కీర్తన 89

ఎజ్రా జాతిది ఏతాను కితి కీర్తన

1 యెహోవ ప్రేమ వందిఙ్ నాను ఎల్లకాలం పొగ్‌డిఃజి పార్న.

నీను నమిదెఙ్ తగ్నికి ఇజి తర తరమ్‍కు నాను వెహ్సి నెస్పిసిని.

2 నీ ప్రేమ ఎల్లకాలం నిల్సి మంజినాద్ ఇజి,

ఆగాసం ఎల్లకాలం నిల్సి మంజిని లెకెండ్

నీను నమిదెఙ్ తగ్నికి ఇని మాట ఎల్లకాలం నిల్సి మంజినాద్ ఇజి నాను నెస్న.

3 యెహోవ వెహ్తాన్, నాను ఎర్‍పాటు కితి దావీదు వెట ఒపుమానం కిత,

“ఎల్లకాలం నీ కుటుమ్‍ది వరిఙ్ రాజు వజ నిల్‍ప్న.

4 తర తరమ్‍కు వారు నీ సిమసనమ్‍దు బసి ఏలుబడిః కినార్”, ఇజి

నా సేవ మనిసి ఆతి దావీదు వెట్ట పర్మణం కిత మన. (సెలా)

5 యెహోవ, నీను కితి బమ్మ ఆతి పణిఙ వందిఙ్ ఆగాసం అంసు దాక మనికెఙ్ పొగ్‌డిఃనె.

దేవుణు వందిఙ్ కేట ఆతి దూతార్ నీను నమిదెఙ్ తగ్నికి ఇజి వారు కూడ్ఃజి నీ వలె వెహ్నర్.

6 ఆగాసమ్‍దు మని ఎయెరిఙ్ యెహోవ వెట పోలిస్తెఙ్ అట్‍నార్?

దేవుణు దుతెఙ లొఇ యెహోవదిఙ్ సమానం ఆతికాన్ ఎయెన్‍బా సిల్లెన్.

7 దేవుణు వందిఙ్ కేట ఆతి దూతెఙు వన్ని డగ్రు కూడ్ఃజినివెలె నండొ తియెల్‍దాన్ నిల్‍నార్.

వన్ని సుట్టులం నిల్‍నికార్ విజెరె వన్నిఙ్ నండొ తియెల్ ఆజి గవ్‍రం సినార్.

8 యెహోవ, విజు సయ్‍నమ్‍కాఙ్ ముస్కు అతికారం మని ప్రబు.

నీ నని సత్తు మనికాన్ ఎయెన్‍బా మనాండ్రా?

యెహోవ, నీను విజు వన్కాఙ్ లొఇ నమిదెఙ్ తగ్నికి.

9 సమ్‍దరమ్‍దు పొఙిజి వాజినిఙ్ నీను అణిసి పొక్నికి,

ఉల్కెఙ్ పొఙిజి వలె తిగ్‌జి పొక్నికి నీనె.

10 రాహబు ఇని సమ్‍దరమ్‍ది పెరి జంతుదిఙ్ సిద్లు కత్సి సప్తికి నీనె

నీ గొప్ప సత్తుదాన్ నీ పగ్గది వరిఙ్ డెఃయ్‍జి ఉల్‍ప్తి.

11 ఆగాసం నీదినె, బూమి నీదినె,

లోకమ్‍ని లోకమ్‍దు మనికెఙ్ విజు నీనె తయార్ కిజి ఇట్తి.

12 ఉస్సన్ దిక్కుదు మనికెఙ్ విజు, దస్సన్ దిక్కుదికెఙ్ విజు నీనె తయార్ కిజి ఇడ్తి

తాబోరు, ఎర్మొను గొరొకు నీ పేరుదిఙ్ సర్దదాన్ పొగ్‌డిఃజి సార్‍జినె.

13 దేవ, నీను నండొ సత్తు మనికి,

నీ సత్తు గొప్ప పెరిక

నీ ఊణెర్ కియు జయం తోరిస్తెఙ్ పెహ్తిఙ్ మనాద్.

14 నీతిని నాయమ్‍నె నీ ఏలుబడిఃదిఙ్ పునాది,

నీను కిజిని విజు దన్ని లొఇ, ప్రేమదాన్ నమకమ్‍దాన్ లోకురిఙ్ సుడ్ఃజిని.

15 (నండొ సర్దదాన్) నెగ్రి వాజిని జాటు వెంజినికార్‍ నండొ సర్ద మంజినార్.

యెహోవ, నీ ప్రేమ కనికారమ్‍దిఙ్ సుడ్ఃజి నీ జాయ్‍దు వారు బత్కిజినార్.

16 నీ పేరుదాన్ వారు రోజు నండొ సర్ద ఆజినార్,

నీను వరివెట నీతిదాన్ మంజినిఙ్ వారు నిఙి పొగ్‌డిఃనార్.

