Wat Zum 29

Tok eya pal ge naa ge ke tuwaleya ma ne

1 Ndi kaŋ ge mo ba ke ne mbege naa ge ke tuwaleya pe no:

Wa̰ nday pool digli ɗu, ne gamla ge be saaso to ma azi, 2 ne katugum ge be jiya̰l hore, ne paŋgaso ge be jiya̰l hore watɗa ne num, ne paŋgaso ge fiyal ge be jiya̰l hore ge a ne suusi num na ta. Mo mbo sat nama da ne gḛme swáma. 3 Mo mbo kan nama gum zi, mo ba tyare nama dagre ne nday ma, ne gamla mbe ma. 4 Mo mbo gene Aaron ma ne na vya ma ya gúr swaga ɓol ta viya̰ wak pal go, mo ba son nama uzi ne mam. 5 Mo abe ba̰r ma, mo kan Aaron ba̰r ge pul zi ge, ne ba̰r ga̰l, ne pargalaŋ ba̰r ga̰l pal, mo vwal ba̰r ge vwal ko̰o̰l go se ne bit ge pargalaŋ ne ma me. 6 Mo par kadmul na pala digi, mo fet pyalaŋpyalaŋ ge mbegeya ge kadmul ta. 7 Mo hé num ge mbegeya ne, mo kan na na pala digi, mo mbege na. 8 Mo gene na vya ma ya, mo kan nama ba̰r ge pul zi ge ma nama ta me. 9 Mo vwal Aaron ma ne na vya ma pul ne bit, mo twar nama pala ne kadmul me.

Temel tuwaleya mbo gá ge nama ne dedet. Go no mo mbo e tok Aaron ma ne na vya ma pal.

10 Mo mbo gene nday dalu ya gúr swaga ɓol ta wak go, Aaron ma ne na vya ma ba e bama tok ma na pala go. 11 Mo vyan nday pool digli mbe Bage ɗiŋnedin ndwara se, gúr swaga ɓol ta wak go. 12 Mo ame nday mbe swama, mo par mo tok wak swama pal, mo fat na twal t uwaleya kḭḭm ma ta, mo kan swama pe ge ne gá mwaɗak twal tuwaleya koo se. 13 Mo abe num fegem ge ne laar-zaaso ta, ne da̰a̰l ge ne njeel ta ma, ne golsoŋ ma jwak, ɓanna ne num ge ne so̰me nama zi ma, mo ba til nama twal tuwaleya pal. 14 Amma mo til nday pool digli mbe duur ma, ne na dab ma, ne na njoo ma uzi ya, ge swaga katɗa go̰r zum ya. No a tuwaleya ge ne sone pe ne.

15 Mo wan gamla ge ɗu, Aaron ma ne na vya ma ba e bama tok ma na pala go. 16 Mo vyan gamla mbe se, mo ame na swama, mo cigi na goŋle twal tuwaleya se. 17 Mo por gamla mbe se, mo usi na laar-zaaso ma ne na koo ma uzi, mo kan nama ge duur ma ne na pala kal ma pal. 18 Mo til gamla mbe uzi mwaɗak ge twal tuwaleya pal. No a tuwaleya ge tilla uzi ne Bage ɗiŋnedin pe ne. No a tuwaleya ge tilla uzi ge hur tuli ne Bage ɗiŋnedin pe ne.

19 Mo mbo wan gamla ge azi, Aaron ma ne na vya ma ba e bama tok ma na pala go. 20 Mo vyan gamla mbe se, mo ame na swama, mo tat na ge Aaron ma ne na vya ma togor wak logɗor ge matoson ma go, ne nama tok-gwaɗega̰l ma ne nama koo-gwaɗega̰l ge matoson ma go, mo cigi swama ge ne gá goŋle twal tuwaleya se. 21 Mo he swama ge ne twal tuwaleya pal poseya ne num ge mbegeya ne, mo cigi na Aaron ma ne na vya ma ta, ne nama ba̰r ma ta me. Go no Aaron ma ne na vya ma ne bama ba̰r ma pet a mbo gá mbegeya. 22 Mo mbo abe gamla num fegem ma, ne na pesa̰l, ne num fegem ge laar-zaaso ta ma, ne da̰a̰l ge ne so̰me njeel se ma, ne golsoŋ ma jwak, poseya ne num ge ne so̰me nama zi ma, ne na koo-wul matoson: No a gamla ge ne tok eya pal pe ne. 23 Uwale, mo he katugum ge be jiya̰l hore ge gwale hubluk ge ne Bage ɗiŋnedin ndwara se ge gum go ɗu, poseya ne paŋgaso ge a ne wa na ne num ɗu, ne paŋgaso ge fiyal ɗu me. 24 Mo hon kaŋ mbe ma mwaɗak ge Aaron ma ne na vya ma tok go. Mo e nama nama tyare mbi na digi. 25 Mo ame nama ne nama tok go, mo tyare nama tilla uzi ge twal tuwaleya pal, tuwaleya ge tilla uzi ma pal. No a tuwaleya ge tilla uzi, ge hur tuli ne Bage ɗiŋnedin pe ne. 26 Mo he gamla ge ne e tok Aaron pal pe ko̰o̰l, mo tyare na hon mbi. No a mo kaŋ ndwara ne. 27 Mo mbo mbege gamla ge a ne tyare na ne e tok Aaron ma ne na vya ma pal pe ko̰o̰l ma ne na koo-wul ma ne Bage ɗiŋnedin pe. 28 Eya mbe no mbo kat ɗiŋnedin ne Aaron ma ne na vya ma pe, swaga ge Israyela vya ma ne tyare tuwaleya ge ba̰a̰n ne hon Bage ɗiŋnedin, a mbo ka ndage kaŋ mbe ma no hon Aaron ma ne na hir ma.

