యెహోవ, విజెరిఙ్ పూర్తి నెస్తికాన్. నెగ్రెండ విజెరిఙ్ సూణికాన్ ఇజి యా కీర్తనమ్‍దు వెహ్సినాద్
139
1 యెహోవ, నీను నఙి పరిసిల్లిసిఎలాగ మర్తికాండ్రొ ఇజి నెస్తి మని.
2 నాను బస్నిక, నాను నిఙ్‍నిక విజు నీను నెస్తి మని
నా ఆలోసనెఙ్ ఎలాగ్ మర్తికెఙ్‍నో దూరమ్‍తాండె నెస్తి మని.
3 నాను ఎంబె సొన్సినానొ ఇనిక కిజిననొ
అయాకెఙ్ విజు నీను బాగ నెస్తి మని.
4 యెహోవ, మాట నా వెయ్‍దు రఏండ ముఙాల్‍నె
నాను వర్గినిక ఇనిక ఇజి నీను పూర్తి నెస్తి మని
5 నా సుట్టులం ఉండ్రి కోటి లెకెండ్ నీను నఙి కాపడ్‍తి మని.
నీ కీయు నా ముస్కు మనాద్.
6 నీ తెలివి నఙి అస్తెఙ్ అట్ఇ నసొ మిస్తిక,
నాను అర్దం కిదెఙ్ అట్ఇక.
7 నీ బాణిఙ్ నాను ఎంబె సొండ్రెఙ్ అట్‍నా?
నీ ఎద్రుహన్ నాను ఎంబె సొండ్రెఙ్ అట్‍న
8 నాను ఆగాసమ్‍దు ఎక్సి సొహిఙ్‍బా నీను అబ్బె మని,
నాను అయా లోకమ్‍దు సొహిఙ్‍బా అబ్బె నీను మని.
9 నాను తూర్‍పు దరిఙ్ ఆ కొసాద్ సొహిఙ్‍బా,
పడఃమట్ట దరిఙ్ యా కొసాద్ సొహిఙ్‍బా నీనె ఎంబెబ మని.
10 అబ్బెబా నీ సత్తు మని కియు నా వెట్ట తోడుః మంజి నఙి కాపాడ్ఃజి నడిఃపిసినాద్.
11 సీకటిదు నాను డాఙ్‍జి మహిఙ్‍బా,
నా సుట్టుల మని జాయ్ సీకటి లెకెండ్ మనిద్ ఇజి ఎత్తు కితిఙ్‍బా
12 సీకటి లొఇహాన్ నీను నఙి సూణి
ఎందన్నిఙ్ ఇహిఙ, సీకటిని జాయ్ నిఙి ఉండ్రె లెకెండ్ మనాద్.
13 నా గర్బమ్‍దు మనికెఙ్ విజు తయార్ కితికి నినే,
నా యాయ పొట్టద్ నఙి ఉండ్రి రూపు తయార్ కితికి నినే.
14 బమ్మ ఆనివజనె నీను నఙి తయార్ కితి మని
అందెఙె నాను వందనమ్‍కు వెహ్సి నిఙి పొగ్‌డిఃన.
బమ్మ ఆని వజనె నీ పణిఙ్ విజు అయాక విజు నాను బాగ నెస్తమన.
15 నా వందిఙ్ ఇనికబా నిఙి డాఙ్‍జి మన్ఉ
నాను యాయ పొటa లొఇ ఎయెర్‍బా తొఎండ
నా రూపు తయార్ ఆజి మహివెలె నీను సుడ్ఃతి మని.
16 నాను పిండెం ఆతి మహివలె నీ కణుకుదాన్ నఙి సుడ్ఃతి
నాను పుట్ఎండ ముఙాల్‍నె
నాను బత్కిని దినమ్‍కు విజు నీ పుస్తకమ్‍దు నీను రాస్తి ఇడ్తి మని
17 ప్రబు, నా వందిఙ్ నీ ఆలోసనెఙ్ నాను అర్దం కిదెఙ్ అట్ఇ నసొ గొప్ప పెరికెఙ్.
అయాకెఙ్ లెకిస్తెఙ్ అట్ఉ
18 ఆకెఙ్ లెకిస్తెఙ్ నాను సుడ్ఃతిఙ్‍బ ఇస్కదిఙ్ ఇంక నండొ మనె.
నాను నిద్ర కిజి తెల్లి ఆనివలె నీను నా డగ్రునె మని.
19 ప్రబు, నీను సెఇవరిఙ్ తప్ఎండ సప్సి,
సప్‍ని వరిబాణిఙ్ నఙి దూరం కిఅ ఇజి నాను ఆస ఆజిన.
20 పగ్గదికార్ నీ వందిఙ్ సెఇ మాటెఙ్ వర్గిజినార్,
మోసెమ్‍దాన్ నీ పేరు అసి పర్మణం కిజినార్.
21 యెహోవ, నిఙి దూసిస్ని వరిఙ్ నానుబా దూసిస్న.
నీ ముస్కు వెతిరేకం ఆతి వరిఙ్ నానుబ అస్సయిస్న.
22 వరి ముస్కు నఙి గొప్ప కోపం,
వరిఙ్ నాను నా పగ్గది వరి లెకెండ్ సుడ్ఃజిన.
23 యెహోవ, నఙి పరిసిల్లిసి నా గర్బమ్‍దు ఇనిక మనాదొ సుడ్ఃఅ.
నఙి పరిసిల్లిసి నా ఆలోసనెఙ్ ఎలాగ మర్తికెఙ్‍నో సుడ్ఃఅ.
24 నా బత్కుదు సెఇకెఙ్ ఇనికబ మనదా ఇజి సుడ్ఃఅ
ఎల్లకాలం మని నెగ్గి సరిదు నఙి నడిఃపిస్అ.