పర్మదమ్‍దాన్ తప్రిస్తి వందిఙ్ దేవుణుదిఙ్ పొగ్‌డిఃజినిక
పాటెఙ్ నడిఃపిస్ని వన్నిఙ్ గుర్తుదిఙ్ మనిక. యెహోవ పణిమన్సి ఆతి దావీదు కీర్తన. సవులు రాజు కీదాన్, వన్నిఙ్ పగ్గ అస్తి విజెరి కీదాన్, యెహోవ తప్రిస్తివలె దావీదు పారితికాదె యాక.
18
1 యెహోవ, నీనె నఙి సత్తు పుటిస్నికి.నాను నిఙి గొప్పఙ ప్రేమిసిన.
2 యెహోవనె పెరి ఒహ్కా పణుకు లెకెండ్,
కోట లెకెండ్ మంజి, నఙి కాపాడ్ఃజి తప్రిస్నికాన్.
నా దేవుణునె సట్టు పణుకు లెకెండ్ మంజినాన్. నాను వన్నిబాన్ డాఙ్‍జిన.
అడ్డు కిని డాలు లెకెండ్ మంజి, సత్తుదాన్ నఙి రక్సిసి,
నఙి పర్మదం రెఎండ కాపాడ్ఃజినికాన్ వాండ్రె.
3 పొగ్‌డిఃదెఙ్ తగ్ని యెహోవదిఙ్ నాను మొరొ కిజినిఙ్,
వాండ్రు నా పగ్గది వరి బాణిఙ్‍, నఙి రక్సిసినాన్.
4 సావు ముర్తుa నఙి సుటె ఆతాద్,
సెఇకార్, పెరి గడ్డ పొఙిజి వాతి లెకెండ్,
నా ముస్కు అర్సి బెద్రిసినార్.
5 సావు ముర్తు దూకిద్ సొని లెకెండ్ నఙి సుట్టె ఆతాద్.
ఊరి ఒడ్డితి లెకెండ్ సావు నఙి అస్తెఙ్ వాతాద్.
6 యా బాద మనివలె నాను యెహోవదిఙ్ మొరొ కిత.
నా దేవుణుదిఙ్ పార్దనం కిత. వాండ్రు వన్ని ఒద్దె నెగ్గి బాడ్డిదాన్, నా మొరొ వెహాన్.
నాను మొరొ కితిక వన్ని డగ్రు సొన్సి వన్ని గిబ్బిదు అర్తాద్.
7 నస్తివలె బూమి కుడుక్సి వాతిఙ్, బూమి కద్లితాద్.
గొరొక్ మట్టుఙ్ కద్లితె, వన్నిఙ్ కోపం వాతిఙ్ అక్కెఙ్ కద్లితె.
8 వన్ని మూంజి బొరొఙాణిఙ్ గోయ్ సోతాద్.
వన్ని వెయ్‍దాన్ సిస్సు కొనెఙ్ నండొ వాతిఙ్, సిస్సు తురెఙ్ వాఙితె.
9 వాండ్రు ఆగాసమ్‍దిఙ్ రెక్సి డిగ్జి వాతాన్.
వన్ని పాదమ్‍క అడ్గి కర్ని మొసొప్ కమిత మహాద్.
10 కెరుబుb దూత ముస్కు వాండ్రు ఎక్సి వాతాన్.
పొట్టి లెకెండ్ గాలి ముస్కు ఎగ్రిజి వాతాన్.
11 టంబు గుడ్స లెకెండ్ ఆమాస్ సీకాట్ వన్ని సుట్టులం పిడిఃక్తాద్.
ఆగాసమ్‍దాన్ ఏరు మని కర్ని మొసొప్ వన్ని సుట్టులం కమితాద్.
12 వన్ని ఎద్రు మని మెర్సిని జాయ్‍దాన్ వడుఃఙు,
అయా కర్ని మొసొప్‍దాన్ రగ రగ కసిని సిస్సు డిప్కు సోతె.
13 యెహోవ ఆగాసమ్‍దాన్ దీడిఃతి లెకెండ్ వర్గితాన్.
బూమిదు మని విజు దన్ని ముస్కు గొప్ప సత్తు మని దేవుణు డట్టం డేడిఃస్తాన్.
వడుఃఙుఙ్‍ని రగ రగ కసిని సిస్సు డిప్కు రాలితె.
14 వాండ్రు గురి సుడ్ఃజి వన్ని అప్కుదాన్ సెఇ వరిఙ్ నాసనం కితాన్.
నండొ మెర్‍పిసి, వరిఙ్ తియెల్‍సి ఓడిఃస్తాన్.
