya mbo fut zum go, na yaɗat.

24 Kadɗa ndu a̰me ol til na ya, ya̰ pyalaŋ na ta. Kadɗa kaŋ a̰me saal ko kaal dyan’a na pyalaŋ mbe go, 25 bage tuwaleya mbo ndil na. Kadɗa na susu hatɗa saal, na jwaŋ ma zam’a ɗugul, a swama kunna dyan ne pyalaŋ go ne. Bage tuwaleya mbo fut zum go, ndu mbe yaɗat to. A swama kunna ne. 26 Amma kadɗa bage tuwaleya ndil na ya, kwa go, na susu be saŋge saal to, na jwaŋ be zam zi ya to, na jwaŋ wak ma ɓoy ya saal, mbo caɗe na uzi ya hini ɗiŋ dam ɓyalar. 27 Dam ge ɓyalar go, bage tuwaleya mbo gwan ndil na. Kadɗa na jwaŋ mbe dasare ya se na ta, mbo fut zum go, na yaɗat to. A swama kunna ne. 28 Amma kadɗa na jwaŋ mbe wak be dasare se to, ya na byalam go, na wak ɓoy ya saal, a jwaŋ tolla ge ol ne ne baŋ. Bage tuwaleya mbo fut zum go, na yaɗat, a pyalaŋ ge ol ne ne baŋ.

29 Kadɗa ndu son, ko ndu gwale da ne jwaŋ ne na pala digi, ko na duwa̰r pe go, 30 bage tuwaleya mbo ndil na jwaŋ mbe, kadɗa na zam ya zi ya ɗugul, na susu tin ya kaal yumar. Bage tuwaleya mo fut zum go, na yaɗat to, a bigru ne. A swama kunna ge pala ne ne, ko ge duwa̰r pe ne ne. 31 Swaga ge bage tuwaleya ne ndil na jwaŋ mbe wak ya, kwa go, bigru mbe be zam zi ya ɗugul to, na susu ge pisil to, mbo caɗe ndu mbe uzi hini ɗiŋ dam ɓyalar. 32 Swaga ge bage tuwaleya ne mbo gwan ndil na ya dam ge ɓyalar go, kadɗa na bigru mbe be dasare se to, na susu tin kaal yumar to, be zam zi ya ɗugul to, 33 ndu mbe mbo sot na pala susu, ko na duwa̰r pe susu ma uzi be ge sot swaga ge bigru ma to. Bage tuwaleya mbo gwan caɗe ndu ge ne bigru mbe uzi hini ge ndwara azi ta dam ɓyalar. 34 Dam ge ɓyalar go, bage tuwaleya mbo gwan ndil na bigru mbe, kadɗa na be dasare se to, ko be zam zi ya ɗugul to, bage tuwaleya mbo fut zum go na yaɗat. Ndu mbe mbo usi na ba̰r ma uzi, mbo gá yaɗat. 35 Kadɗa bigru mbe gwan dasare tene ya se ndu mbe duur ta go̰r ge bage tuwaleya ne fú zum go na yaɗat go, 36 bage tuwaleya mbo gwan ndil na. Kadɗa bigru mbe dasare tene ya se na duur ta, bage tuwaleya mbo gwan ndil go na susu tin’a kaal mbḛ to, ago ndu mbe yaɗat to. 37 Amma kadɗa bigru mbe be mḛ ya na swaga ge ɗu go, susu ge pisil ma ɗage ya pyarra na go, bigru mbe zó̰ zon. Ndu mbe yaɗat. Bage tuwaleya mbo fut zum go, na yaɗat.

38 Kadɗa ndu son, ko ndu gwale duur ɗage ya twatɗa, 39 bage tuwaleya mbo ndil na. Kadɗa na duur twatɗa mbe ɓoy ya saal, a moy ge ne bol ta ne baŋ, ndu mbe yaɗat.

40 Kadɗa ndu son pala susu abe ya uzi, a pala ndageya ne. Ndu mbe yaɗat. 41 Kadɗa na sḭ́ḭ́l wak abe ne, a sḭ́ḭ́l wak ndageya ne. Ndu mbe yaɗat. 42 Amma kadɗa na swaga ge ndageya mbe go, na pala digi, ko na sḭ́ḭ́l wak go, a ɓol swaga ge fursiya ge pe saal ko kaal ya, a swama kunna kan ya zum na pala ge ndageya go, ko na sḭ́ḭ́l wak go ne. 43 Bage tuwaleya mbo ndil na. Kadɗa fursiya ge pe saal, ko kaal ma ya na swaga ge turra mbe go, 44 ndu mbe da ne moy swama kunna, na yaɗat to. Bage tuwaleya mbo fut zum go, na yaɗat to. Moy mbe ya na pala digi.

