इब्रानियों 8

यीशु म्हारअ महायाजक

1 एबा ज़ोह गला हामे बोलदे लागे दे साहा तया मेंज़ा का सभी का बड़ेी गल यह साहा कि म्हारअ एढअ महायाजक साहा, ज़ोह सरगे महामहिमन् रे सिंहासना रे धुरा फेरा बे बेठअ द साहा, 2 होर पबित्र जागहा होर तेऊ सच्चे तांबू र सेबक होऊ ज़ोह कोही मणशे नांई तिही पर दईब खढ़अ करू । 3 किबेकि हर एक महायाजक भेंट होर बलिदान चढ़ाउणे बे ठहराउंदा, एउ साबे जरूरी साहा कि एउ याजका सेटा भी कुछ चढ़ाउणे बे हो । 4 अगर सह पृथ्बी पैंदे हूँदअ तेबा कधी याजक नांई हूँदअ तिही एतकि तणी कि व्यवस्था रे साबे भेंटा चढ़ाउणा आल़े त साहा । 5 तया सरगा री बस्तु रे प्रतिरूपा होर प्रतिबिम्बा री सेबा करा ; जेढ़े जेबा मूसा तांबू बणाउंदा तिही, तेबा तेऊ यह चताबनी भेटी ,“ हेर ज़ोह नमूना ताह बे पहाड़ा में रिहाऊ दा, तेऊ रे साबे सब कुछ बणाए ।” 6 पर तेऊ याजका का बढ़ी करे सेबा यीशु मसीहा भेटी किबेकि सह होर भी उतमे बाचा रा मध्यस्थ ठहरू ज़ोह होर उतमे प्रतिज्ञा रे साहा रे बान्हीं दी साहा । 7 किबेकि अगर सह पहिली बाचा निर्दोष हूँदी, तेबा दूजी बे मोका नांई लोढ़दे। 8 पर सह तया पैंदे दोष लाई करे बोला ,“ दईब बोला, हेरा तिही तया ध्याड़े ईंहंदा कि हाँऊं इस्राएला रे घराने संघा, होर यहूदा रे घराने संघा नउंईं वाचा बानणी। 9 यह तेसा बाचा रे बराबर नांई हूँणी ,ज़ोह माँईं त्याह ह रे दादू बाबे संघा तेऊ टाइमे बान्हीं दी तिही, जेबा हाँऊं तया र हाथ ढाकी करे तया मिस्रा देशा का काढ़ी आणी ; किबेकि तया मेरी बाचा में स्थिर नांई रही, एतकि तणी माँईं तया री सुधि नांई लई तिही दईब यहे बोला । 10 भी दईब बोला, ज़ोह वाचा हाँऊं तया ध्याड़ी बाद इस्राएला रे घराने संघा बानणी, सह यह साहा कि मांह आपणी व्यवस्था तया रे मना में पाउणी, होर सह तया रे ह्रदय में लिखणी तिही होर मांह तया र दईब ठहरना होर तया मेरे लोका ठहरने । 11 होर हर एक आपणे देशा आल़े बे होर आपणे भाई बे यह शिक्षा नांई दींणी, कि तूह दईब पछेण, किबेकि होछे का बड़ेे तणी सभी हाँऊं ज़ाणनअं 12 किबेकि हाँऊं तया रे अधर्मा रे बारे में दयाबन्त हूँणअं ,होर तया रे पाप भी याद नांई करणे ।” 13 नउंईं बाचा री स्थापना का तेऊ पहिली वाचा पुराणी ठहराई, होर ज़ोह बस्तु पुराणी होर जीर्ण हुँदा तेसका मिटना (खत्म हूँणा)जरूरी साहा ।