व्यवहारिक निर्देश
4
1 एतकि तणी हे मेरे भाइयो, ज़ासु में मेरा जी लागी रहंदा, ज़ोह मेरे आनन्द होर मुकुट साहा , हे मेरे भाइयो, प्रभु में एउ साबे स्थिर रहा । 2 हाँऊं युओदिया भी समझा होर सुन्तुखे भी , कि त्याह प्रभु में एक मन रहे । 3 हे सच्चे सहकर्मियों , हाँऊं ताह का भी बिनती करा ,कि तुह त्याह बेटढ़ी री सहायता कर, कि त्याहे माँईं संघे सुसमाचार फलाउणे में , क्लेमेंस होर मेरे होरी सहकर्मी समेत परिश्रम करू, ज़ासके ना जीबना री कताबा में लिखी दे साहा । 4 प्रभु में सदा आनन्दित रहू ; हाँऊं भी बोला ,आनन्दित रहा । 5 थारी कोमलता मणशा पेंदे प्रगट हो । प्रभु नेढ साहा । 6 कासी भी गला री चिन्ता नांईं करे ;पर हर एक गला में थारे निवेदन, प्राथना होर बिनती रे दुआरा धन्याबादे संघे दईबा रे सामने हज़ार करे । 7 तेवा दईबा री शान्ति ,ज़ोह सारी समझा का बिलकुल पोरही साहा, थारे ह्रदय होर थारे बचारा वै मसीहे यीशु में सुरक्षित रहणी । 8 एतकि तणी हे भाइयो ,ज़ोह- ज़ोह गला सच साहा, होर ज़ोह -ज़ोह गला आदरा लायक साहा ,होर ज़ोह- ज़ोह गला ठीक साहा, होर ज़ोह- ज़ोह गला पबित्र साहा, होर ज़ोह -ज़ोह गला सुहाबनी (शोभली) साहा, होर ज़ोह- ज़ोह गला मनभाबी साहा ,निदान, ज़ोह-ज़ोह भी सद्गुण होर प्रशंसा री गला साहा ,त्याह पेंदे ध्यान लाए करे । 9 ज़ोह गला तमे मांह का सीखी ,होर ग्रहण करी होर शुणी , होर हामें हेरी , त्याह ही रा पालन करे करा ,तेवा दईब ज़ोह शान्ति का सुता तमे संघे रहंणा ।दाना वै धन्यावाद
10 हाँऊं प्रभु में आनन्दित साहा कि एबा एतरी दिहाड़ी बाद थारी चिन्ता मेरे बिषय में भी जगृत होई ; किबेकि तमा पहिले का भी एतका बिचार तिही, पर तमा मोका नांईं भेटा । 11 यह नांईं कि हाँऊं आपणी घटी (कमी) रे कारण यह बोला ; किबेकि माँईं यह सिखु दा साहा कि ज़ासु दशा में साहा ; तेथी में सन्तोष (संतुष्टि) करू । 12 हाँऊं दीन हूँणा भी ज़ाणा होर बढणा भी ज़ाणा ; हर एक गला में होर सब दशा में मांह तृप्त हूँणा, भोछे रहंणा, होर बढ़ना घटणा सिखुदा साहा । 13 ज़ोह मांह वै सामर्थ्य दिंदा तेता में हाँऊं सब कुछ करी सका । 14 तेवा भी तमा का भला करू कि मेरे क्लेशा में सहभागी होई । 15 हे फिलिप्पियो, तमे आपे भी ज़ाणा कि सुसमाचारा रे शुरू में ज़ेबा हाँऊं मकिदुनिया का कुच करू (च़लू)तेवा तमे छाड़ी होर कासु कलीसिया लेण-देणा रे बिषय में मेरी सहायता नांईं करी । 16 एउ साबे ज़ेबा हाँऊं थिस्सलुनिक में तिही तेवा भी तमे मेरी घटी पूरी करणे वै एक बारी कैह पर दुई बारी कुछ भेजू तिही । 17 यह नांईं कि हाँऊं दान चाहंदा पर हाँऊं एढअ फल़ चाहंदा ज़ोह थारे फायदे री तणी बढ़दअ रहे । 18 मांह सेटा सब कुछ साहा , पर बहुतयाता का भी साहा ; ज़ोह बस्तु (चीज़) तमे इपफ्रुदितुसा रे हाथा का भेजी तिही त्याह पाई करे हाँऊं तृप्त होऊ, सह त सुखदायक सुगन्ध होर ग्रहण करणे योग्य बलिदान साहा, ज़ोह दईबा बे भाउंदा । 19 मेरअ दईब भी आपणे तेऊ धना रे साबे ज़ोह महिमा सहित मसीहा में साहा थारी हर एक कमी पूरी करणी । 20 म्हारे दईबा होर बापू री महिमा युगानुयुग हूँदी रहे । आमीन ।
लास्ट नमस्कार (नमस्ते)