15 యెహోవ, నీ మూంజి బొరొఙాణిఙ్ నీను నండొ గాలి డిఃస్తిఙ్,
నిఙి లొఙిజి సమ్‍దరమ్‍ది మట్టు బాడ్డి తోరితాద్.
నీను డట్టం గద్దిస్తిఙ్,
బూమిది పునాదిఙ్ తోరితె.
16 వాండ్రు మని బాడ్డిదాన్ వన్ని కియు సాప్సి నఙి అస్తాన్.
పెరి గడ్డదు ముడిఃగితి లెకెండ్ మహిఙ్ నఙి ముస్కు లాగితాన్.
17 నా పగ్గదికార్ నఙి ఇంక సత్తు మనికార్.
వారు దూసిస్తార్. గాని వరిబాణిఙ్ నఙి తప్రిస్తాన్.
18 నాను కస్టమ్‍దు మహివలె వారు నఙి మాలెఙ్ కితార్.
గాని యెహోవనె నఙి రక్సిస్తాన్.
19 కస్టమ్‍దు మహివలె వాండ్రు నఙి తప్రిస్తాన్.
వన్నిఙ్ నాను ఇస్టం ఆత. అందెఙె నఙి వాండ్రు తప్రిస్తాన్.
20 నాను నీతి నిజాయితిదికెఙ్ కితిఙ్,
నాను ఎదార్దం మనికెఙ్ కితిఙ్,
యెహోవ నఙి తగ్గితి పల్లం సితాన్.
21 ఎందన్నిఙ్ ఇహిఙ, యెహోవ తోరిస్తి నెగ్గి సరిదు నాను నడిఃత.
నా దేవుణుదిఙ్ డిఃసి సీజి నాను సెఇ పణిఙ్ కిఎత.
22 వన్ని రూలుఙ నాను నెక్సి పొక్ఎత.
వాండ్రు వెహ్తికెఙ్ విజు లొఙిత.
23 సెఇ పణిఙ్ నాను కిఏండ,
వన్ని ఎద్రు నాను ఇని నింద సిల్లెండ మహా.
24 నాను యెహోవ ఎద్రు ఇని తపు సిల్లెండ నెగ్రెండ తోరె ఆత.
అందెఙె వాండ్రు నా నీతి నిజాయితిదిఙ్ తగ్గితి పల్లం సితాన్.
25 నమకమ్‍దాన్ మంజిని వరివెట, నీను నమకమ్‍దాన్ మంజిని.
ఎదార్దమ్‍దాన్ మంజిని వరివెట, ఎదార్దమ్‍దాన్ మంజిని.
26 నెగ్గి వరిఙ్ నీను నెగ్రెండనె సూణి,
సెఇ బుద్దిది వరిఙ్ సెఇబాన్‍నె డిఃస్ని సీనిc.
27 అణ్‍సె ఆజిని వరిఙ్ నీను రక్సిస్ని.
గర్వమ్‍దాన్ మని వరిఙ్ నీను మట్‍సి పొక్ని.
28 నిజమె నా సరిదు జాయ్ సీనికి నీనె.
నా దేవుణు ఆతి యెహోవ, నాను సీకాట్‍దు మహిఙ్,
గొప్ప జాయ్‍దు తతికి నీనె.
29 నీ సాయమ్‍దాన్ నాను సయ్‍నమ్‍ది వరిబాణిఙ్ గెల్‍స్నా.
నా దేవుణు సాయమ్‍దాన్ పట్నమ్‍దిఙ్ కాపాడ్ఃని గోడ్డ డాట్న.
30 దేవుణు కినికెఙ్ ఎదార్దమ్‍దికెఙ్, యెహోవ మాట కల్తి సిల్లిక.
నీనే గతి ఇజి వన్ని ముస్కు ఆస ఇట్తి విజెరిఙ్,
వాండ్రు అడ్డు కిని డాలు లెకెండ్ మంజినాన్.
31 యెహోవనె ఆఎండ మరి ఒరెన్ దేవుణు ఎయెన్?
మా దేవుణు ఆఎండ మఙి అడ్డు కిజి కాపాడ్ఃనికాన్ ఎయెన్?
32 నఙి సత్తు పుటిస్నికాన్ వాండ్రె.
నింద సిల్లెండ నడిఃపిస్నికాన్ వాండ్రె.
33 వాండ్రు నా కాల్కాఙ్ అడిఃవి గొర్రె ఉహ్‍క్ని లెకెండ్ సత్తు సీజినాన్.
గొరొక్ ముస్కు ఎక్కిసి, బాన్ అర్ఎండ నఙి ఇడ్‍జినాన్.
34 నా కీదు నఙి ఉద్దం ఒజ్జ కిజినికాన్ వాండ్రె.
