Waageya ge kaŋ ŋgayya ge wol ne
11
1 Bage ɗiŋnedin jan Musa go: «Mbi ɓyare teme mbogom ge pe dab ya Faraon ma ne Masar ma pal. Go̰r go, na sḛ mbo ya̰ aŋ mborra. Ge go na ya̰ aŋ mborra baŋ ɗe, na sḛ mbo yan aŋ yan ne go go. 2 Jya̰ ɓase ma go: Ndu son ge daage, ko ndu gwale ge daage na kaɗe kaŋ ge a ne ɗeere nama ne fool kaal ma, ko ne dinar ma ne nama kaam ma tok go.» 3 Bage ɗiŋnedin é Masar ma kwa Israyela vya ma a̰se. Ago Musa sḛ me, naa ga̰l ge temel ge Faraon ne ma, ne ɓase ge Masar ne ma pet, a ka hon na hormo ge be to.4 Musa jan Faraon go: «Bage ɗiŋnedin jan go: Ɗaal ga̰l zi, mbi ma̰ an suwal Masar go. 5 Vya pul soy ge Masar ma ne ma mwaɗak a ma̰ su. Ne vya pul soy ge Faraon ne, na ge ne ka ne hool muluk pal ɗiŋ mbo vya pul soy ge kale ge ne nan swara ne ta, ne vya pul kale ge kavaar ma ne pet me. 6 Naa mbo fyal digi ɓuu suwal Masar go pet. Naa be fyal fyaso ge go mbe hir pe ɗu to, ndu mbo gwan fyal fyaso ge go mbe hir to bat me. 7 Amma Israyela vya ma buwal zi, gú mbo gor ndu dasana, ko kavaar to bat. Go no aŋ mbo kwa go, Bage ɗiŋnedin é varseya ya Masar ma ne Israyela ma buwal zi. 8 Swaga mbe go no, mo naa ga̰l ge temel ma mbo mbo ya gur bama koo ma mbi ndwara se, a jan mbi go: Aŋ ne ɓase ge ne mo pe go ma pet, wá me zum! Go̰r kaŋ mbe ma no go, ŋgat mbi mbo wat zum.» Musa wat ne Faraon diŋ ya ne pore juliliya.