गलातियों 4

1 हाँऊं यह बोला , कि (शोहरू) बारिस जेब्रे तणी बालक साहा, सभी चीज़ा र मालक साहा, तेवा भी तेऊ होर दासा किछे फर्क नांईं । 2 पर बापू रे ठहराई दे टईमें तणी रक्षका होर भण्डारी रे बशे रहंदा । 3 तेडा हामे भी , जेब्रे बालक तिही तेवा संसारी री आदि शिक्षा रे बशा में होई करे दास बणी तिही। 4 पर जेब्रे टाईम पूरा होऊ,* तेवा दईबे आपणअं शोहरु भजू ज़ोह कुआरी बेटढ़ी का जन्मु ,होर व्यवस्था रे अधीन पैदा होऊ । 5 ताकि ज़ोह व्यवस्था रे अधीना मोल करी करे छुड़ाये ,होर हामा लेपालका हूँणे रा पद भेटे । 6 होर तमे ज़ोह शोहरू साहा , एतकि तणी दईबे आपणे शोहरू री आत्मा* ज़ोह हे अब्बा , हे बापू बोली करे पुकारा ,' म्हारे दिला में भेजू । 7 तेवा तूह एबा दास नांई, पर शोहरु साहा; होर ज़ेबा शोहरु होऊ ,तेवा दईब रे दुआरा बारिस भी होऊ ।

गलातियो रे वारे में पौलुसा री चिन्ता

8 पहिले तमे दईबा नांईं ज़ाणी करे तमे दईबा रे दास तिही ज़ोह स्वभावा का दईबा नांईं , 9 पर एवा ज़ोह तमे दईब पछेंणू ,पर दईबे तमे पछेणी , तेवा त्याह कमजोर होर निक्कमी आदि-शिक्षा री गला पेंदा फेरा बे किवै फिरा , ज़ासके तमे भी दास हूँणे चाहंदा । 10 तमे ध्याड़ी होर महीने होर नियत टईम होर बर्षा मना । 11 हाँऊं थारे बिषय में डरा , कंईं एडा न होए, ज़ोह मेहनत माँईं थारी तणी करी दी साहा सह थोग नांईं होए । 12 हे भाईयो हाँऊं तमा का बिनती करा , तमे मांह बराबर होआ : किबेकि हाँऊं भी तमा बराबर होऊ ; तमे मेरा किछे नांई बगाढू 13 पर तमे ज़ाणा की पहिले माँईं तमा वै शरीरा री कमजोरी रे कारण तमा बे सुसमाचार शुणाऊ । 14 होर तमे मेरी शरीरिक दशा ज़ोह थारी परीक्षा रा कारण तिही , तुच्छ नांईं ज़ाणा ; नाह तेऊ घृणा करी ; होर दईबा रे दूते हाँऊं मसीहा रे बराबर ग्रहण करू। 15 तेवा थारी ख़ुशी मनणी कंईं नाठी? हाँऊं थारअ गुआही साहा अगर होई सका की तमे आपणी आछी भी काड़ी करे मांह बे दिंदे । 16 तेवा कैह तमे संघा सच बोलणे रे कारणा का हाँऊं थारअ शत्रु बणू ? 17 त्या तमा दोस्त तो बणाऊणा तो चाहंदा ,पर भले मना का नांई ;पर तमा मांह अलग करना चाहंदा ,कि तमे त्याही दोस्त बणाए । 18 पर उत्साही हूँणा ठीक साहा , कि भली गला में हर टाईम दोस्त बणाउणे री कोशिश लोढ़ी करी, नाह सीधी तेऊ टईमें ,कि जेब्रे हाँऊं तमे संघा रहंदा। 19 हे मेरे बालको , जेब्रे तणी मसीह रे रूप नांई बणे , तेवरे तणी हाँऊं थारी तणी सुईंदी बेटढ़ी साही दाह जीरा । 20 इच्छा तो यह हूँदा ,कि एबा तमा सेटा इच्छी करे होर ही प्रकारा का बोलू ,किबेकि थारे बारे में हाँऊं विकल साहा ।

सारा होर हाजिरा रा उदारहण

21 तमे ज़ोह व्यवस्था रे अधीन हूँणे चाहंदा , मांह बे बोला , कैह तमे व्यवस्था री नांई शुणदे ? 22 यह लिखू दा साहा की अब्राहमा रे दुई शोहरु होई; एक दासी का होर एक स्बतन्त्र बेटढ़ी का होऊ । 23 पर ज़ोह दासी का होऊ ,सह शरीरिक रीति का जन्मु, होर ज़ोह दूजी बेटढ़ी का होऊ, सह प्रतिज्ञा रे साबे जन्मु । 24 याह गला में दृष्टांन्त (कथअ) साहा , यह बेटढ़ी मना दुई बाचा साहा, एक त सिने पहाड़ा री ज़ासु का दास ही पैदा हूँदा ,सह हाजिरा साहा । 25 होर हाजिरा मना अरबा र सिने पहाड़ साहा ,होर आधुनिक यरूशलेम तेऊ रे तुल्य साहा, किबेकि सह आपणे बालका संघे दासत्बा में साहा । 26 पर स्बर्गा री यरूशलेमा स्बतन्त्र साहा , होर सह म्हारी आमा साहा । 27 किबेकि लिखू दा साहा ," हे बाँझ (बांडही), तू ज़ोह नांई ज़ाणदी आनन्द कर , सुईंदी मज़ा कर ; तू ज़ासु बे दाह नांई उठती ; गला खोली करे जय- जयकर कर , किबेकि त्यागी दुही रे शोहरू सुहागणी रे शोहरू का भी ज्यादा साहा । 28 हे भाईयो, हामे इसहाका रे बराबर प्रतिज्ञा रे शोहरू साहा । 29 होर जेड़ा तेऊ टईमें शरीरा रे साबे जन्मु द आत्मा रे साबे जन्मी दे सताउंदा तिही, तेडा ही एबा भी हूँदा । 30 पर पबित्र शस्त्र कैह बोला ? दासी होर तेऊ रे शोहरू काड़े किबेकि दासी रे शोहरु स्बतन्त्र बेटढ़ी रे शोहरु संघे उतरा अधिकारी नांई हूँणअं । 31 तेवा हे भाईयो हामे दासी रे नांई पर स्बतन्त्र बेटढ़ी रे शोहरू साहा ।