తిమోతిఙ్ పోక్సినిక
3
1 అందెఙె మాపు మిఙి సుడ్ఃదెఙ్ ఇజి మహి ఆసదిఙ్ బరిస్తెఙ్ అట్ఎండ ఆతాపె ఏతెన్సు పట్నమ్‌దు మంజినిక నెగ్గెద్ ఇజి ఒడిఃబితాప్.
2 యేసు క్రీస్తు ముస్కు మీరు ఇట్తి మని నమకమ్‍దాన్ కద్లిఎండ,
సత్తు మని వరి లెకెండ్ కిజి,
దయ్‍రమ్‍దాన్ మీరు ముఙల నడిఃని వందిఙ్ మా వెట కూడ్ఃజి యేసు క్రీస్తు వందిఙ్ మని నెగ్గి కబ్రు సాటిసి దేవుణు పణి కిజిని మా తంబెరి ఆతి తిమోతిఙ్ మీ డగ్రు పోక్తాప్.
3 మీ లొఇ ఎయెన్‍బ యా కస్టమ్‍కాఙ్ సుడ్ఃజి వెన్కా మర్‍జి సొన్ఎండ మంజిని వందిఙ్ మీరు యేసు క్రీస్తు ముస్కు ఇట్తి నమకమ్‍దు గట్టిఙ నిల్సి మంజిని వందిఙ్ దయ్‍రం వెహ్తెఙ్ వన్నిఙ్ మీ డగ్రు పోక్తాప్.
ఎందన్నిఙ్ ఇహిఙ మాటు యా కస్టమ్‍కు ఓరిస్తెఙ్ ఇజి దేవుణు తీర్‍మానం కిజి ఇట్‍త మనాన్ ఇజి మీరు నెస్నిదెర్.
4 నిజమె,
మాపు మీ వెట మహి వలెనె మఙి కస్టమ్‍కు వానె ఇజి మిఙి వెహ్తాప్ గదె.
మాపు వెహ్తి లెకెండ్‍నె జర్గిజినె, అక్కెఙ్ మీరు నెస్నిదెర్.
5 మాపు మీ నడిఃమి కితి పణి పణిదిఙ్ రెఎండ ఆతాద్‍సు,
సయ్‍తాన్ మిఙిబ సెఇ మన్సు సీజి సెఇ పణిఙ్ కిబిస్తెఙ్ ఆస పుటిస్తాన్‍సు ఇజి నాను నండొ తియెల్ ఆత.
అందెఙె అయాకెఙ్ విజు ఎత్తు కితానె బరిస్తెఙ్ అట్ఎండ ఆజి మీ నమకం వందిఙ్ నెస్తెఙ్ ఇజి తిమోతిఙ్ మీ డగ్రు పోక్త.
తిమోతి తతి కబ్రు వందిఙ్ వెహ్సినిక
6 గాని తిమోతి మీ బణిఙ్ యెలె మా డగ్రు వాత మనాన్.
మీరు మా వందిఙ్ ఎస్తివలెబ సర్దదాన్ ఎత్తు కిజినిదెర్‍గె.
దేవుణు ముస్కు మిఙి మని నమకం వందిఙ్,
మీ ప్రేమ వందిఙ్ మఙి నెగ్గి కబ్రు తతాన్.
మీరు మా వందిఙ్ ఎస్తివలెబ సర్దదాన్ ఎత్తు కిజినిదెర్‍గె.
మాపు మిఙి సుడ్ఃదెఙ్ ఇజి ఆస ఆజిని లెకెండ్‍నె మీరుబ మఙి సుడ్ఃదెఙ్ ఇజి ఆస ఆజినిదెర్ ఇజి వెహ్త మనాన్.
7 అందెఙె ఓ దాదారండె,
బీబీకండె మీ నమకం వందిఙ్ మాపు వెహాపె మఙి వాతి కస్టమ్‍కు,
బాదెఙ్ విజు పోసి ఉసార్ ఆతాప్.
8 ఎందన్నిఙ్ ఇహిఙ మీరు ప్రబు లొఇ నమకం ఇడ్‍జి గట్టిఙ నిహి మనిదెర్.
అందెఙె యెలు మాపు మీ నమకం సుడ్ఃజి నిజం బత్కుజినాప్.
9 మీరు మఙి సర్ద కిబిసిని దన్ని వందిఙ్ ఆజి,
మీ వందిఙ్ దేవుణుదిఙ్ ఎసొ వందనమ్‍కు వెహ్తిఙ సరి ఆనాద్? ఎసొ వందనమ్‍కు వెహ్తిఙ్‍బ అక్క తక్కునె ఆజినాద్.
10 మాపు మిఙి మరి ఉండ్రి సుట్టు సుడ్ఃజి, దేవుణు ముస్కు మిఙి మని నమకమ్‍దు తక్కు మనిక పూర్తి కిదెఙ్ ఇజి, రెయు పొగొల్ దేవుణు బాన్ పార్దన కిజి నండొ బత్తిమాల్‍జినాప్.
11 మా బుబ్బ ఆతి దేవుణుని మా ప్రబు ఆతి యేసు మీ డగ్రు వాదెఙ్ ఇనికబ అడ్డు కిఎండ మంజిని లెకెండ్ సాయం కిపిర్.
12 మాపు మిఙి ఎలాగ ప్రేమిసినాపొ,
అయావజనె మీ లొఇబ ప్రేమ నిండ్రిజి ఒరెన్ వెట ఒరెన్ ప్రేమిస్తెఙ్, మీ లొఇ మని ప్రేమ పొగ్‌జి సొన్ని లెకెండ్ మా ప్రబు సాయం కిపిన్.
13 మా ప్రబు ఆతి యేసు నీతి నిజాయితిదాన్ మని వరివెట వానివలె,
మా బుబ్బ ఆతి దేవుణు ఎద్రు మీరు ఇని నింద సిల్లెండ నీతి నిజాయితిదాన్ మండ్రెఙ్ మీ మన్సుదు దేవుణు సత్తు సిపిన్.