गलातियों 6

एकी दूज री सहायता करे

1 हे भाइयो, अगर कासु मणशा पापा में ढाके , तेवा तमे ज़ोह आत्मिक साहा,नम्रता संघे एढे सभाल़ा ,होर आपणी भी देख रेख करा , कि तमे भी परीक्षा में नांईं पड़े । 2 तमें एकी दूज रे बोझ चुआका *, होर एउ साबे तमें मसीह री व्यवस्था पूरी करा । 3 किबेकि अगर किछ नांईं हूँणे पेंदे भी कुण आपणे आपा वै कुछ समझा , तेवा आपणे आपा वै धोखा दिंदा । 4 पर हर एक आपणे कामा जाँचे *, होर तेबा दूजे रे बिषय में नांईं पर आपणे ही बिषय में तेऊ घमण्ड करने रा मोका भटणा । 5 किबेकि हर एक मणशा आपणा ही बोझ चुआकणा । 6 ज़ोह बचना री शिक्षा पाउंदा,त्या सब शोभली बस्तु में सिखाऊण आल़े भगी करे । 7 धोखा नांईं खाए ,दईबा ठठे में नांईं करे ,किबेकि मणश ज़ोह कुछ बउंदा, तेथी काटा । 8 किबेकि ज़ोह आपणे शरीर वै बउंदा , सह शरीरा रे दुआरा बिनाशा री काटणी ; होर ज़ोह आत्मा वै बउंदा , तेऊ आत्मा का अनन्त जीवना री फसल कटणी । 9 हामे भले कामा करने में हिम्मत नांईं छाड़े , किबेकि अगर हामे ढीले नांईं हो , तेवा ठीक टाइमा पेंदे फसल कटणी । 10 एतकि तणी ज़खे तणी मोका भेटे हामें सभी संघा भलाई करे ; ख़ास कर बिश्बासी भाई संघा ।

लास्ट चताबनी होर अभिबादन

11 हेरा ,माँईं केड़े बडे- बडे अक्षरे संघे तमा वै आपणे हाथे संघे लिखुदा साहा । 12 जेतरे लोका शारीरिक दिखाबा चाहंदा त्या थारे खतना कराऊणे री तणी दबाब दिंदा ,सीधी एतकि तणी कि त्या मसीहा रे क्रुसा रे कारण सताई नांई लोढ़ी । 13 किबेकि खतने कराउण आल़े आपु व्यवस्था में नांईं चलदे ,पर थारा खतना एतकि तणी कराऊणा चाहंदा ,कि थारी शरीरिक दशा पेंदे घमण्ड करे । 14 पर एडा नांईं होऊ लोढ़ी कि हाँऊं कासु होरी गला रा घमण्ड करे , सीधी म्हारअ दईब यीशु मसीह रे क्रूसा का ज़ासके दुआरा संसारी मेरी नजरा में होर संसारी री नजरा में क्रूसा पेंदे चड़ाऊ । 15 किबेकि नाह खतना होर नाह खतना रहित साहा ,पर नउंईं दृष्टि साहा । 16 जेतरे एउ नियम में चलले त्याह पेंदे ,होर दईबा रे इस्राएला पेंदे , शान्ति होर दया हूँदी रहे । 17 जेंहा बे कोई मांह दुःख नांईं दे , किबेकि हाँऊं यीशु वै दुःख नांईं दे किबेकि हाँऊं यीशु रे दाग आपणे शरीरा में नि करे फिरा । 18 हे मेरे भाइयो ,हे मेरे यीशु मसीहा रा अनुग्रह थारी आत्मा संघे रहे ।आमीन ।