యూదా ప్రాంతమ్‍దు హిజ్కియా రాజు ఆతిక
29
1 హిజ్కియా రాజు ఆతివలె వన్ని వయ్‍సు 25 పంటెఙ్ ఆత మహాద్. వాండ్రు యెరూసలేమ్‍దు 29 పంటెఙ్ ఏలుబడిః కితాన్. వరి యాయ పేరు అబీయా, అది జెకరియ గాడ్సి. 2 హిజ్కియా యెహోవ ఎద్రు వరి అన్నిగొగొ ఆతి దావీదు రాజు నడిఃతి వజ, వీండ్రుబ నెగ్రెండ నడిఃజి మహాన్.3 వాండ్రు వన్ని ఏలుబడిఃదు మొదొహి ఏంటు, మొదొహి నెల్లదునె, యెహోవ గుడిఃది సరిది సేహ్లెఙ్ ముఙల నెగెండ్ కిబిస్తెఙ్ మొదొల్‍స్తాన్. 4 నస్తివలె గుడిఃదిఙ్ తూర్‍పు దరిఙ్ మని బయ్‍లుదు, పుజెర్‍ఙని, లేవితెగ్గది వరిఙ్ ఉండ్రెబాన్ కూక్పిసి, 5 హిజ్కియా వరివెట ఈహు వెహ్తాన్, “లేవి తెగ్గదికిదెరా, నాను వెహ్నిక వెండ్రు, యెలు మిఙి మీరె సుబ్బరం కిబె ఆజి మీ అన్నిగొగొర్ దేవుణు ఆతి యెహోవ గుడిఃబ సుబ్బరం కిదు. సుబ్బరం కిని వలె ఇనికబ కీడు ఆతిక మహిఙ అక్క లాగ్జి పొక్తు. 6 మా అన్నిగొగొర్ యెహోవ ఎద్రు సెఇ పణిఙ్ కితారె, డిఃస్త సితార్. అక్కదె ఆఎండ వన్ని గుడిఃదు సొండ్రెఙ్‍నె ఏకమే తెవు డిఃసి సీజి అడ్డం మొకొమ్‍కు మహ్సి బూలాతార్. 7 మరి వారు ఇస్రాయేలు దేవుణు ఆతి యెహోవ గుడిఃది ఒద్దె నెగ్గి గద్దిది సేహ్లెఙ్ కెహ్సి, దీవెఙ్ కసిస్ఎండ, దూపం సుర్ఎండ, సుర్జి సీని పూజెఙ్ కిఎండ మహార్. 8 అందెఙె యెహోవ కోపం ఆజి యూదా లోకుర్ ముస్కుని, యెరూసలేమ్‍దు బత్కిజిని లోకుర్ ముస్కు సిక్స సితాన్. అక్క విజు మీ ఎద్రునె జర్గితాద్. గాని వరిఙ్ ఇజ్రికబ తియెల్ సిగ్గు సిల్లెద్. అక్క సుడ్ఃజి ఆఇ జాతిఙాణి లోకుర్ వరిఙ్ దూసిసి ఏలన కితార్. 9 మా అన్నిగొగొరిఙ్ ఉద్దమ్‍కు కిజి విజెరిఙ్ సాప్సి, వరి ఆడ్సికాఙ్, వరి మరిసిరిఙ్, వరి గాడ్సికాఙ్ తొహ్సి ఒతార్. 10 యెలు వన్ని కోపం మా ముస్కుహాన్ డిఃసి సొని వజ ఇస్రాయేలు దేవుణు ఆతి యెహోవదిఙ్ మాటు ఉండ్రి నెగ్గి ఒపుమానం కినాట్ ఇజి ఒల్‍బిత మన. 11 నా బయిరాండె, యెహోవదిఙ్ సేవ కిదెఙ్ డిఃసి సీమాట్, దూపం సుర్దెఙ్ డిఃసి సీమాట్, వన్ని వందిఙ్ సేవ కిదెఙ్ వాండ్రు మిఙినె ఎర్‍పాటు కితాన్. అందెఙె యెలుదాన్ మీరు సర్దదాన్ కిదు”, ఇజి వెహ్తాన్.
