దావీదు కీర్తన
యెహోవదిఙ్ పొగ్‌డిఃని కీర్తన
147
1 యెహోవదిఙ్ పొగ్‌డిఃదు!మా దేవుణుదిఙ్ వందనమ్‍కు వెహ్సి పొగ్‌డిఃదెఙ్ ఎసొ నెగెద్
వన్నిఙ్ పొగ్‌డిఃనిక తగ్నికాదె, గొప్ప సర్ద మనికాదె.
2 యెహోవనె, యెరూసలేమ్‍దిఙ్ మరి మర్‍జి తొహిస్నికాన్,
బబులోనుదికార్ కయ్‍ది తొహ్సి ఒతి మహి
ఇస్రాయేలురిఙ్ మర్‍జి కూడుప్సి తసినికాన్ వాండ్రె.
3 నల్‍ఙిజి బాద ఆజిని వరిఙ్ బాగ కినికాన్ వాండ్రె,
మన్సుదు గాయం ఆతి వరిఙ్ తొహ్నికాన్ వాండ్రె.
4 సుక్కెఙ్ ఎసొ మనె ఇనిక వన్నిఙె తెలినాద్,
వాండ్రె విజు సుక్కెఙ పేర్కు ఇట్తాన్.
5 మా ప్రబునె గొప్ప సత్తు మనికాన్, గొప్ప పెరికాన్
వన్ని గేణమ్‍దిఙ్ అంతు సిల్లెద్.
6 యెహోవ, దిక్కు గతి సిల్లి వరిఙ్ తోడుః మంజి కాపాడ్నాన్,
సెఇ వరిఙ్ వాండ్రు నాసనం కినాన్.
7 వందనమ్‍కు వెహ్సి యెహోవదిఙ్ పాటెఙ్ పార్దు
టొయ్‍లెఙ్‍దాన్ మా దేవుణుదిఙ్ పాటెఙ్ పార్‍జి పొగ్‌డిఃదు.
8 వాండ్రు ఆగాసమ్‍దు మొసొప్ పిడిఃక్సి
బూమి ముస్కు పిరు డెఃయిసి
గొరొకాఙ్ గడ్డి పుటిస్నికాన్ వాండ్రె.
9 కొడ్డిఃఙ, అడఃబజిని కాకిఙ తిండి సీనికాన్ వాండ్రె.
10 గుర్రమ్‍కాఙ్ సత్తు సుడ్ఃజినొ
సయ్‍నమ్‍ది వరి గుంపు సుడ్ఃజినొ వాండ్రు సర్ద ఆఎన్.
11 గాని వన్ని ముస్కు బుర్ర వక్సి గవ్‍రం సీని వరిఙ్,
డిఃస్ఎండ మని వన్ని ప్రేమ వందిఙ్ ఎద్రు సూణి వరిఙ్,
యెహోవ, సర్ద ఆజి మంజినాన్.
12 యెరూసలేమ్‍దు మనికిదెరా, యెహోవదిఙ్ పొగ్‌డిఃదు
మీ దేవుణుదిఙ్ పొగ్‌డిఃదు.
13 వాండ్రె మీ పట్నమ్‍ది గేటు పొక్తి గడెఃఙ
సత్తుదాన్ బిగిసి పట్నమ్‍దిఙ్ కాపాడ్నికాన్,
మీ పట్నం నడిఃమి మని లోకురిఙ్ కొడొఃరిఙ్ దీవిస్నాన్
14 మీ దేసెమ్‍దిఙ్ సమాదానమ్‍దాన్ నెగ్రెండ ఇడ్నికాన్ వాండ్రె,
నెగ్గి గోదము పంటెఙ్ సీజినికాన్ వాండ్రె.
15 వాండ్రు బూమిదిఙ్ ఆడ్ర సీజినాన్
వాండ్రు వెహ్సిని ఆడ్ర బూమిదు బేగి లొఙిజినాద్
16 గొర్రె బుడుస్కు నన్ని మస్సు గడ్డ డిప్సినికాన్ వాండ్రె,
నీరు వాక్సిని లెకెండ్ బూమిదు మస్సు వాక్సినికాన్ వాండ్రె.
17 గొడ్డి పణుకు లెకెండ్ వడఃఙ కాయెఙ్ డెఃయిస్నికాన్ వాండ్రె,
వాండ్రు వాక్సిని పిన్నిదిఙ్ ఎయెన్ నిల్‍దెఙ్ అట్‍నాన్?
18 వాండ్రు ఆడ్ర సితిఙ్ అయిసు కర్గిజి సొన్సినె
వాండ్రు గాలి డెఃయ్‍పిస్తిఙ్ గడ్డ తొహ్తి మహిక ఏరు మర్‍జి సొన్సినె.
19 వాండ్రు వన్ని మాటెఙ్
వన్ని రూలుఙు వన్ని ఆడ్రెఙ్ యాకోబు తెగ్గదికార్ ఆతి ఇస్రాయేలురిఙ్ నెస్‍పిస్తాన్.
20 ఎమేణి లోకాఙ్ యా లెకెండ్ వాండ్రు కిజి మన్ఎతాన్
వారు వన్ని ఆడ్రెఙ నెస్ఎర్.
యెహోవదిఙ్ పొగ్‌డిఃదు.