45 Bage ge ne ɓó moy swama kunna mbe ba̰r ma mbo kat taabeya, pala susu kacareya, wak vwalla me. Mbo ka oy na ndwara zḛ go: Mbi yaɗat to! Mbi yaɗat to! 46 Dam ma mwaɗak ge moy mbe gale ne na ta, na sḛ yaɗat to. Kat swaga hini, swaga katɗa go̰r zum ya.

Gufuriya ge ba̰r ma ne

47 Kadɗa gufuriya wan ba̰r ge tame susu ne ya, ko ge ɓoso lin ne, 48 ko ba̰r ge a ne ke na ne tame susu, ko ge ɓoso lin ne, ko dab, ko kaŋ ge daage pet ge a ne ke na ne gwabal, 49 kadɗa gufuriya mbe saŋge ya sel, ko kaal ba̰r ta, ko dab ta, ko ba̰r ge a ne ke na ne tame susu ta, ko ge ne ɓoso lin ta, ko kaŋ ge daage pet ge a ne ke na ne gwabal ta, a gufuriya ne. Bage tuwaleya mbo ndil na. 50 Swaga ge ne ndil moy mbe ya, mbo koy na digi ɗiŋ dam ɓyalar. 51 Dam ge ɓyalar go, bage tuwaleya mbo gwan ndil gufuriya mbe. Kadɗa na dasare ya ba̰r ta, ko ba̰r ge ne ke ne tame susu ta, ko ge ne ke ne ɓoso lin ta, ko dab ta, ko kaŋ ge daage pet ge ne ke ne gwabal ta, a gufuriya ge ne ndage uzi to ne. Kaŋ mbe yaɗat to. 52 Bage tuwaleya mbo til ba̰r, ko ba̰r ge ne ke ne tame susu, ko ge ne ke ne ɓoso lin, ko dab, ko kaŋ ge daage pet ge ne ke ne gwabal uzi. Ne jo̰ a gufuriya ge ne ndage uzi to ne, a til na uzi.

53 Amma kadɗa bage tuwaleya ndil gufuriya mbe ya, kwa go na be dasare ba̰r ta, ko ba̰r ge ne ke ne tame susu ta, ko ge ne ke ne ɓoso lin ta, ko kaŋ ge daage pet ge ne ke ne gwabal ta to, 54 bage tuwaleya mbo hon wak go, a usi na, mbo gwan koy na digi ta dam ɓyalar. 55 Go̰r ge a ne mbo usi gufuriya mbe ya uzi, bage tuwaleya mbo gwan ndil na, kadɗa be er to, be dasare se to me, kaŋ mbe yaɗat to, a mbo til na uzi. Ko gufuriya mbe wa̰ ba̰r le ge zum ge, ko le ge zi ge.

56 Amma kadɗa bage tuwaleya ndil na ya, kwa go, go̰r usiya go, na be ndage uzi kwaya̰l to, mbo kun ba̰r mbe, ko gwabal, ko ba̰r ge ne ke ne tame susu, ko ge ne ke ne ɓoso lin, swaga mbe uzi. 57 Kadɗa gufuriya gwan dyan ja ba̰r mbe ta, ko ba̰r ge ne ke ne tame susu mbe ta, ko ge ne ke ne ɓoso lin mbe ta, ko kaŋ ge daage pet ge ne ke ne gwabal mbe ta, a mbo til na uzi, ago gufuriya mbe ya na zi. 58 Swaga ge a ne usi kaŋ ge gufuriya ne wa̰ na ya, ko a ba̰r, ko a ba̰r ge a ne ke na ne tame susu, ko a ba̰r ge a ne ke na ne ɓoso, ko a kaŋ ge daage pet ge a ne ke na ne gwabal. Kadɗa na usi ya uzi, a mbo gwan usi na ge ndwara azi, ba gá yaɗat. 59 No a eya ne gufuriya ge ba̰r ne pe ne, ko ba̰r ge a ne ke na ne tame susu, ko ge a ne ke na ne ɓoso lin, ko dab, ko kaŋ ge daage pet ge a ne ke na ne gwabal, ndwara fut zum go na yaɗat, ko na yaɗat to ne.