रोमियों 13

शासना रे धीन

1 हर एक मणश प्रधान अधिकारी रे अधीन रहे , किबेकि कोहे अधिकार एडा नांई आंधा ज़ोह दईबा मेंज़ा का नांई आंधतिही होर ज़ोह अधिकार साहा, त्याह सारीे दईबे ठहराई दे साहा । 2 तेवा ज़ोह मणश अधिकार रा बिरोध करदा , सह दईबा री बिधि रा बिरोध करदा , होर बिरोधा करणा आल़े सजा भेटणी। 3 किबेकि हाकिम रामबड़ेे काम रे नांई आंद , पर बुरे कामा री डरा री बजहा साहा तेवा अगर तूह हाकिम का दूर रहणा चाहन्दा , तेवा तूह रामबडा काम कर *होर काम संघे तेरी सराहणा हुणी। 4 किबेकि सह तेरी भलाई री तणी दईबा रअ सेबक साहा , पर अगर तूह बुराई करलअ , तेवा तूह डरे ;किबेकि सह तलवार थोगे नांई आनध , होर दईबा रे सेबक साहा की सह दईबा रोषा संघे बुरे कामा करणे आल़े वै दंड देई सका । 5 तेवा अधीन रहणा न सिर्फ डर साहा , पर बिवेक भी यहे गुआही दिंदा । 6 तेवा करा भी किबेकि शासना करणा आल़े दईबा रे सेबक साहा , होर सदा एउ काम में लागेदे हुंदा । 7 तेवा हर एकी रा हक चूकाऊणा; जासु कर लोडतिही तेऊ वे कर दे, तेवा जासू चुगी लोड़ी तेउ वै चुगी दे , जासु का डरी लोडतिही तेऊ का डरे, होर जासका आदर करू लोढ़ी, तेउ रा आदर करे ।

पड़ोसी संघा प्रेम

8 आपणा प्रेम छाडी करे , होर कासी गला में कासी रे कर्जदार नांई होये ,किबेकि ज़ोह दूजे का प्रेम डाहनदा , तेउये व्यवस्था पूरी करीदी साहा । 9 किबेकि यह साहा ब्याभिचार नांई करणा , हत्या नांई करणतिही चोरी नांई करणी, लालच नांई करणा होर यह सभी गला छाडी करे होर ज़ोह भी आज्ञा साहा त्याह सभी गला रा मतलब यह साहा की आपणे पड़ोसी संघे आपु साही प्रेम डाहणा । 10 प्रेम पड़ोसी री किछे बुराई नांई करदे , तेवा प्रेम ढाहणा व्यवस्था पूरी करणी साहा । 11 होर टाईम पछेणी करे एेडा ही करे , तेवा की एवा थारे निंजा का उठणे रा टाईम आऊआ किबेकि जासू टाईमे हामे विशवाश करू , तेउ टाईमा री तुलना का एवा हमारा उदार नेड साहा । 12 राच बीती आई होर धियाड़ होई आई एवा हामे ज़ोह बुरे काम साहा त्याह छड़णे । 13 जेडे धियाड़े में , तेडे हामे भी सीधी चाला में चली लोडी, की बुरी गला में , होर ना पीणा में, होर नाह ब्यभिचार , होर नाह लुचपन , होर नाह झगड़े होर लालच में । 14 पर दईबा यीशु मसीहा री गला पेंदे चला , होर शरीरा री इच्छा पूरी करणे में टाईम नांई ला ।