దేవుణు కొడొఃర్ వందిఙ్ వెహ్సినిక
3
1 సుడ్ఃదు,
మాటు దేవుణు కొడొఃర్ ఇజి కూకె ఆని వందిఙ్,
బుబ్బ ఆతి దేవుణు మఙి ఎసొనొ ప్రేమిస్తాన్.
మాటు దేవుణు కొడొఃర్‍నె.
గాని లోకమ్దికార్,
బుబ్బ ఆతి దేవుణుదిఙ్ నెస్ఎర్. అందెఙె మాటు దేవుణు కొడొఃర్ ఇజి యా లోకమ్దికార్a సెస్‍ఎర్.
2 నాను ప్రేమిసినికిదెరా,
యెలు మాటు దేవుణు కొడొఃర్ ఆత మనాట్.
మాటు ఇనిక ఆనాట్‍లెనొ దేవుణు మఙి ఇంక తోరిస్తెఙ్ సిల్లె.
గాని యేసు క్రీస్తు మర్‍జి వానివలె,
వాండ్రు ఎనెట్ మహాండ్రొ అయా లెకెండ్‍నె వన్నిఙ్ సూణాట్‍లె. అందెఙె వాండ్రు మంజిని లెకెండ్ మాటుబ మంజినాట్‍లె ఇజి నెస్నాట్.
3 యా సఙతిఙ వందిఙ్ ఆస ఆజి ఎద్రు సుడ్ఃజినికాన్ ఎయెన్‍బ,
పాపమ్‍కు డిఃసి సీజి వన్ని లెకెండ్ బత్కిదెఙ్‍వలె. ఎందన్నిఙ్ ఇహిఙ క్రీస్తు పాపం సిల్లికాన్.
4 పాపమ్‍కు కిజినె మంజినికాన్ ఎయెన్‍బ దేవుణు ఆడ్రెఙ్ నెక్సి పొక్సినాన్.
పాపం ఇహిఙ దేవుణు ఆడ్రెఙ్ నెక్సి పొక్నికాదె పాపం.
5 మా పాపమ్‍కు లాగ్జి పొక్తెఙ్ ఇజినె క్రీస్తు యా లోకమ్‍దు వాతాన్.
యాక మీరు నెస్నిదెర్.
అక్కదె ఆఎద్, వన్ని లొఇ ఇని పాపమ్‍బ సిల్లెద్ ఇజి మీరు నెస్నిదెర్.
6 అందెఙె యేసు క్రీస్తు వెట కూడిఃతి మనికాన్ ఎయెన్‍బ పాపం కిజినె మన్ఎన్.
పాపం కిజినె మంజినికాన్ ఎయెన్‍బ క్రీస్తుఙ్ సుడ్ఃదెఙ్ సిల్లె. వాండ్రు ఎయెన్ ఇజి అర్దం కిదెఙ్ అట్ఎన్.
7 నాను ప్రేమిసిని బయిరండె,
ఎయెర్‍బ మిఙి మోసెం కిఎండ సుడ్ఃదు.
యేసు క్రీస్తు నీతి నిజాయితి మనికాన్.
అయా లెకెండ్‍నె నీతి నిజాయితిదాన్ కిజినికాన్ ఎయెన్‍బ,
దేవుణు ఎద్రు నీతి నిజాయితి మనికాన్.
8 పాపం కిజినె మంజినికాన్ ఎయెన్‍బ సయ్‍తానుఙ్ సెందితికాన్.
ఎందన్నిఙ్ ఇహిఙ యా లోకం పుట్ఎండ ముఙహాన్ అసి సయ్‍తాను పాపం కిజినె వాజినాన్.
అందెఙె సయ్‍తాను కిజిని విజు పణిఙ్ నాసనం కిదెఙ్‍నె, దేవుణు మరిసి ఆతి యేసు క్రీస్తు యా లోకమ్‍దు వాతాన్.
9 దేవుణు కొడొఃర్ ఆతికార్ ఎయెర్‍బ పాపం కిజినె మన్ఎర్.
ఎందన్నిఙ్ ఇహిఙ వరి లొఇ దేవుణు గుణమ్‍కు మంజినె.
వారు దేవుణు కొడొఃర్ ఆన మంజినార్.
అందెఙె పాపం కిజినె మండ్రెఙ్ అట్ఎర్.
10 దేవుణు ఎద్రు సరి ఆతికెఙ్ కిఇకార్ ఎయెర్‍బ దేవుణు కొడొఃర్ ఆఎర్.
క్రీస్తుఙ్ నమితి వరి దాద తంబెర్‍ఙ ప్రేమిస్‍ఇకార్ ఎయెర్‍బ దేవుణు కొడొఃర్ ఆఎర్.
దిన్నితానె దేవుణు కొడొఃర్ ఎయెర్? సయ్‍తాను కొడొఃర్ ఎయెర్? ఇజి మాటు నెస్తెఙ్ ఆనాద్.
ఒరెన్ మరి ఒరెన్ వన్నిఙ్ ప్రేమిసి మండ్రెఙ్ ఇజి వెహ్సినిక
11 అహిఙ,
మాటు ఒరెన్ మరి ఒరెన్ వన్నిఙ్ ప్రేమిసి మండ్రెఙ్ ఇజి,
మీరు నమితి బాణిఙ్ అసి వెహి మనిదెర్.