నా కీదు కంసు ఇల్లు బద్ద టాణిస్తెఙ్ అట్‍ని నసొ సత్తు సీజినికాన్ వాండ్రె.
35 యెహోవ, నఙి రక్సిస్ని నీ డాలు నఙి సీజిని.
నీ సత్తు మని ఉణెర్ కియు నఙి తోడుః మంజి కాపాడిఃద్.
నీను తగిజి నఙి గొప్ప పెరికాన్ కినిలె.d
36 నా పాదమ్‍కు జార్‍జి బెణికెండ మండ్రెఙ్,
నా కాల్కఙ్ దెబ్బెఙ్ తగ్లిఎండ మండ్రెఙ్ నెగ్గి సరి తోరిస్తి.
37 నా పగ్గది వరిఙ్ ఉల్‍ప్సి ఉల్‍ప్సి ఒసి వరి ముస్కు గెల్‍స్నెండ,
వారు నాసనం ఆజి సొని దాక నాను వెన్కా మర్‍జి బేస్ఎండ మహా.
38 వారు మర్‍జి నిఙ్ఎండ నాను వరిఙ్ సప్సి విసీర్త.
వారు నా పాదం అడ్గి అర్తార్.
39 ఉద్దం కిదెఙ్ నీను నఙి సత్తు సితి.
నా ముస్కు నిఙితి వరిఙ్ నా కాల్కు అడ్గి నీను ఇట్తి.
40 నఙి పగ్గ అస్తి మహి వరిఙ్ వెన్కా మర్‍జి సొని లెకెండ్ కితి.
నఙి దూసిస్తి వరిఙ్ నాను నాసనం కిత.
41 వారు సాయం కిదెఙ్ మొరొ కితార్. గాని రక్సిస్నికాన్ ఎయెన్‍బ సిల్లెండ ఆతాన్.
యెహోవెఙ్ మొరొ కితార్ గాని, వాండ్రు వరిఙ్ జబాబు సిఎతాన్.
42 నస్తివలె గాలి ఎగ్రిస్ని దుల్లి లెకెండ్, నాను వరిఙ్ డెఃయ్‍జి గుండ కిత.
డేవది కస్ర ఒరెన్ కెర్సిపొక్ని లెకెండ్ వరిఙ్ నాను కెర్‍త విసీర్త.
43 యా లోకుర్ కిని కిలిబిలిదు అర్సి సొన్ఎండ, నీను నఙి కాపాడ్ఃతి.
దేవుణుదిఙ్ నెస్ఇ లోకుర్ ముస్కు నఙి అతికారి లెకెండ్ కితి.
నాను నెస్ఇ లోకుర్‍బ నా అడ్గి మనార్.
44 నా మాట వరి గిబ్బిద్ అర్తి వెటనె వారు నఙి లొఙిజి డగ్రు ఆజినార్.
పయి లోకుర్ నా ఎద్రు బుర్ర వక్సి లొఙిజినార్.
45 వారు విజెరె నండొ తియెల్ ఆజినార్.
మరాగ్‌జి మహి బాడ్డిదాన్ వణ్‍క్సి తియెల్ ఆజి వాజినార్.
46 యెహోవ పాణం మనికాన్.
నఙి పెరి సట్టు పణుకు లెకెండ్ మని వన్నిఙ్ నాను పొగ్‌డిఃజిన.
నఙి రక్సిస్ని నా దేవుణు నండొ పొగిడెః ఆపిన్.
47 నఙి బాద కితి వరిఙ్ పగ్గ తీరిస్ని దేవుణు వాండ్రె.
జెనమ్‍దిఙ్, నా అడ్గి లొఙిని లెకెండ్ కితికాన్ వాండ్రె.
48 వాండ్రె నా పగ్గతి వరిబాణిఙ్ నఙి రక్సిసినాన్.
యెహోవ, నా ముస్కు నిఙితి వరిఙ్ ఇంక నీను నఙి
వరి ముస్కు గొప్ప పెరి వన్ని లెకెండ్ కితి.
నీను నఙి బాదెఙ్ కిని వరి కియుదాన్ నఙి తప్రిస్తి.
49 అందెఙె యెహోవ, ఆఇ జాతిది లోకుర్ నడిఃమి నిఙి నాను పొగ్‌డిఃన.
నీ పేరుదిఙ్ గొప్ప పెరిక కిజి పొగ్‌డిఃజి పాటెఙ్ పార్న.
50 నీను ఎర్‍పాటు కితి ఇట్తి రాజుఙ్ గెల్‍పిసిని.
ఎర్‍పాటు కిజి దీవిస్తి దావీదుదిఙ్ వన్ని తరమ్‍ది వరిఙ్
ఎల్లకాలం నమకమ్‍దాన్ సుడ్ఃజిని.