నమితి సెగొండారిఙ్ పవులు వెన్‍బాతి లెకెండ్ వెహ్సినిక
16
1-2 మా బీబి పీబేఙ్ నాను మిఙి నెల్వ కిబిసిన.
అది కెంక్రేయ పట్నమ్‍దు మని దేవుణు సఙమ్‍దు సేవ కిజినాద్.
అది గొప్ప నెగ్గికాద్.
ప్రబుఙ్ సెందితి లోకురిఙ్ డగ్రు కిని వజ దన్నిఙ్‍బ డగ్రు కిదు.
మీ బాణిఙ్ దన్నిఙ్ ఇనికబ అవ్‌సరం మహిఙ అక్క దన్నిఙ్ సీదు.
ఎందన్నిఙ్ ఇహిఙ అది నఙిని నండొండారిఙ్ సాయం కిజి మహాద్.
3 మరి,
యేసు క్రీస్తు వందిఙ్ నా వెట కూడ్ఃజి పణి కితి ప్రిస్కిలెఙ్‍ని దన్ని మాసి అకులెఙ్ నాను వెన్‍బాతి లెకెండ్ వెహ్‍తు.
4 వారు నా వందిఙ్ ఆజి వరి పాణమ్‍కు సీదెఙ్‍బ వెన్కా గుసె ఆఎతార్.
నాను ఒరెనె ఆఎండ,
యూదుర్ ఆఇ దేవుణు సఙమ్‍కాణికార్‍బ,
వారు కితి దన్ని వందిఙ్ ఎసెఙ్‍బ పోస్ఎర్.
మరి,
వరి ఇండ్రొ కూడ్ఃజి వాజిని దేవుణు సఙమ్‍దిఙ్‍బ వెన్‍బాతి లెకెండ్ వెహ్‍తు.
5 నాను ప్రేమిసిని ఎపాయినెటుఙ్‍బ వెన్‍బాతి లెకెండ్ వెహ్‍తు.
వీండ్రె,
ఆసియ రాస్టమ్‍దు తొలిత యేసు క్రీస్తుఙ్ నమితాన్.
6 మరియెఙ్ వెన్‍బాతి లెకెండ్ వెహ్‍తు.
అది మా వందిఙ్ నండొ కస్టబడిఃజి పణి కితాద్.
7 మరి,
ఆంద్రోనికస్,
యూనియెఙ్ వెన్‍బాతి లెకెండ్ వెహ్‍తు.
వారు నా సొంత లోకుర్.
వారు నా వెట జేలిదు మహార్.
వీరు అపొస్తురు లొఇ గొప్ప పేరు మనికార్.
నాను క్రీస్తుఙ్ నమిఇ ముఙల వారు నమితార్.
8 నాను ప్రేమిసిని నా కూడఃఎన్ ఆతి అంప్లియెఙ్ వెన్‍బాతి లెకెండ్ వెహ్‍తు.
వాండ్రు ప్రబు ముస్కు నమకం ఇట్తికాన్.
9 ఊర్బానుఙ్ నాను వెన్‍బాతి లెకెండ్ వెహ్‍తు.
క్రీస్తుఙ్ సేవ కిని వందిఙ్ మా వెట జత్త కూడిఃతాన్.
నాను ప్రేమిసిని నా కూడఃఎన్ ఆతి స్టాకుఙ్‍బ వెన్‍బాతి లెకెండ్ వెహ్‍తు.
10 అపెల్లెకుఙ్ వెన్‍బాతి లెకెండ్ వెహ్‍తు.
వాండ్రు నండొ కస్టమ్‍కు ఓరిస్తాండ్రె క్రీస్తు ముస్కు మని నమకం డిఃస్ఎ ఇజి రుజుప్ కిత మనాన్.
ఆహె అరిస్టొబులు ఇండ్రొణి వరిఙ్ వెన్‍బాతి లెకెండ్ వెహ్‍తు.
11 హెరోదియోఙ్ వెన్‍బాతి లెకెండ్ వెహ్‍తు.
వాండ్రు నా సొంత లోకునె.
నార్కిసు ఇండ్రొణి వరిఙ్ వెన్‍బాతి లెకెండ్ వెహ్‍తు.
వారు ప్రబు ముస్కు నమకం ఇట్త మనార్.
12 త్రుపయ్‍న,
త్రుపొసా ఇని వన్కాఙ్ వెన్‍బాతి లెకెండ్ వెహ్‍తు.
ఇవిక్ ప్రబు వందిఙ్ నండొ ఆసదాన్ కస్టబడిఃతె.
మరి నఙి ఇస్టం ఆతి కూడఃణి పెర్సిసు ఇని దన్నిఙ్‍బ వెన్‍బాతి లెకెండ్ వెహ్‍తు.
ఇదిబ ప్రబు వందిఙ్ నండొ కస్టబడిఃతాద్.
13 రూపసుఙ్‍ని వన్ని అయ్‍సిఙ్‍బ వెన్‍బాతి లెకెండ్ వెహ్‍తు.
ప్రబుఙ్ సేవ కిని దన్ని లొఇ ఒద్దె నమకం ఆతికాన్.
వన్ని అయ్‍సి నఙిబ మరిసి లెకెండ్‍నె సుడ్ఃతాద్.
14 అసుంతక్రితు,
ప్లెగోను,
హెర్మే,
పత్రొబ,
హెర్మా ఇని వరిఙ్‍ని వరివెట మని నమితి తంబెర్‍ఙ విజెరిఙ్ వెన్‍బాతి లెకెండ్ వెహ్‍తు.