17 నీనె వరి సత్తు

నీ దయదాన్ మా పగ్గది వరిఙ్ ఓడిఃసి మఙి గెల్‍పిస్తి మని.

18 మఙి డాలు లెకెండ్ కాపాడ్నికాన్ యెహోవనె

ఇస్రాయేలురి పరిసుద్దం ఆతి దేవుణునె మఙి రాజుఙ్ సిత్తాన్.

19 అయావలె నీ సేవ కిని వరివెట్ట తోరె ఆజి యా లెకెండ్ వెహ్తి,

నాను ఒరెన్ వన్నిఙ్ ఉద్దం కిదెఙ్ నా సత్తు సిత మన.

లోకుర్ లొఇహాన్ ఒరెన్ వన్నిఙ్ ఎర్‍పాటు కిజి రాజు వజ ఇట్తామన.

20 నా పణిమన్సి ఆతి దావీదుఙ్ సుడ్ఃతానె రాజు కిత మన,

నా వందిఙ్ కేట కిజి ఇడ్తి నూనెదాన్ బుర్రద్ వాక్సి రాజు వజ ఎర్‍పాటు కిత.

21 నా కియుదాన్ దావీదుఙ్ సత్తు సీజి తోడుః మంజిన

నా సత్తు వన్నిఙ్ బలం సీజి ఓదర్సినాన్.

22 పగ్గదికార్ ఎయెర్‍బా వన్ని ముస్కు గెల్‍స్తెఙ్ అట్ఎర్.

మూర్కులుఙు వన్నిఙ్ ఒడిఃసి పన్ను లొస్తెఙ్ అట్ఎతార్.

23 వన్ని ఎద్రునె వన్ని పగ్గది వరిఙ్ నాను నాసనం కిన,

వన్ని ముస్కు పగ్గ అస్తి వరిఙ్ ఓడిఃసి సప్న.

24 నాను వన్నిఙ్ ప్రేమిస్ని, నాను వన్నివెట నమకమ్‍దాన్ మంజిన.

అయక వన్నిఙ్ తోడుః మంజినాద్. నా పేరుదాన్ వాండ్రు సత్తు మనికాన్ ఆజి పెరికాన్ ఆనాన్.

25 నాను ఎర్‍పాటు కితి రాజు కిజిని ఏలుబడిః పడమటదు మని సమ్‍దరమ్‍దాన్

అసి తూర్‍పుదు మని టయ్‍గ్రిస్ ఉప్రటిస్ గడ్డ దాక పెరిక కిన ఆ గడ్డెఙ ముస్కు పెరిక కిన.

26 అయావలె, “నీనె నా బుబ్బ నా దేవుణు,

పెరి సట్టు పణుకు లెకెండ్‍ కాపాడ్ఃజి నఙి రక్సిస్నికి”, ఇజి వాండ్రు నఙి మొరొ కినాన్.

27 నాను వన్నిఙ్ తొల్‍సుర్ పుట్తి మరిన్ లెకెండ్ ఎర్‍పాటు కిన.

బూమిదు మని రాజురిఙ్ ఇంక వన్నిఙ్ ఒద్దె పెరికాన్ కిన.

28 నాను ఎల్లకాలం వన్నిఙ్ ప్రేమిసి వన్నివెట తోడుః మంజిన,

నాను వన్నివెట కితి ఒపుమానం ఎల్లకాలం నిల్సినె మంజినాద్.

29 ఎల్లకాలం వన్ని తెగ్గది వరిఙ్‍నె ఏలుబడిః మంజినాద్,

ఆగాసం మంజిని దాక వన్ని సిమసనం నాను నిల్‍ప్న మంజిన.

30 గాని వన్ని మరిసిర్ నా రూలుఙ్ మని పుస్తకం డిఃసి సిజి,

నా ఆడ్రెఙ లొఙిఎండ మహిఙ.

31 వారు నా రూలుఙ నెక్సి పొక్సి

నా ఆడ్రెఙ వజ కిఎండ మహిఙ.

32 నస్తివలె వారు వెతిరేకం ఆతి వందిఙ్ నాను వరిఙ్ బేత్ డుడ్డుదాన్

కస్టం ఆతి సిక్స సీన,

వారు కితి తపుఙ వందిఙ్ కొర్‍డదాన్ డెఃయ్‍జి సిక్స సీన.

33 గాని “నా ప్రేమ ఎసెఙ్‍బా ఎడః డిఃస్ఎద్

నాను వన్నివెట ఒట్టు పొక్తి మాట తప్ఎ.

34 నాను కితి ఒపుమానం నాను తప్ఎ.

నా వెయ్‍దాన్ వెహ్తి మాటెఙ్ మారిస్ఎ.