12 అందెఙె మాటు కయినుb లెకెండ్ మండ్రెఙ్ ఆఎద్.
వాండ్రు సయ్‍తానుఙ్ సెందితికాన్ ఆతాండ్రె వన్ని తంబెర్‍సిఙ్ సప్తాన్.
ఎందన్నిఙ్ సప్తాన్?
వన్ని పణిఙ్ సెఇ బుద్దిదికెఙ్, వన్ని తంబెర్‍సి పణిఙ్ దేవుణు ఎద్రు నీతి నిజాయితిదికెఙ్ ఇజినె గదె.
13 అహిఙ నా తంబెర్‍ఙాండె,
యా లోకమ్దికార్ మిఙి పడిఃఎండ దూసలాడిఃతిఙ మీరు బమ్మ ఆమాట్.
14 మాటు క్రీస్తుఙ్ నమితి మా దాద తంబెర్‍ఙ ప్రేమిసినాట్.
అందెఙె మాటు సావుదాన్ గెల్సి,
ఎల్లకాలం బత్కు సీని వన్నిబాన్ వాత మనాట్ ఇజి నెస్నాట్. క్రీస్తుఙ్ నమితి మా దాద తంబెర్‍ఙ ప్రేమిసిఇకాన్ సాతి వన్ని లెకెండ్‍నె మనాన్.
15 ఎయెన్‍బ క్రీస్తుఙ్ నమితి వన్ని దాద తంబెర్‍ఙ పడిఃఎండ దుసలాడిఃతిఙ,
వాండ్రు లోకుదిఙ్ సప్తి లెకెండ్‍నె.
లోకుదిఙ్ సప్ని వన్నిఙ్ ఎల్లకాలం బత్కిని బత్కు మన్ఎద్ ఇజి మీరు నెస్నిదెర్.
16 యేసు క్రీస్తు మా వందిఙ్ వన్ని పాణం సితాన్.
అందెఙె ప్రేమ ఇహిఙ ఇనికదొ దన్నితాన్ మాటు నెస్తెఙ్ ఆనాద్.
అయావజనె మాటుబ క్రీస్తుఙ్ నమితి మా దాద తంబెర్‍ఙ వందిఙ్ మా పాణం సీదెఙ్‍వలె.
17 అహిఙ ఎయెన్‍బ యా లోకమ్‍దు ఆస్తి కల్గిజి మంజి,
క్రీస్తుఙ్ నమితి సిల్లి సాతి వన్ని దాద తంబెరిఙ్ సుడ్ఃజి కనికారం తోరిస్ఎండ మహిఙ, వన్నిబాన్ దేవుణు ప్రేమ ఎనెట్ మంజినాద్?
18 నాను ప్రేమిసిని బయిరండె,
మాటు వహి మాటెఙ్‍దాన్ ఆఎద్.
మా పణిఙాణిఙ్ మా ప్రేమ నిజమాతిక ఇజి తోరిస్తెఙ్.
19 అయావజ ప్రేమిస్తిఙ,
మాటు నిజమాతి దేవుణుదిఙ్ సెందితికాట్ ఇజి నెసినాట్. మరి మాటు అయా లెకెండ్ ప్రేమిస్తిఙ మా మన్సు దేవుణు ఎద్రు నిపాతిదాన్ మంజినాద్.
20 అందెఙె మా మన్సు తపు కితాద్ ఇజి వెహ్సి మహిఙ,
నిపాతిదాన్ మండ్రెఙ్ అట్‍నాట్.
ఎందన్నిఙ్ ఇహిఙ దేవుణు మా మన్సుదిఙ్ ఇంక పెరికాన్. దేవుణు నెస్ఇకెఙ్ ఇనికెఙ్‍బ సిలు.
21 నాను ప్రేమిసినికిదెరా,
మాటు తపు కిఎట్ ఇజి మా మన్సు వెహ్సి మహిఙ, దేవుణు ఎద్రు దయ్‍రమ్‍దాన్ మనికాట్ ఆనాట్.
22 మాటు దేవుణుబాన్ ఇనిక లొస్తిఙ్‍బ అక్క మఙి సీనాన్.
ఎందన్నిఙ్ ఇహిఙ దేవుణు వెహ్తికెఙ్ మాటు కిజినాట్.
దేవుణుదిఙ్ ఇస్టం ఆతి వజ బత్కిజినాట్.
23 దేవుణు రూలు వెహ్సినిక ఇనిక ఇహిఙ,
దేవుణు మరిసి ఆతి యేసు క్రీస్తు పేరుదాన్ నమిజి,
క్రీస్తు ఆడ్ర సితి లెకెండ్ ఒరెన్ మరి ఒరెన్ వన్నిఙ్ ప్రేమిస్తెఙ్‍వలె.
24 దేవుణు సితి రూలుఙ్ లొఙిజి నడిఃనికాన్ దేవుణు వెట కూడ్ఃజి మంజినాన్.
దేవుణుబ వన్నివెట కూడ్ఃజి మంజినాన్.
దేవుణు మా వెట మనాన్ ఇజి ఎనెట్ నెస్నాట్ ఇహిఙ,
దేవుణు ఆత్మ మా లొఇ మనిఙ్ మాటు నెస్నాట్.