15 యూలియెఙ్‍ని పిలొలొగుఙ్,
నేరియెఙ్‍ని వన్ని తఙిసిఙ్ మరి,
ఒలుంపాకుఙ్‍ని వరివెట మని నమితి వరిఙ్ వెన్‍బాతి లెకెండ్ వెహ్‍తు.
16 క్రీస్తు ప్రేమదాన్ ఒరెన్‍దిఙ్ ఒరెన్ మాడిఃసి నొండ్‍జి వెన్‍బాతి లెకెండ్ వెహ్‍తు.
ఆఇ ఆఇ ప్రాంతమ్‍కాఙ్ మని క్రీస్తు ముస్కు నమకం ఇట్తి దేవుణు సఙమ్‍కాణికార్ విజెరె మిఙి వెన్‍బాతి లెకెండ్ వెహ్సినార్.
17 ఓ దాదరండె బీబీకండె,
మీరు నెస్తి మని బోద ఆఎండ,
మరి ఉండ్రి బోద నెస్పిస్ని వరిఙ్ మీరు జాగర్తదాన్ మండ్రు.
వారు మిఙి తపు బోద వెహ్సి,
ఎడః కిజి మీ లొఇ సెగొండారిఙ్ నమకమ్‍దాన్ అర్‍ప్నార్.
నని వరి బాణిఙ్ మీరు దూరం మండ్రెఙ్ ఇజి నాను డట్టం వెహ్సిన.
18 ఎందన్నిఙ్ ఇహిఙ వారు మా ప్రబు ఆతి యేసు క్రీస్తుఙ్ సేవ కిఎర్.
గాని వరి పొట్ట వందిఙ్‍నె వారు సేవ కిజినార్.
వారు నునుఙ్ ననాఙ్ నని తియని మాటెఙ్ వెహ్సి,
అనెం పునెం నెస్ఇ వరిఙ్ మోసెం కినార్.
19 మీరు ప్రబుఙ్ లొఙిజినిదెర్ ఇజి విజెరె నెసినార్.
అందెఙె నాను మీ వందిఙ్ నండొ సర్ద ఆజిన.
గాని నెగ్గి దన్ని వందిఙ్ గేణం మని వరి వజ,
సెఇ దన్ని వందిఙ్ ఇనికబ నెస్ఎండ సమందం సిల్లి వరి వజ మండ్రు.
20 సమాదానమ్‍దాన్ బత్కిదెఙ్ సత్తు సీజిని దేవుణు,
సయ్‍తాన్‍దిఙ్ మీ ముస్కు అతికారం సిఎండ మీ పాదమ్‍క అడ్గి ఇడ్‍జి బేగినె మట్టిస్నాన్‍లె.
మా ప్రబు ఆతి యేసు క్రీస్తు తోరిస్తి కనికారం మీ ముస్కు మనిద్.
21 నా జత్త గొట్టిది తిమోతి మిఙి వెన్‍బాతి లెకెండ్ వెహ్సినాన్.
అయా లెకెండ్‍నె లూకియ,
యాసోను,
సోసిపత్రు ఇనికార్‍బ మిఙి వెన్‍బాతి లెకెండ్ వెహ్సినార్.
వారు మా లోకుర్.
22 పవులు వెహ్సి మహివలె యా ఉత్రం రాస్తి తెర్తియ ఇని నానుబ మిఙి వెన్‍బాతి లెకెండ్ వెహ్సిన.
నానుబ దేవుణుదిఙ్ నమితి లోకు.
23 నఙిని ఇబ్బె మని సఙమ్‍ది విజెరిఙ్ నెగ్రెండ సూణి గాయస్‍బ మిఙి వెన్‍బాతి లెకెండ్ వెహ్సినాన్.
యా పట్నమ్‍దు డబ్బు సఙతిఙ్ విజు సుడెః ఆని ఎరస్తుని తంబెరి ఆతి క్వర్తుబ మిఙి వెన్‍బాతి లెకెండ్ వెహ్సినార్.
24 మా ప్రబు ఆతి యేసు క్రీస్తు కనికారం మిఙి తోడుః మనిద్.
25-27 దేవుణు పొగ్‌డెః ఆపిన్.
యేసు క్రీస్తు వందిఙ్ నాను సాటిసిని నెగ్గి కబ్రు వజ,
మీ నమకమ్‍దిఙ్ గట్టి కిదెఙ్ వాండ్రు గొప్ప సత్తు మనికాన్.
యా నెగ్గి కబ్రు సేన కాలమ్‍దాన్ డాఙిత మహాద్.
గాని,
యెలు దేవుణు ప్రవక్తర్ రాస్తి ఇట్తి మాటదాన్ అయా నెగ్గి కబ్రు వాండ్రు నెస్పిస్తాన్.
విజు జాతిఙణి లోకుర్ యా నెగ్గి కబ్రు నమిజి లొఙిని వందిఙ్ వరిఙ్ అందిస్తెఙ్ ఇజి ఎల్లకాలం మంజిని దేవుణు ఆడ్ర సితాన్.
విజు బుద్ది,
గేణం కల్గితి మని దేవుణు ఒరెండ్రె.
యేసు క్రీస్తు మా వందిఙ్ కితి దన్నితాన్ వాండ్రు ఎల్లకాలం పొగ్‌డెః ఆపిన్.
ఆమెన్.