संसारीा क मित्रता
4
1 तमे मंझे लड़ाई होर झगड़ कंदा क आउए ? कैहे त्याह हे सुख-बिलसा क नांई ज़ोहे थारे अंगा में लड़दा- भीड़दा ? 2 तमे लालसा डांहदा, होर तमा भेटदा नांई, एतकि तणी तमे हत्या करदा । तमे डाह(दुश्मनी) करदा, होर किछे प्राप्त नांई करी पाउंदे ; तेवा तमे लड़ा होर झगड़दा ? तमा एत की तंणी नांइ भेटदा किबेकी तमे मांगदा । 3 तमे मांगदा होर भेटत नांई, एताकि तणी कि बुरी इच्छा क माँगा, तकि आपणे भोग बिलसा में उड़ाए । 4 हे ब्यभिचारणीयो, कैहे तमे नांई ज़ाणदी संसारीा क मित्रता करणी दईबा क बैरे करना साह ? पर ज़ोहे कोई संसरा र मित्रे हुणा चाहंदा, सह आपण आप वै दईबा रे बइरी बणदा । 5 कैहे तमे यह समझदा कि पबित्र शास्त्र थोगे बोलदा, “ ज़ोहे आत्मा तेउ हामे मितारे बसाई दी साह, कैहे सह एढ़ी लालसा करे जासका प्रतिफल डाह(दुश्मनी) हो " ? 6 सह त होर भी अनुग्रहा दिंदा ; एउ करणे यह लिखुदा साहा, “ दईब घमण्डी रा बिरोध करदा, पर दीना पेंदे अनुग्रह करदा ।” 7 एताकि तणी दईबा रे अधीन होआ, होर शैतान रा सामना करा, तेवा तेउ तमे सेटा क ठुरना । 8 दईबा नेड नांहा तेवा तेउ भी तमा नेढ इंहणा । हे पपियों, आपणे हाथ शुद्ध्ध करा; होर हे दुई मना आले लोको, आपणे आपा बे पबित्रे करा । 9 दुखी हो, होर शोक(दुःख) करे होर लेरे । थारी हासी शोक में होर थारे आनन्द उदासी में बदल़े । 10 प्रभु रे सामने दीन बणा तेवा तेउ तमे मुंडेा रे ताज बणउंणे ।भाई पेंदे दोष लउंण
11 हे भाइयो, एकु दूज री बदनमी नांई करे । ज़ोह आपण भाई री बदनमी करे या भाई पेंदे दोष लउंद, सह व्यवस्था री बदनमी करे होर व्यवस्था पेंदे दोष लउंद, तेवा तूहे व्यवस्था पेंदे चलण आल़अ नांई पर तेउ पेंदे हाकिम ठेहरु । 12 व्यवस्था दिणे आल़अ होर हाकिम एक ही साहा, ज़ोहे बच़ऊण होर नाश करने में सामर्थ साहा । परे तूहे कुण साह, ज़ोहे आपण पड़ोसी पेंदे दोष लाउंदा ?
घमण्डा रे बिरुद्ध चतौनी
13 तमे ज़ोह यह बोला, “ आज यह काला हामे कासु होरी नगरा में नांही करे एक साल बताऊणी, होर व्यपार करी करे फायदा कमउणा ।” 14 पर यह नांई ज़णद कि शुई कैहे हुणा । शुण त लआ, थारा जीबन साहा ही कैह ? तमे त जाह रे बराबर साह, ज़ोह थोड़ी देरी तणी हेरदा होर तेहुकी गोझदा । 15 एता का ईलाबा तमे कैहे करू लोढी, “ अगर प्रभु चाहे तेवा हामें जिउंदे रंहणे, होर यह सह त्या काम भी करणे ।” 16 पर एब तमे आपण डींग(झूठी गला)मारने पेंदे घमण्ड करे; एढा सब घमण्ड बूरा हुन्दा। 17 एताकि तणी ज़ोहे कोई भलाई करणा ज़ाणदा होर नांई करदअ, त्याहवै यह पाप साहा ।