12 నస్తివలె యా లేవి తెగ్గదికార్ పణికిదెఙ్ ఎర్‍పాటు ఆతార్. వారు ఎయెర్ ఇహిఙ కహతు కుటుమ్‍దాన్ అమాసయ్‌ మరిసి మహాతు, అజరియ మరిసి యోవేలు, మెరారి కుటుమ్‍దాన్ అబ్ది మరిసి కీసు, యెహాల్లెలు మరిసి అజరియ, గెర్సోను కుటుమ్‍దాన్ జిమ్మా మరిసి యోవాహు, యోవాహు మరిసి ఏదెను, 13 ఎలీసాపాను కుటుమ్‍దాన్ సిమ్రీని యెహీయేలు, ఆసాపు కుటుమ్‍దాన్ జెకరియని మత్తనాయ, 14 హేమాను కుటుమ్‍దాన్ యెహియేలుని సిమీ, యెదూతూ కుటుమ్‍దాన్ సెమయాని ఉజ్జియేలు ఇనికార్. 15 వీరు వరి తంబెరిఙ కూక్పిసి విజెరె సుబ్బరం కిబె ఆతారె, యెహోవ వెహ్తి రూలుఙ వజ, రాజు వెహ్తి ఆడ్ర వజ యెహోవ గుడిఃదు సుబ్బరం కిదెఙ్ లొఇ సొహార్. 16 యెహోవ గుడిఃది ఒద్దె నెగ్గి బాడ్డిదు సుబ్బరం కిదెఙ్ పుజెర్‍ఙునె సొన్సి, అయా గుడిఃది గది లొఇ తోరితి సెఇ వస్తుఙ్ విజు లొఇహాన్ డేవదు తసి ఇట్తార్‍. యక్కెఙ్ విజు లేవి తెగ్గదికార్ కిద్రోను లొవ్వది జోరెదు ఒసి విసిర్‍తార్. 17 ఆహె మొదొహి నెల్ల మొదొహి రోజుదాన్ సుబ్బరం కిదెఙ్ మొదొల్‍స్తి పణి కిజినె వాన్నిఙ్, ఒద్దె నెగ్గి గద్ది దాక ఎనిమిది రోస్కు అస్తాద్. మరి సుబ్బరం కిజి వాన్నిఙ్ ఎనిమిది రోస్కు అస్తాద్. మొత్తం అయా నెల్లదునె 16 రోస్కు అయా పణి పూర్తి కిజి వీస్తార్.
18 అయావెన్కా వారు హిజ్కియా రాజు డగ్రు సొహారె వన్నివెట, “యెహోవ గుడిః విజు మాపు సుబ్బరం కితాప్, సుర్ని సీని పూజ బాడ్డిఙ్, అబ్బె మంజిని సామానమ్కు పిట్టమ్‍కు ఇడ్ని బల్ల, దన్ని ముస్కు మంజిని సామానమ్కు విజు సుబ్బరం కితాప్. 19 మరి అహాబు రాజు ఏలుబడిః కిజి మహివలె, పాడు కితి సామానమ్కు విజు సుబ్బరం కిత మనాప్. యాక్కెఙ్ విజు యెలు యెహోవ గుడిః డేవ ముఙల పూజ బాడ్డి డగ్రు మనె”, ఇజి వెహ్తార్.
20 మహ్సా నాండిఙ్ పెందల నిఙ్‌జి హిజ్కియా రాజు వరి పట్నమ్‍ది అతికారిఙ ఉండ్రెబాన్ కూక్పిసి, యెహోవ గుడిఃదు కూడిఃజి సొహార్. 21 వారు రాజెం వందిఙ్, ఒద్దె నెగ్గి బాడ్డి వందిఙ్, యూదా లోకుర్ వందిఙ్, పూజెఙ్ కిదెఙ్ ఏడు కోడెః దూడెఙ్, ఏడు గొర్రె పోతుఙ్, ఏడు గొర్రె పిల్లెక్, ఏడు ఎల్లెటి బొంకెఙ్, అసి సొహార్. నస్తివలె హిజ్కియా రాజు, “పాపం సొని వందిఙ్, యెహోవెఙ్ పూజ సీని బాడ్డిదు పూజ కిదు”, ఇజి ఆరోను కుటుమ్‍ది పుజెర్‍ఙ వెహ్తిఙ్, వారు అయాక్కెఙ్ యెహోవ గుడిఃదు ఒతార్. 22 నస్తివలె ఆ పుజెర్‍ఙు ముఙల కోడెః దూడెఙ్ కత్సి నెతెర్ అసి పూజ బాడ్డిఙ అడ్‍గిస్తార్. వెన్కా గొర్రె పోతుఙ్ కత్సి నెతెర్ అసి పూజ బాడ్డిఙ అడ్‍గిస్తార్. మరి గొర్రె పిల్లెక్ కత్సి నెతెర్ అసి పూజ బాడ్డిఙ అడ్‍గిస్తార్. 23 మరి వరి పాపమ్‍కు సొని వందిఙ్, గొర్రె పోతుఙ్, రాజు డగ్రుని అబ్బె కూడిఃతి మని లోకుర్ డగ్రు తతిఙ, వారు వన్కా ముస్కు కిక్కు ఇడ్‌జి నూక పోక్తి వెన్కా పుజెర్‍ఙు ఒసి వన్కాఙ్‍ పూజ కినార్. 24 ఆహె ఇస్రాయేలు లోకుర్ విజెరి పాపమ్‍కు సొని వందిఙ్, పూజ కిదెఙ్ ఇజి రాజు వెహ్తా మహాన్. ఇస్రాయేలు లోకుర్ విజెరి పాపమ్‍కు సొని వందిఙ్, ఆ పుజెర్‍ఙు సుర్ని పూజెఙ్, సాంతి పూజెఙ్ కిజి వన్కా నెతెర్, పూజ బాడ్డిఙ వాక్తార్.
