8
1 Bage ɗiŋnedin jan Musa go: «Jya̰ Aaron go: Tyare calaŋ ge maŋgaɗam ma, ne maŋgaɗam Nil tok ma, ne mam yaŋga ma pal ya, é móy ma ndé ya digi suwal Masar go.» 2 Aaron tyare na tok ge mam ge ne suwal Masar go ma pal, móy ma ndé ya digi, a ŋguy suwal Masar. 3 Amma mbole ma ke go no ca ne bama kaŋ mbuɗiya ma. A é móy ma ndé ya digi suwal Masar go pet me.4 Faraon tol Musa ma ne Aaron ya, jan nama go: «Kaɗe me Bage ɗiŋnedin, na abe móy ma ne i ne mbi ɓase ma ta uzi ya. Go no mbi ba ya̰ ɓase ma mbo tyare tuwaleya hon Bage ɗiŋnedin.» 5 Musa jan Faraon go: «Ne hormo ge mo ne pe, ho̰ mbi dam ge mbi ba kaɗe Dok na abe móy ma ne aŋ ne mo naa ga̰l ge temel ma, ne ɓase ge mo ne ma ta uzi, a ba gá maŋgaɗam Nil se ya ɗeŋgo.» 6 Faraon jan Musa go: «Na ka kwap no juju!» Musa jan na go: «Ma̰ ke dimma ne mo ne jya̰ go, go no mo ba kwa go, dok a̰me ge mbyatɗa ne Bage ɗiŋnedin Dok ge i ne go to. 7 Móy ma mbo abe ta ne aŋ ne mo naa ga̰l ge temel ma, ne mo ɓase ma yàl ma diŋ ya uzi, a mbo gá maŋgaɗam Nil se ɗeŋgo.»
8 Musa ma ne Aaron wat ne Faraon diŋ ya zum. Musa tol Bage ɗiŋnedin ne móy ge ne ka̰ nama Faraon ta ma pe. 9 Bage ɗiŋnedin ke dimma ne Musa ne kaɗe go. Móy ma ge ne zok ma zi ma, ge ne suwal diŋ ma, ge ne ful zi ma, a su uzi mwaɗak. 10 A kote nama digi pil ne pil ma, suwal hat huri bir.
11 Swaga ge Faraon ne kwa go swaga iyalla ne na ta ɗe, gwan togre na dulwak, gwan za̰ nama to, dimma ne Bage ɗiŋnedin ne jya̰ go.
Kaŋ ŋgayya ge ataa: Susu-ɗaal
12 Bage ɗiŋnedin jan Musa go: «Jya̰ Aaron go na he na calaŋ, iyal suwar lugɗum, suwar lugɗum saŋge susu-ɗaal, suwal Masar go mwaɗak.» 13 A ke go no me, Aaron her na calaŋ, iyal suwar lugɗum, na sḛ saŋge susu-ɗaal naa dasana ma ne kavaar ma ta. Go no suwar lugɗum ge ne suwal Masar go ma mwaɗak a saŋge susu-ɗaal. 14 Mbole ma kugi ta ne bama kaŋ mbuɗiya ma ndwara kan susu-ɗaal ya se me, a day to. Amma susu-ɗaal ma ka mbwatɗa naa dasana ma ne kavaar ma ta. 15 Mbole ma jan Faraon go: «Kaŋ mbe ge ne ke no, a pool ge Dok ne ne.» Amma Faraon togre na dulwak, gwan za̰ Musa ma ne Aaron to, dimma ne Bage ɗiŋnedin ne jya̰ go.
Kaŋ ŋgayya ge anda: Far ma
16 Bage ɗiŋnedin jan Musa go: «Ɗage cya̰wak vḛ mbo mḛ da̰re Faraon swaga ge na sḛ ne ɗage mbo maŋgaɗam wak ya go, jya̰ na go: Bage ɗiŋnedin jan go: Ya̰ mbi ɓase ma mbo ke mbi temel mo̰r. 17 Kadɗa mo ya̰ mbi ɓase ma mborra to, mbi mbo kan far ya aŋ ne mo naa ga̰l ge temel ma, ne mo ɓase ma, ne yàl ge mo ne ma ta pet. Yàl ge Masar ma ne ma, mbo kat wiya ne far ma, a mbo ŋguy suwal mwaɗak. 18 Dam mbe no go, mbi mbo mbege suwal Gochen uzi cat, na ge mbi naa ma ne na diŋ, far mbo kat na go to bat, go no, mo mbo kwa go, mbi Bage ɗiŋnedin, mbi ya suwal mbe go. 19 Mbi mbo e kaŋ ŋgayya ge zurra ne, mbi ɓase ma ne mo ɓase ma buwal zi. Kaŋ ŋgayya mbe no, ke kwap.»
20 Bage ɗiŋnedin ke go no. Far ma wat Faraon diŋ, na naa ga̰l ge temel ma diŋ, suwal Masar go mwaɗak, far ma ŋguy suwal mwaɗak.
21 Faraon tol Musa ma ne Aaron, jan nama go: «Mbo me mbo ke tuwaleya hon aŋ Dok, amma ke me na suwal diŋ.» 22 Musa jan na go: «I ne pool ke go to, ago i tuwaleya ge i ne ke na hon Bage ɗiŋnedin Dok ge i ne, a kaŋ seŋgre kakatak ne Masar ma ta, kadɗa i ke na ya ge Masar ma ndwara go, ne jo̰, a kaŋ seŋgre kakatak ne nama ta ɗe, a ma̰ hat mbal i ne njal uzi. 23 I ke dam ataa kereya babur pul go, i ba mbo ke tuwaleya hon Bage ɗiŋnedin Dok ge i ne, dimma ne na sḛ ne jya̰ i go.» 24 Faraon jan go: «Mbi da pool ya̰ aŋ mbo ke tuwaleya hon Bage ɗiŋnedin Dok ge aŋ ne ge babur pul ya, amma mbo me kaal ndit to, kaɗe me ne mbi pe.» 25 Musa jan na go: «Swaga watɗa ne mo diŋ mbo zum no go ɗe, mbi ma̰ kaɗe Bage ɗiŋnedin. Kwap far ma ma̰ abe ta ne aŋ, ne mo naa ga̰l ge temel ma, ne mo ɓase ma ta uzi. Amma na kaage Faraon gwan lase i to, na gwan tele ɓase ma be mbo ke tuwaleya hon Bage ɗiŋnedin to me.» 26 Musa wat ne Faraon diŋ ya zum, kaɗe Bage ɗiŋnedin. 27 Bage ɗiŋnedin ke dimma ne Musa ne jya̰ go. Far ma abe ta ne Faraon ma ne na naa ga̰l ge temel ma, ne na ɓase ma ta uzi, ko ɗu puy gwan gá to. 28 Faraon gwan togre na dulwak ndaar ndiŋ ndiŋ, amma ya̰ ɓase ma mborra to.