2 Corinthians
कुरिन्थियों रे ना पौलुस प्रेरिता री दूजी पत्री
अभिबादन
1
1 पौलुसा री ओरा का ज़ोह दईबा री इच्छा का मसीह यीशु र प्रेरित साहा ,होर भाई तीमुथियुसा री ओरा का दईबा तेसा कलीसिया रे ना तिही ज़ोह कुरिन्थुसा में साहा ,होर सारे अखाया रे सब पबित्र लोका रे ना : 2 म्हारे बापू दईब होर प्रभु यीशु मसीहा री तरफा का तमा अनुग्रह होर शान्ति भेटती रहे |दईबा रा धन्यबाद करणा
3 म्हारे दईब यीशु मसीह रे दईब होर बापू रा धन्यबाद हो , ज़ोह दया र बापू होर सभी प्रकारा री शान्ति र दईब साहा | 4 सह म्हारे सभी क्लेशा में शान्ति दिंदा ; ताकि हामे तेसा शान्ति रे कारण ज़ोह दईब हामा बे दिंदा , त्याह भी शान्ति देई सके ज़ोह कासु प्रकारा रे क्लेशा में हो | 5 किबेकि जेढ़ा हामे मसीहा रे दुखा में हामें ज्यादा सहभागी हुँदा, तेढ़े ही हमें शान्ति में भी मसीहा रे दुआरा ज्यादा सहभागी हुँदा | 6 अगर हामें क्लेश पाउंदे, तेबा यह थारी शान्ति होर उदारा री तणी साहा ; होर अगर शान्ति पाउंदा, तेबा यह थारी शान्ति बे साहा ; ज़ासके प्रभाबा का तमे धीरजे संघा तया क्लेशा सेहंदा, ज़ासु हामे भी सेहंदा | 7 म्हारी आशा थारे बारे में दृढ साहा ; किबेकि हामे ज़ाणा कि तमे जेढ़े म्हारे दुखा में तिही तेढ़े ही महारी शान्ति में भी सहभागी साहा | 8 हे भाईओ, हामें नांईं चाँहंदे कि तमे म्हारे तेऊ कलेशा का अनजान रहा ज़ोह आसिया में हामा पैंदे पढू ; हामे एढ़े भारी बोझा में दबी तिही, ज़ोह म्हारी सामर्थ्य का बागे तिही, अखे तणी कि हामे आपणे जीबना का भी हाथ धोई छेकु तिही |* 9 पर हामे आपणे मना में समझू तिही, कि हामा पैंदे मऊती री आज्ञा होई छेकी, ताकि हामे आपणा भरोसा (बुशाह) नांईं ड़ाहे पर दईबा रा ज़ोह मुएँ दे जिउंदे करा | 10 तेहु हामे मऊती रे एक एढ़े बड़े संकटा का बचाई, होर बचाउंणे ; होर तेऊ में म्हारी यह आशा साहा कि तेऊ जेंहा बे भी बचाउंदे रहंणा | 11 होर तमा भी मिली करे बिनती रे दुआरा म्हारी साहायता करनी कि ज़ोह अनुग्रह हामा बहू रे दुआरा का भेटा , तेहू रे कारण बहू लोका म्हारी तरफा का धन्यबाद करे |
पौलुसा री यात्रा -स्कीमा में बदलाब
12 किबेकि हामे आपणे बिबेका* री एसा गुआही पैंदे घमण्ड करा, कि जकता में होर बिशेष करी करे तमा मंझे ,म्हारा चरित्र दईबा रे योग्य एड़ी पबित्र होर सचाई सहित तिही, ज़ोह शरीरिक ज्ञाना का नांईं पर दईबा रे अनुग्रहा रे संघा तिही | 13 हामे तमा बे होर किछे नांईं लिखते , सीधी यह ज़ोह तमे पढ़ा या मना, भी, होर मांह आशा साहा कि लास्टा तणी भी मनदे रहंणा | 14 जेढा तमा मेंज़ा का केतरे* मनु कि हामे थारे घमंडा रा कारण साहा, तेढ़े ही तमे भी दईब यीशु री ध्याड़ी हामा बे घमंडा रा कारण रहंणा | 15 एउ भरोसे संघा हाँऊं चाँहंदा तिही कि पहिले तमा सेटा बे इछु कि तमा एक होर दान भेटे ; 16 होर तमा सेटा का होई करे मकिदुनियाँ बे नाहूँ, होर तेहुकी भी मकिदुनिया का भी तमा सेटा बे इछु ; होर तमे यहूदिया फेरा बे कुछ दूर तणी पजेरे |* 17 एतकि तणी माँईं यह ज़ोह ईच्छा करी तिही तेबा माँईं कैह चंचलता रिहाई ? या ज़ोह करणा चाँहंदा कैह शरीरा रे साबे करणा चाँहंदा कि हाँऊं गला में 'उओह ,उओह 'भी करू; होर 'नांईं ,नांईं भी करू ? 18 दईब सचअ* गुआही साहा कि म्हारे तेऊ बचना में ज़ोह तमा बे बोलू तिही ' उओह' होर 'नांईं' दुहे नांईं हूँदे | 19 किबेकि दईबा र शोहरू यीशु मसीह ज़ासका म्हारे दुआरा अर्थात मेरे होर सिलबानुस होर तीमुथियुस रे दुआरा तमा मंझे प्रचार होऊ,* तेता में उओह होर नांईं दुहे नांईं आन्धे, पर तेता में उओह होर उओह ही होई | 20 किबेकि दईबा री जेतरी भी प्रतिज्ञा साहा, तया सभे तेथी में 'उओहे ' संघा साहा | एतकि तणी तेऊ रे दुआरा आमीन भी होई कि म्हारे दुआरा दईबा री महिमा हो | 21 होर ज़ोह हामे तमे संघा मसीहा में दृढ करा, होर ज़ासु में म्हारा अभिषेक करू सहे दईब साहा | 22 जूणी हामा पैंदे छाप भी करी दी साहा होर बयाना में आत्मा म्हारे मना में दिंनी | 23 हाँऊं दईबा गुआह* करी करे बोला कि हाँऊं एब्रे तणी कुरिन्थुसा एब्रे तणी एतकि तणी नांईं आउअ, कि मांह तमा पैंदे तरस ईंहंदा तिही | 24 यह नांईं कि हामे बुशाह रे बारे में तमा पैंदे दईबता ज़ताउंणा चाँहंदा ; पर थारी ख़ुशी में साहायक साहा किबेकि तमे बुशाह का ही स्थिर रहंदा |