29 Go̰r siya ge Aaron ne go, na ba̰r tuwaleya ge mbegeya ma mbo gá na vya ma. A mbo ka par nama swaga ge a ne ɗeere num e tok nama pal hon nama temel go. 30 Bage tuwaleya ge ne mbo er na ya ne na vya ma buwal zi mbo kan ba̰r mbe na ta ɗiŋ dam ɓyalar, go no ba wat gur swaga ge mbegeya zi ke tuwaleya. 31 Mo mbo wan gamla ge ne e tok pal pe, mo sḭ na duur swaga ge mbegeya zi. 32 Aaron ma ne na vya ma ba zam gamla duur ma ne katugum ge ne gum zi mbe ma ge gúr swaga ɓol ta wak go. 33 Nama sḛ ma ɗeŋgo a mbo zam kaŋ ge a ne tyare nama ne hat nama yaɗat pe, ne hon nama temel pe, ne mbege nama pe me ma ne. Ndu ge ɗogle zam kaŋ mbe ma to bat. Ago a kaŋ ge mbegeya ma ne. 34 Kadɗa duur ge tuwaleya ge é tok pal ma ne katugum gá ya digi ɗiŋ mbo cya̰wak, a mbo til nama uzi, ndu a̰me mbo zam nama to bat, ago a kaŋ ge mbegeya ma ne. 35 Mo mbo ke ne Aaron ma ne na vya ma dimma ca ne mbi ne ho̰ mo wak go. Tok eya pal ge Aaron ma ne na vya ma ne mbo he dam ɓyalar.

36 Mo mbo ka tyare nday pool digli tuwaleya ne pore sone pe dam ne dam. Go no mo ba hat twal tuwaleya harcal, mo ba ɗage kan num na pal ndwara mbege na. 37 Mo mbo ke tuwaleya twal tuwaleya pal dam ɓyalar ne hat na yaɗat pe, go no mo ba mbege na. Twal tuwaleya mbe mbo kat mbegeya uzi hini cat, ago kaŋ ge daage pet ge ne mbo ya na pal mbo kat mbegeya.

Tuwaleya ge tilla uzi ge dam ne dam

38 Ndi kaŋ ge mo ba mbo tyare twal tuwaleya pal ma no: Tame vya ge del ɗu ma azi dam ne dam. 39 Mo mbo tyare tame vya ge ɗu cya̰wak, ge may gasamal. 40 Ne tame vya ge zḛ ge, mo mbo tyare swáma peɗem koro pul ataa watɗa ne num ge ɗermel jargalak litre ɗu ne nus, ne oyo̰r jiya̰l litre ɗu ne nus me kanna na pal. 41 Tame vya ge azi, ge a ne tyare na gasamal mbe ɗe, mo mbo tyare swáma ma ne num ma ne oyo̰r jiya̰l ma dimma ca ne ge cya̰wak go. Mo mbo tyare nama tuwaleya ge tilla uzi ge hur tuli ne Bage ɗiŋnedin pe. 42 No a tuwaleya ge tilla uzi ne, aŋ mbo ka tyare mbi na ɗaɗak doŋ pe ma ne doŋ pe ma ge gúr swaga ɓol ta wak go. A swaga mbe ya go mbi ba ka ɓol aŋ, a swaga mbe go mbi ba ka jan fare ne mo. 43 Mbi mbo ka ɓol Israyela vya ma swaga mbe go, mbo kat mbegeya ne hormo ge mbi ne pe. 44 Mbi mbo mbege gúr swaga ɓol ta ma ne twal tuwaleya ne mbi pe. Mbi mbo mbege Aaron ma ne na vya ma ne mbi temel tuwaleya pe me. 45 Mbi mbo gá katɗa Israyela vya ma buwal zi, mbi mbo gá nama Dok me. 46 Go no, nama sḛ ma mbo kwa go, mbi Bage ɗiŋnedin, mbi bama Dok ne, mbi abe bama ne suwal Masar diŋ ya zum go, mbi gá katɗa bama buwal zi. Mbi Bage ɗiŋnedin, mbi nama Dok ne.