35 వన్ని తెగ్గదికార్ ఎల్లకాలం మంజినార్ లె ఇజి,

వన్ని సీమసనం పొద్దు నిల్సి మంజిని దాక నా ఎద్రు మంజినాద్.

36 నెల్ల మంజిని కాలం దాక సిమసనమ్‍దు ఏలుబడిః కినిక మంజినాద్‍లె.

నమకమ్‍దాన్ మని సాక్సి వజ నెల్ల ఆగాసమ్‍దు నిల్సి మంజినాద్‍లె”, ఇజి

37 నీ ఒద్దె నెగ్గి పేరుదాన్ నాను పర్మణం కిత మన.

దావీదు వెట నాను అబద్దం వర్గిఎ (సేలా)

దావీదు రాజు ఉద్దం గెల్‍స్తెఙ్ ఆట్ఏండ ఆతిఙ్ కీర్తన రాస్తికాన్ దన్ని వందిఙ్ మొరొ ఆజినికదె

38 గాని యెలు నీను వన్నిఙ్ డిఃస్తి సితి

నీను ఎర్‍పాటు కిజి ఇట్తి రాజు ముస్కు నండొ కోపం ఆతి.

39 నీ సేవ కిని వన్నివెట ఒట్టు పొక్తిక నెక్తిపొక్తి

వన్ని బుర్రది టోపి బూమిదు అర్‍పిసి కీడు కితి.

40 వన్ని పట్నమ్‍దిఙ్ కాపాడ్ఃజి మహి గొడ్డెఙ్ డెఃయ్‍జి విసిర్‍తి,

వాండ్రు మరాగ్‌జి మహి బాడ్డిఙ్ పాడు కితి.

41 ఆ సరి సొనికార్ విజెరె అబ్బె మని వస్తుఙ్ డొఃఙ కిజి ఒసినార్,

వాండ్రు వన్ని పడఃకది వరివెట నింద నిస్టురం ఆతాన్.

42 వన్ని పగ్గది వరిఙ్ గెల్‍స్తెఙ్ నీను సరి సితి,

వారు విజెరె సర్ద ఆదెఙ్ సరి సితి.

43 వన్ని కూడఃమ్‍దాన్ ఇజ్రికబ ఉద్దం కిదెఙ్ అట్ఎండ కితి,

ఉద్దం కిదెఙ్ తోడుః మన్ఎండ ఆతి

44 రాజు వజ మహి అతికారం లాగ్జి పొక్తి,

వన్ని ఏలుబడిః సిల్లెండ ఆని లెకెండ్ వన్ని సిమసనం బూమిద్ అర్‍ప్తి పొక్తి.

45 వన్ని దఙ్‍డ వయ్‍సు తగిస్తి మని

సిగు తపిసి వన్నిఙ్ అవ్‍మానం కితి (సేలా)

46 యెహోవ, ఎసొడ్ రోస్కు మొకొమ్ డాప్సి మంజిని?

ఎల్లకాలం డాఙ్‍జి మంజినిదా?

ఎసొడ్ దినమ్‍కు నీ కోపం సిస్సు కొనెఙ్ లెకెండ్ మంజినాద్?

47 నాను బత్కినిక ఎసొ కొకొనొ ఇజి ఉండ్రి సట్టు ఎతు కిఅ.

నీను లోకురిఙ్ పణిదిఙ్ రఇ లెకెండ్ సాదెఙ్ తయార్ కిజి ఇడ్తి మని.

48 సావు సిల్లెండ బత్కిదెఙ్ ఎయెన్‍బ అట్‌నాండ్రా?

పాతలమ్‍దు సొన్‍వెండ ఆదెఙ్ ఎయెన్‍బా తప్రె ఆదెఙ్ అట్‌నాండ్రా? (సెలా)

49 ప్రబువా, నిఙి నమిదెఙ్ తగ్ని మాటదాన్ తోడుః ఇడ్జి నీను దావీదు వెట పర్మణం కిజి

తొలిత తోరిస్తి నీ ప్రేమ ఎంబెదె?

50 ప్రబువ, నీ సేవ కినివరి ముస్కు వాతి నింద ఎత్తు కిఅ,

నండొ దేసెమ్‍కాణి లోకుర్ బాణిఙ్ నా ముస్కు వాజిని నింద నాను బరిస్నిక నీను ఎతు కిఅ.

51 యెహోవ, అక్కెఙ్ నీ పగ్గది వరిబాణిఙ్ వాజిని నింద

నీను ఎర్‍పాటు కితి రాజు ముస్కు వారు నింద మోప్సి వెహ్సినార్.

52 యెహోవ ఎస్తివలెబా పొగ్‌డెః ఆజి మనిన్.

ఆమెన్. ఆమెన్.