నిజమాతి మాటెఙ్ నెస్పిస్అ ఇజి వెహ్సినిక
2
1 ఓ తీతు,
దేవుణుదిఙ్ నమితి వరిఙ్ ఎస్తివలెబ నిజమాతి దేవుణు మాటదిఙ్ కూడిఃతి మని సఙతిఙ్ నెస్పిస్అ.
2 ముకెలం నీను డొక్రరిఙ్ నెస్పిస్అ.
వారు సోస్‍ఎండ,
అణసె ఆజి విజెరె వరిఙ్ గవ్‍రం సీని లెకెండ్ మంజి,
నిజమాతి మాటెఙ నెగ్రెండ నమిజి,
మహి వరిఙ్ ప్రేమిసి,
ఓరిసి మండ్రెఙ్ వలె.
3 అయావజనె డొక్రికాఙ్‍బ నెస్పిస్అ.
అవిక్ సొండిఙ్ వర్గిఎండ,
సోస్‍ఎండ,
దేవుణు ముస్కు బక్తిదాన్ మంజి,
మహి వన్కాఙ్ నెగ్గి సఙతిఙ్ నెస్పిస్తెఙ్ తయార్ ఆజి మండ్రెఙ్ వలె.
4-5 అయావలె అవిక్ బోదెకాఙ్ నెస్పిస్తెఙ్ ఆనాద్.
అవిక్ ఇనికెఙ్ నెస్పిస్తెఙ్ ఇహిఙ బోదెక్ వన్కా మాసిరిఙ్ లొఙిజి,
అణసె ఆజి,
ఇని తపు సిల్లెండ వన్కా ఇండ్రొణి పణిఙ్ సుడ్ఃజి వన్కా మాసిరిఙ్‍ని కొడొఃరిఙ్ ప్రేమిసి కనికారమ్‍దాన్ మండ్రెఙ్ వలె ఇజి నెస్పిస్అ.
అయావలెనె ఎయెన్‍బ దేవుణు మాటదిఙ్ దూసిస్తెఙ్ అట్‍ఎండ మంజినాన్.
6 ఆహె దఙ్‍డెఃఙ్ వరి మన్సు అణిసె ఆజి మండ్రెఙ్ వరిఙ్ ఉసార్ కిబిస్అ.
7-8 నీను విజు వన్కా లొఇ నెగ్గికెఙ్ కిజి వరి ఎద్రు ఉండ్రి గుర్తు వజ మన్‍అ.
నీను వరిఙ్ నెస్పిస్నివలె,
నీ మాట నిజమాతి దేవుణు మాటదిఙ్ కూడిఃతి మని వజ,
మహి వరి గవ్‍రమ్‍దిఙ్ తగ్ని వజ,
ఇని నేరం మోపె ఆఎండ మంజిని వజ నెస్పిస్అ.
ఎందన్నిఙ్ ఇహిఙ మఙి పడిఃఇకార్ మా ముస్కు సెఇ మాటెఙ్ వర్గిదెఙ్ అట్‍ఎండ సిగ్గు ఆజి మండ్రెఙ్ నీను అయావజ మన్‍అ.
9-10 అయావజనె నీను వెట్టి పణి కిని వరిఙ్‍బ నెస్పిస్అ.
వారు డొఙ కిఎండ,
విజు దన్ని లొఇ వరి ఎజుమానిరిఙ్ లొఙిజి వరిఙ్ మర్‍జి వెహ్ఎండ,
వారు ఇస్టం ఆని వజ కిజి,
పూర్తి నమకం మని వరి వజ నెస్పిస్అ.
ఎందన్నిఙ్ ఇహిఙ వారు కిజిని నెగ్గి పణిదాన్ మఙి రక్సిస్ని దేవుణు వందిఙ్ మని బోదదిఙ్ మహికార్ గవ్‍రం సీదెఙ్ వారు అయా లెకెండ్ మండ్రెఙ్ వలె.
11 వన్ని దయదర్మమ్‍దాన్ మఙి రక్సిస్ని దేవుణు లోకుర్ విజెరిఙ్ రక్సిస్తెఙ్ యేసు క్రీస్తుఙ్ యా లోకమ్‍దు పోక్తాన్.
12 వాండ్రు మఙి నెస్పిసినికెఙ్ ఇనికెఙ్ ఇహిఙ,
దేవుణుదిఙ్ నమిఎండ అడ్డు ఆజినికెఙ్ డిఃసి సీజి,
యా లోకమ్‍ది ఆసెఙ డిఃసి సీజి,
అణసె ఆజి నాయమ్‍దాన్ దేవుణు ఎద్రు బక్తిదాన్ యా తరమ్‍దు మండ్రెఙ్ ఇజి నెస్పిసినాన్.
13 అందెఙె మఙి సర్ద కిబిస్ని అయా దినం వందిఙ్ మాటు ఆసదాన్ ఎద్రు సుడ్ఃజినాట్.
అయా దినమ్‍దు మఙి రక్సిస్ని మా పెరి దేవుణు ఆతి యేసు క్రీస్తు గొప్ప పెరి జాయ్‍దాన్ నండొ సోకుదాన్ వానార్‍లె.
14 మా విజు రకమ్‍ది సెఇ వన్కాణిఙ్ డిఃబిస్ని వందిఙ్ సాదెఙ్,
యేసు క్రీస్తు వన్నిఙ్ వాండ్రె ఒపజెపె ఆతాన్.
మాటు ఆసదాన్ నెగ్గి పణిఙ్ కిని వందిఙ్,
వాండ్రు మఙి సుబ్బరం కిజి వన్ని సొంత లోకుర్ వజ తయార్ కిని వందిఙె ఒపజెపె ఆతాన్.
15 నాను యెలు వెహ్తికెఙ్ విజు నమితి వరిఙ్ పూర్తి అతికారమ్‍దాన్ నెస్పిస్అ.
వారు అక్కెఙ్ కిని లెకెండ్ వరిఙ్ పణస్అ.
అక్కెఙ్ కిఇ వరిఙ్ నెగ్రెండ వెహ్సి దిద్దిఅ.
ఎయెర్‍బ ఇజ్రి కణ్కదాన్ సూణి లెకెండ్ మన్‍మ.