యోనా మొయ పొట లొఇ కితి పార్దనం
2
1 ఆ మొయ పొట లొఇహాన్ యోనా వన్ని దేవుణు ఆతి యెహోవాదిఙ్ ఈహు పార్దనం కితాన్‍:
2 నాను పర్మదమ్‍దు మహివలె
యెహోవ నిఙి డేడిఃసి పార్దనం కితకక, నఙి మర్‍జి జబాబు సితి.
పాతల లోకమ్‍దాన్a సాయం వందిఙ్ నిఙి బత్తిమాల్‍తిఙ్ నా పార్దనం వెహి.
3 నీను నఙి సమ్‍దరం అడ్గిహి మట్టు బాగమ్‍దు అర్‍ప్తి మని.
ఉల్‍క్కెఙ్ నఙి సుట్టులం తిగితె మనె.
దీడిఃజి వాజిని ఉల్‍క్కెఙ్ నఙి ముడ్ఃక్తె మనె.
4 యెహోవ, నీ డగ్రుహాన్ నాను దూరం ఆత మన.
గాని నీ వందిఙ్ కేట ఆతి గుడిః దరిఙ్
మరి ఉండ్రి సుట్టు సుడ్ఃదెఙ్ అట్‍నాలె ఇజి ఎత్తు కిత.
5 మరి నాను ఇజ్రి పాణం ఆని వజ సమ్‍దరం నఙి తిగ్గిత మనాద్.
ఏరు నఙి సుట్టులం ముడ్ఃక్తె మనె.
సమ్‍దరం అడ్గి మని మొక్కెఙ్ నఙి బుర్ర సుట్టులం సుటిస్తె మనె.
6 సమ్‍దరం అడ్గిహి గొరొకు మట్టు దాక ముడిఃగిత సొహా.
నాను మరి ఎసెఙ్‍బా ముస్కు రెఎండ బూమి గడెఃఙ్ పొక్తి వజ నఙి మూక్తె మనె.
గాని నా దేవుణు ఆతి యెహోవ పాతల లోకమ్‍దాన్ నీను నఙి రక్సిస్తి.
7 నఙి ఇజ్రి పాణం మహివలె యెహోవ నిఙి నాను ఎత్తు కిత.
నీ వందిఙ్ కేట ఆతి గుడిఃదాన్ నాను కితి పార్దనం వెహి.
8 పణిదిఙ్ రఇ దేవుణుకాఙ్ మాడిఃస్నికార్,
దేవుణు వరి ముస్కు తోరిస్ని దయ దర్మం వారు నెక్సి పొక్నార్.
9 గాని నాను నిఙినె పాటెఙ్ పార్‍జి పూజ సీజిన.
నాను మొక్కితి దన్నిఙ్ తప్ఎండ సీన.
యెహోవ నీను ఒరిదె రక్సిస్నికి.
10 నస్తివలె యెహోవ, మొయదిఙ్ ఆడ్ర సిత్తిఙ్, అక్క యోనెఙ్ గట్టు ముస్కు తత కక్తాద్.