కీర్తన 116

ఒరెన్ వన్నిఙ్ సావుదాన్ రక్సిస్తి వందిఙ్ దేవుణుదిఙ్ మొక్కుకితిక యెరూసలేం గుడిఃదు సొన్సి పూర్తి కిజి వందనమ్‍కు వెహ్సినికాదె యా కీర్తన.

1 యెహోవ నా మొరొ వెంజి నా పార్దనం వందిఙ్ జబాబు సిత మనాన్.

అందెఙె నాను వన్నిఙ్ ప్రేమిసిన.

2 వాండ్రు నా పార్దనం గిబ్బి ఒడ్జి వెంజినాన్,

అందెఙె నా బత్కుకాలం విజు నాను వన్నిఙ్ మొరొ కిన.

3 సావు ముర్తు నఙి సుటిస్త మనాద్,

అయా లోకమ్‍దు సాజి సొనాలె ఇజి తియెల్ వాతాద్.

కస్టం, దూకం నఙి తిగిత మనాద్.

4 అయావలె, “యెహోవ, దయ తోరిసి నా పాణమ్‍దిఙ్ రక్సిస్అ”, ఇజి

వన్నిఙ్ నాను మొరొ కిత.

5 యెహోవ దయ మనికాన్ నీతి నిజాయితి మనికాన్.

మా దేవుణు నండొ పాణం నొజి కనికారం తోరిస్నాన్.

6 యెహోవ, అమాయ్‍కుడుదిఙ్ కాపాడ్నాన్.

నాను సావుదు మహివెలె వాండ్రు నఙి రక్సిస్తాన్.

7 నా పాణం, యెహోవ నిఙి నెగ్రండ సుడ్ఃజి తోడుః మనాన్

మర్‍జి నిపాతి మంజిన.

8 యెహోవ, సావుదాన్ నా పాణమ్‍దిఙ్ రక్సిస్తి మని

నా కణెర్ ఏరు వఙ్‍జి సొన్ఎండ రక్సిస్తి,

నా పాదమ్‍కు జార్‍జి సొన్ఎండ నిల్‍ప్తి మని.

9 అందెఙె యా లోకమ్‍దు బత్కిజిని వరి నడిఃమి

నాను యెహోవదిఙ్ లొఙిజి బత్కిజిన

10 నాను నిఙి పూర్తి నమిజిన, అందెఙె నాను వెహ్త,

“యెహోవ, నాను నండొ బాదదాన్ మన”, ఇజి.

11 నాను గాబ్ర ఆజి

“ఎయెన్‍బా నమిదెఙ్ తగ్నికాన్ సిల్లెన్”, ఇజి వెహ్త.

12 యెహోవ నా వందిఙ్ కితి మేలుఙ్ వందిఙ్

మర్‍జి నాను ఇనిక సీదెఙ్ అట్‍నా?

13 వాండ్రు నఙి రక్సిస్తి వందిఙ్ గుర్తు వజ నాను ద్రాక్స ఏరు మని గినె పెర్జి

యెహోవ పేరుదిఙ్ వందనమ్‍కు వెహ్సి పొగ్‌డిఃన.

14 యెహోవదిఙ్ మొక్కు కితికెఙ్ నాను సీన,

వన్ని లోకుర్ విజెరె ఎద్రు సీన.

15 యెహోవ ప్రేమిస్నికార్ వన్నిఙ్ గొప్ప విల్వ మనికార్

వారు సానివలె యెహోవ దుకం ఆనాన్.

16 యెహోవ నాను నిజమ్‍నె నిఙి సేవ పణి కినికాన్,

నా యాయ సేవ కితి లెకెండ్ నాను నిఙి సేవ కిజిన,

సావుదాన్ నీను నఙి విడుఃదల కితి మని.

17 నీను కితి దన్ని వందిఙ్ నాను వందనం వెహ్తెఙ్ పూజ లెకెండ్ సీన,

యెహోవదిఙ్ నాను పార్దనం కిన.

18-19 యెహోవ లోకుర్ విజెరి ఎద్రు

యెరూసలేమ్‍దు నీ పరిసుద్దమాతి గుడిఃదు

నాను మొక్కు కితికెఙ్ నిఙి సీన.

యెహోవదిఙ్ పొగ్‌డిఃపిద్.