1
1 బుబ్బ ఆతి దేవుణుదిఙ్‍ని మా ప్రబు ఆతి యేసు క్రీస్తుఙ్ సెందితి తెస్సలొనిక పట్నమ్‌దు మని దేవుణు సఙమ్‍దిఙ్ పవులు ఇని నానుని,
సిల్వను,
తిమోతి రాసిని ఉత్రం.
బుబ్బ ఆతి దేవుణుని మఙి రక్సిస్ని యేసు క్రీస్తు దయ దర్మం మీరు నిపాతిదాన్ మండ్రెఙ్ సాయం కిపిద్.
2 ఎస్తివలెబ మాపు పార్దన కిని వలె,
మీ విజిదెరె వందిఙ్ గుర్తు కిజి మాపు దేవుణుదిఙ్ వందనమ్‍కు వెహ్సినాప్.
3 మిఙి దేవుణు ముస్కు నమకమ్‍దాన్ మీరు కితి పణిఙ వందిఙ్,
మహి వరి వందిఙ్ ప్రేమదాన్ కస్టబడిఃజిని దన్ని వందిఙ్,
ప్రబు ఆతి యేసు క్రీస్తు ముస్కు మని ఆసదాన్ ఎద్రు సుడ్ఃజి డిస్ఎండ ఓరిసిని ఓర్పు వందిఙ్ మాపు ఎస్తివలెబ మా బుబ్బ ఆతి దేవుణు ముఙల ఎత్తు కిజినాప్.
4 ఓ దాదారండె,
బీబీకండె, దేవుణు మిఙి ప్రేమిస్తాండ్రె ఎర్లిస్త మనాన్ ఇజి మాపు నెస్నాప్.
5 ఎందన్నిఙ్ ఇహిఙ మాపు వెహ్తి నెగ్గి కబ్రు వహి మాటెఙణిఙ్ ఆఎద్.
దేవుణు సత్తుదాన్,
దేవుణు ఆత్మ సాయమ్‍దాన్,
మా మన్సు పూర్తి నమకమ్‍దాన్ మిఙి నెస్పిస్తాప్.
మీ నెగ్రెండ మండ్రెఙ్ ఇజి మీ నడిఃమి మాపు ఎలాగ బత్కితాప్ ఇజి మీరు నెస్నిదెర్.
6 మిఙి నండొ కస్టమ్‍కు వాతె.
అహిఙ్‍బా దేవుణు ఆత్మ సీజిని సర్దదాన్‍నె మీరు యా నెగ్గి కబ్రు డగ్రు కితిదెరె మఙిని మా ప్రబుఙ్ పోలిజి నడిఃదెఙ్ మొదొల్‍స్తిదెర్.
7 అందెఙె మీరు నమితికార్ ఎలాగ మండ్రెఙ్ ఇజి తోరిస్ని వందిఙ్ మాసిదోనియ, అకయ ప్రాంతమ్‍కాఙ్ నమితి మని విజెరిఙ్ ఉండ్రి గుర్తు వజ మనిదెర్.
8 ఎందన్నిఙ్ ఇహిఙ మీ బాణిఙ్‍నె మాసిదోనియ,
అకయ ప్రాంతమ్‍కాఙ్ నెగ్గి కబ్రు సాటె ఆతాద్.
అక్కదె ఆఎండ దేవుణు ముస్కు మిఙి మని నమకం విజెరి నెస్తార్. దన్ని వందిఙ్ మాపు వెహ్తెఙ్ అవ్‌సరం సిల్లెద్.
9-10 ఎందనిఙ్‌ ఇహిఙ మీరు ఎలాగ మఙి డగ్రు కితిదెరొ,
మీరు మాడిఃసి మహి బొమ్మెఙ డిఃసి సిజి బత్కిజిని నిజమాతి దేవుణుదిఙ్ పొగ్‌డిఃజి మాడిఃస్తెఙ్‌ వన్ని దరిఙ్ మీరు ఎలాగ మహ్తిదెరొ ఇజి మీ వందిఙ్ మాసిదోనియ,
అకయ ప్రాంతమ్‍దికారె సాసెం వెహ్సినార్.
బత్కిజిని నిజమాతి దేవుణు బాణిఙ్ వాజిని కోపమ్‍దాన్ మఙి తప్రిస్ని వన్ని మరిన్ ఆతి యేసుఙ్ సాతివరి బాణిఙ్ నిక్త మనాన్.
వాండ్రు మరి మర్‍జి దేవుణు మంజిని బాడ్డిదాన్ డిగ్‌జి వానాన్‌లె ఇజి వన్ని వందిఙ్ ఆసదాన్ ఎద్రు సుడ్ఃజినిదెర్.