నెగ్గి పంట సిజి లోకురిఙ్ దీవిస్తి వందిఙ్, దేవుణుదిఙ్ పొగ్‌డిఃజి వందనం వెహ్సినార్.
పాటెఙ్ నడిఃపిస్ని వన్నిఙ్ గుర్తుదిఙ్. దావీదు రాస్తి కీర్తన.
65
1 ప్రబు, సీయోను గొరొతు నిఙి స్తుతి కిదెఙ్ మఙి తగ్నికదె,బానె నిఙి మొక్కుబడిః కితి పూజెఙ్ మాపు సీదెఙ్ మనాద్.
2 మా పార్దనం వెంజినికి,
లోకమ్‍ది లోకుర్ విజెరె నీ డగ్రు వానార్.
3 మాపు కితి పాపమ్‍కు బరిస్తెఙ్ అట్ఇ నసొ,
గాని మాపు రూలుఙ్ సెడ్‍ప్తికెఙ్ విజు నీనె సెమిస్తి మని.
4 నీ గుడిఃదు డుఃగ్‌జి నిఙి పొగ్‌డిఃజి మాడిఃస్తెఙ్
నీను ఎర్‍పాటు కిజి ఇట్తికాన్. గొప్ప సర్ద మనికాన్.
నీ వందిఙ్ కేట ఆతి గుడిః ఇండ్రొణిఙ్ నెగ్గి దీవెనం పొందిజి సర్ద ఆజినాప్.
5 మఙి రక్సిసిని మా ప్రబు, బూమి ముస్కు బత్కిని విజెరిఙ్
సమ్‍దరం ముస్కు పయ్‍నం కిజిని వరిఙ్, ఆదారం నీనె.
గొప్ప బమ్మ ఆతి పణిఙ్ కిజి మా పార్దనమ్‍దిఙ్ నీను జబాబు సీజిని
6 నీను గొప్ప సత్తు మనికి ఇజి నడుఃము బిగ్గిస్తి మని
నీ గొప్ప సత్తుదాన్ గొరొకాఙ్ విజు పునాది కితికి నీనె.
7 నీనె సమ్‍దరమ్‍కాఙ్‍ని దిడ్ఃజిని ఉల్కెఙ అణిసి గత్తిస్‍నికి,
లోకురు కూడ్ఃజి వెతిరెకమ్‍దాన్ గగొల్ ఆజినిక అణిసి అల్లెప్‍నికి.
8 నీను కితి బమ్మ ఆతి పణిఙ్ సుడ్ఃజి
బూమి అందితి మని దాక మనికార్ విజెరె బమ్మ ఆజి తియెల్ ఆనార్.
దర్పుదాన్ అసి పడమట దాక మనికార్ విజెరె సర్దదాన్ డేల్సిని లెకెండ్ కిని.
9 నీను పిరుదాన్ ఊత్సి బూమిదిఙ్ నెగ్రెండ బాగ సుడ్ఃజి,
నీను దన్నిఙ్ సారం కిజిని.
ప్రబు, నీ నది ఏరుదాన్ నిండ్రిత మనాద్,
నీను బూమిదిఙ్ అయా లెకెండ్ నెగ్రెండ తయార్ కితి వెనుక
నీను లోకుర్ వందిఙ్ బూమిద్ పంట పండిస్‍పిస్ని.
10 డూఃతి బూమిదిఙ్ నెగ్రెండ ఊదిత్తి వెన్కా
పిరు డెఃయిసి పట్ట డెఃయితి లెకెండ్ సద్రం కిజిని.
పిరుదాన్ ఊత్సి తడిః కిజి
మొక్కెఙ్ నేర్‍పిసి పిరిప్‍సి బూమిదిఙ్ దీవిసిని.
11 ఇవొండు నండొ జణి సీజి,
నీను సొని బయ్‍లుదు నండొ పంట మంజినాద్.
12 బిడిఃమ్ బూమి గడ్డిదాన్ పహె ఆత మనాద్.
సర్దదాన్ మని వన్ని లెకెండ్, గొరొకు సర్దదాన్ నిండ్రితె మనె.
13 పాత పిడ్ఃక్తి లెకెండ్, గొర్రెఙ్ పస్రు గడ్డి ముస్కు మంద ఆతె మనె
ఆ జోరెదు కూలిఙ్ జోల్ఆడిఃజి పహె ఆతె మనె
అక్కెఙ్ విజు, లోకుర్ లెకెండ్ సర్ద ఆజి డేల్లిసి
దేవుణుదిఙ్ వందనమ్‍కు వెహ్సి మంజినె.