नउंईं बाचा रे सेबक
3
1 कैह हामे आपणी बड़ाई करदे लागे ? या हामा होरा लोका सामने सिफरिशा री पत्री तमा सेटा आँणनी या तमा का माँगणी ? 2 म्हारी पत्री तमे ही साहा, ज़ोह म्हारे ह्र्दय में लिखी दी साहा होर तेसा सब मणश पछेंणा होर पढ़ा | 3 यह प्रकट साहा कि तमे मसीहा री पत्री साहा, ज़ोह हामे सेबका रे बराबर लिखी, होर ज़ोह स्याही संघा नांईं पर जिउंदे दईबा री आत्मा का , पाथरा री तकती में नांईं ,पर ह्रदय री मास रूपी तकती में लिखी |* 4 हामे मसीहा रे दुआरा दईबा में एढा ही भरोसा(बुशाह) डाहंदा | 5 यह नांईं कि हामे आपणे आपु का एता योग्य साहा कि आपणी तरफा का कासी गला रा बिचार करी सके, पर म्हारी योग्यता दईबा री तरफा का साहा, 6 जूणी हामा बे नउंईं बाचा * रे सेबक हूँणे रे योग्य भी करी, शब्दा रे सेबक नांईं पर आत्मा रे; किबेकि शब्द मारा, पर आत्मा ज़ल़ाउंदा | 7 अगर मऊती री सह बाचा ज़ासके अक्षर पाथरा में कोती दे, अखे तणी तेजोमय होई कि मूसा रे मुँहा पैंदा रे तेजा रे कारण ज़ोह घटता भी तिही, इस्राएली तेऊरे मुँहा में नजर नांईं करी सकते तिही,* 8 तेबा आत्मा री बाचा होर भी तेजोमय किबे नांईं हूँणी ? 9 किबे कि ज़ेबा दोषी ठहराउंण आल़ी बाचा तेजोमय तिही , तेबा धर्मी ठहराउंण आल़ी बाचा होर भी तेजोमय किबे नांईं हूँणी ? 10 होर ज़ोह तेजोमय तिही, सह भी तेऊ तेजा रे कारण ज़ोह तेऊ का बढ़ी करे तेजोमय तिही, किछे तेजोमय नांईं (होऊ) ठहरू | 11 किबेकि सह ज़ोह घटतअ रहंदा तिही तेजोमय तिही, तेबा ज़ोह स्थिर रहलअ होर सह भी तेजोमय किबे नांईं हूँणअं ? 12 एतकि एढी आशा डाही करे हियाबे संघा बोला, 13 होर मुसा रे बराबर नांईं, जूणी आपणे मुँहा में पर्दा * पाऊ ताकि इस्राएली तेऊ घटण आल़े तेजा रे अन्ता नांईं हेरे | 14 पर तया मतिमन्द होई, किबे कि आझ तणी पुराणे नियमा पढ़दे टाइमें तया रे ह्रदय में सहे पर्दा पढी रहंदा; पर सह मसीहा में उठा | 15 होर आझ तणी ज़ेबा मूसा री कताबा पढ़ा, तेबा तया रे ह्रदय में पर्दा पढी रहंदा | 16 पर ज़ेबा कधु तया रा ह्रदय दईबा री तरफा बे फिरला, तेबा सह पर्दा उठणा |* 17 दईब त आत्मा साहा : होर ज़धे कंधे दईबा रा आत्मा साहा तखे आज़ादी साहा | 18 पर ज़ेबा हामे सभी रे उघाड़े(खुले) चेहरे का दईबा रा प्रताप एउ साबे प्रकट हुँदा, ज़ासु साबे शीशे में, त दईबा रे दुआरा ज़ोह आत्मा साहा , हामे तेसी तेजस्बी रूपा में अंश -अंश करी करे बदल़दे रहंदा |