यरूशलेमा में यीशु रा सुआगत
(मती 21:1-11; लुका 19:28-28; युहन्ना 12:12-19)
11
1 जेबा त्याह हे यरूशलेमा नेड , जेतून पहाडा रे वैत्फगे होर वैतनिया रे ग्राये पूज़े तेवा तेउ आपणे चेले मेंज़ा का दुई चेले ऐडा बोली करे भेजी , 2 “पारले ग्रा वै नाशा , होर तखे पूज़दे एक गादही रअ शोहरु , जासू में एवरे तणी कोहे ऩंइ वैठदअ , तमा बहानुदअ भेटणअ । तेउ खोली आणे । 3 होर जेबा तमा कुण पूछे , “यह किबे लाऊ खोलणअ ?” तमे ऐडा बोले , “यह दईबा लोड़ी , होर तेउ यह छेकअ इंदा वै भेज़णअ ।” 4 त्याह ये तखे नांही करे तेउकी दुआरा बागे गाधे रअ शोहरु भेटअ , त्याह तेउ खोलदे लागे । 5 त्याह में ज़ोह तखे खड़े , ऐखा त्याह ह वे बोलदे लागे , “यह कैह लाऊ करणा , गधी रअ शोहरु किबे लाऊ खोलण?” 6 जेडा यीशु त्याह वै बोलू , तेढा त्याह ये त्याह वै बोलू !तेवा त्याह ये लोके त्याह वे नाहंणे दिना । 7 त्याह ये गधे रअ शोहरु यीशु सेटा आणी करे तेउ पेंदे झिकड़े पाई होर सह तेउ पेंदे वैठअ । 8 तेवा बऊ लोका आपणे झिकड़े वाता छीआइ होर खेचा मेंज़ा काा पाच़ा आल़ी शाणी वाता छीआइ 9 ज़ोह तेउ ज़ेह होर पीछे हाढदे लागे , त्याह ज़ोरे-ज़ोरे बोलदे लागेदे , “होशाना ! धन्य साहा सह ज़ोह दईबा रे ना का इन्दा । 10 हमारे बाबा दाउदा रा राज्य ईहंदा लागदा साहा ! धन्य साहा सरगे होशाना 11 सह यरूशलेमा पूजी करे मान्दिरा वै नाठअ च़हू तरफा हेरी करे बारह चेले संघे वैतनियहे वै नाठअ किबेकी निहारा आउआ , होई ।बिन फल़ा र अंजीरा र बूटअ
(मती 21 :18 , 19 )
12 दूजे धिहाड़े त्याह बैतनियाह का निकते तेवा त्याह भोछ लागी । 13 सह दुराका अंजीरा रअ बूटअ हेरी करे नेड की खाणेब कुछ भैटे पर तखे तेउ पाचा रे सिबाए किछ नांई भेटा किबेकी तेऊरा एबरे फलअ दिणो रा समय नांई आऊया , 14 यह हेरी करे तेऊए बूटे वै बोलू , “एताा बाद तेरे फलअ कासी कधी नांई खाणअ।” होर तेऊरे चेले शुणदे लागदे , ।
देहुरे का व्यापारी बागे काडणे
(मती 21:12-17; लुका 19:45-48; युहन्ना 2:13-22)
15 तेउकी त्याह यरुशलेमा वै आए , होर सह देहुरे वै नाठअ ; होर तखे जूणा बेच़णा होर लोउणा आल़े , त्याह तखा का बागे काढी , होर ढब्वै बदल़णा आल़े रे मांजे शोटी होर कबूतरा बेच़णा आल़े री खुर्शी भी शोटी पाई , 16 होर देहुरे का किछे भी समान आणणे होर निणे नांई दिना । 17 होर समझाई करे त्याह वै बोलू , “क़ैह ऐडा नांई आन्दा लिखुदा कि मेरअ घरअ सभी जाति आले बै प्रार्थना रअ घरअ हूणअ? पर तमे यह चोरा रअ घर बनाऊदअ साहा । 18 जेबा यह गलाअ प्रधाने , याजके होर शाशत्ररीये शुणी तेवा त्याह तियु मारने रे बारे में सोचते लागे । किबेकी सवै लोका तयूरी गला शुणी करे हेरान , किबेकी त्याह तेउ का डरी , 19 तेउकी जेबा राच होई , तेवा त्याह नगरा का बागे निकते ।
शुके अंजिरे रे बूटे का शिक्षा
(मती 21 :20 -22 )
20 तेउकी त्याह हे दोत्ती तेवा तेसी नाहदे लागेदे , तेवा त्याह ह सह अंजीरा रअ बूटअ पट्ठी शुकदअ भालू । 21 पतरसा सह गला याद आई , होर तेउए तेउ वै बोलू , “हे गुरु , ऐउ अंजीरा रे वूटे भाल़ जासु वै तांइए श्राप दिना , सह शुकअ 22 यीशु तेउ वै उतारे दिना , “ दईबा पेंदे वुशाह डाहे । 23 हाँउ तमा का सच़ी बोलदा कि जूण ऐसा ज़ोह ता वै ऐडा बोले , “तू ढुल़ होर समुन्द्रे पडअ " होर आपणे मने शक नांई डाहे , होर वुशाअ डाहे की ज़ेडा बोलदा सह तेउ वै तेडहा हूणा । 24 ऐतकी तणी हांऊं तमा वै बोला की ज़ो कुछ तमे प्रार्थना करी करे मांगले बुशह डाहे की तमा सह भेटणा । 25 ज़ेव्रे तमे खड़े होई करे प्रार्थना करे , ज़ेबा थारे मने कासु वै रोष साहा तेउ वै माफ़ करे किबेकी थारे पिता ज़ोहे सरगे साहा थारअ पराध क्षमा करे 26 होर जेबा तमा दूज रे पाप माफ़ क्षमा नांई करल़े तेवा थारे सुअरगा रे पिता भी माफ़ नांई करणा ।”
यीशु रे आधिकरा पेंदे प्रश्न
(मती 21:23-27; लुका 20:1-8)
27 त्याह तेउकी यरूशलेमा वै आए , जेब्रे सह देहुरे ओरी पोरी हाणदअ लागदअ , री तेवा प्रधान याजक होर शशत्री होर बजुर्गा तेउ सेटा वै आए होर पुछदे लागे , 28 “तूह एउ कामा कासु अधिकारा संघे करदा ? होर यह अधिकार ताबे कुणी दिनादा की तूह ऐउ काम करे ?” 29 यीशु त्याह वै बोलू , “मांह भी तमा का एक गला पुछणी , मांह वै उतारे देया हाँऊं भी खोजल़अ की यह काम कासु अधिकार संघे करा । 30 युहन्ना रा बपतिस्मा कैह दईबा रा , कि मणशा रा , मांह वै उतर देया ।” 31 तेवा त्याह आपु मांजे गला करदे लागे कि हामा ऐडा बोले दईबा रअ धिकार पेंदे , तेउ बोल़णा , “तमा तेउ पेंदे बुशाह किवै नांई करू ?” 32 होर जेवा हामे ऐडा बोले की मणश का , तेवा ठीगा हामा पेंदे रोष उठणा , किबेकी सभा े जाणा की युहन्ना सची भविष्यबक्ता साहा 33 तेउकी त्याह ये यीशु वै उतर दिना , “हामे नांई जांद ।”यीशु त्याह ह का बोलू , “माँह भी नांई खोजण की ऐउ कामा करणे रा अधिकार माहे वै कूणी दिना ।”