25 నస్తివలె గాదు ప్రవక్తని నాతాను ప్రవక్త దావీదు రాజుఙ్ వెహ్తి సలహా వజ, హిజ్కియ రాజు, లేవి తెగ్గది వరిఙ్, యెహోవ గుడిఃదు బాజెఙ్, టొయ్‍లెఙ్, తాల్‍బిల్లెఙ్ డెఃయ్‍దెఙ్ ఎర్‍పాటు కితాన్. యా వజ జర్గిదెఙ్ ఇజి ముఙల యెహోవ వన్ని ప్రవక్తార్ వెట వెహ్త మహాన్. 26 నస్తివలె దావీదు రాజు కిబిస్తి మహి బాజెఙ్, డెఃయ్‍ని వందిఙ్‍ని మోరిఙ్ ఊక్ని వందిఙ్, లేవి తెగ్గది పూజెర్‍ఙ ఎర్‍పాటు కిత మహార్. 27 హిజ్కియా రాజు పూజ బాడ్డి ముస్కు పూజెఙ్ కిదెఙ్ ఇజి వెహ్తిఙ్ సరి, సుర్జి సీని పూజెఙ్ కిదెఙ్ మొదొల్స్తార్. నస్తివలెనె ఇస్రాయేలు రాజు ఆతి దావీదు తయార్‌ కిబిస్తి మహి బాజెఙ్ డెఃయ్‍జి, మోరిఙ్ ఊక్సి, యెహోవదిఙ్ పాటెఙ్ పార్‍దెఙ్ మొదొల్స్తార్. 28 యా వజ జర్గిజి మహిఙ్ అబ్బె మని లోకుర్ విజెరె పొగ్‌డిఃజి, పాటెఙ్ పార్నికార్ పార్‍జి మహార్. మోరిఙ్ ఊక్నికార్ ఊక్సి మహార్. ఆహె పూజ కినెండె ఊక్సి మహార్. 29 పూజ కిదెఙ్ విజు వీజితిఙ్, రాజుని అబ్బె మనికార్, విజెరె బుర్రెక్ వక్సి పొగ్‌డిఃతార్. 30 ఆహె హిజ్కియా రాజు, అతికారిఙని, లేవి తెగ్గది వరివెట, “దావీదుని ఆసాపు రాస్తి కీర్తన పాటెఙ్ యెహోవ వందిఙ్ పార్‍దు”, ఇజి వెహ్తాన్. ఆహె వారు సర్దదాన్ పాటెఙ్ పార్‍జి పొగ్‌డిఃజి మహార్.
31 నస్తివలె హిజ్కియా రాజు వరివెట, “యెలు మీరు డగ్రు రదు, యెహోవ గుడిఃదు పణి కిదెఙ్ ఎర్‍పాటు ఆతిదెర్. పూజెఙ్ కిని సామానమ్కు డగ్రు తసి సీదు”, ఇహాన్. అందెఙె వారు సెగొండార్ మాముల్ మెకిజి సీని పూజెఙ్ అగ్గం పూజెఙ్ తసి సితార్. సెగొండార్ వరిఙ్ మన్సుదు పుట్తి వజ సుర్జి సీని పూజెఙ్, అగ్గం పూజెఙ్ తసి సితార్. 32 లోకుర్ యెహోవ వందిఙ్ పూజ కిదెఙ్ తత్తి జంతుఙ్‍ ఎసొడు ఇహిఙ 70 తల్లెక్ కోడెః దూడెఙ్, 100 తల్లెక్ గొర్రెఙ్, 200 గొర్రె పిల్లెక్ తత్తార్. 33 అయాకెఙె ఆఎండ యెహోవ వందిఙ్ ఎర్‍పాటు ఆతి కోడ్డిఙ్, 600, గొర్రెఙ్ 3,000 మనె. 34 అయావలె పుజెర్‍ఙు కొకొండార్‍నెకక. అబ్బె పూజ వందిఙ్ తత్తి కోడ్డి, గొర్రెఙణి తోలు రెక్తెఙ్ అట్ఎండ మహార్. అందెఙె అయా పణిదు లేవి తెగ్గదికార్‍నె పుజెరి పణి కిదెఙ్ అట్‍ని నని యర్దాదం మన్సుదికార్ సాయం కిజి మహార్. ఎందన్నిఙ్ సాయం కిజి మహార్ ఇహిఙ, మరి సెగొండార్ పూజెర్‍ఙ ఎర్‍పాటు కిఎండ మహార్. అందెఙె పుజెర్‍ఙ వారు సాయం కిజి మహార్. 35 అబ్బె సుర్ని పూజెఙ్, సాంతి పూజెఙ్ కిని వందిఙ్, అగ్గం లాగితి కొడుఃవు, నూనె, ద్రాక్స ఏరు, గోదుము దూరు నండొ సుర్జి సితార్. యెహోవ వందిఙ్ యా వజ మరి పణిఙ్ కిదెఙ్ ఆతాద్‍. 36 దేవుణు వందిఙ్ వారు యా వజ ఎంబెణిక బాను విజు ఎర్‍పాటు కితార్‌కక, హిజ్కియా రాజుని అబ్బె మని లోకుర్ విజెరె నండొ సర్ద ఆతార్.