प्रार्थना करणा रे मतलब
3
1 लास्ट में ,हे भाइयो, म्हारी तणी भी प्रार्थना करे करा ,कि प्रभु रे वचन छेकअ फैले, होर महिमा पाए , जेड़ा तमा में होऊ । 2 होर हामे डींगे होर दुष्ट मणशा का बची रहा किबेकि हर एकी में बुशाह नांईं आंधा । 3 पर प्रभु सचअ* साह; तेऊ तमे मजबूती संघे स्थिर करणे : होर तेऊ का सुरक्षित डाहंणे । 4 हामा प्रभु में तमा पेंदे बुशाह साहा, कि ज़ोह-ज़ोह आज्ञा हामे तमा वै दिंदा, त्याह तमे मना ,होर मनदे भी रहंणा । 5 दईबा रे प्रेम होर मसीह रे धीराजा री होर प्रभु थारे मन री अगुआई करे ।कामा करणा रे मतलब
6 हे भाइयो, हामे तमा वै आपणे प्रभु यीशु मसीह रे ना का आज्ञा दिंदा कि तमें हर एक एढ़े भाई का अलग रहा, ज़ोह आलसा में रहंदा , ज़ोह शिक्षा तमे हामा का पाई तेतके साबे नांईं करदअ । 7 किबेकि तमे आपे ही ज़ाणा, कि कासु रीती का म्हारी चाल चली लोढ़ी ; किबेकि हामे तमा मंझे आलसी तरीके संघा नांईं चले । 8 होर कासी री रोटी मुफ्ता में नांईं खाई लोढ़ी; पर मेहनत होर कष्टे संघे राच ध्याड़ काम धन्दा करा तिही, कि तमा मेज़ा का कासी पेंदे भार नांईं हो । 9 एढा नांईं, कि हामा अधिकार नांईं; पर एतकि तणी आपणे आपु बे थारी तणी आदर्श ठहराए ,कि तमे हामा साही चाल चले । 10 होर ज़ेबा हामे तमा सेटा तिही , तेवा भी यह आज्ञा तमा बे दिंदा तिही, अगर कोई काम करणा नांईं चाहे, तेवा खाई भी नांईं पाए । 11 हामें शुणा, कि केतरे लोका तमा बीचे आपसी चाल च़ला होर किछे काम नांईं करदे , पर दूजे रे कामा में हाथ पाऊंदा* । 12 एढे वै हामे प्रभु यीशु मसीहा में आज्ञा दिंदा होर समझाउंदा , कि चुप चाप काम करी करे आपणी ही रोटी खाए करे । 13 होर तमें , हे भाइयो भलाई करणे का पीछे नांईं हटे । 14 अगर कुण एसा म्हारी पत्री री गला नांईं शुणे, तेवा तेऊ पेंदे नज़र डाहा ;होर तेऊ री संगत नांईं करे, ज़ासु का तेऊ शर्म होए । 15 तेवा भी तेऊ दुश्मन नांईं समझा पर भाई मना ।
लास्ट नमस्कार