2 రాజులు
అహజియ ఏలీయాబాన్ కబ్రు పోకిసినిక
1
1 అహాబు సాతి వెన్కా మోయాబు దేసెమ్‍దికార్, ఇస్రాయేలు లోకుర్ ముస్కు పడిఃఎండ ఆజి ఉద్దం కితార్. 2 అయావలె అహజియ ఇస్రాయేలు లోకురిఙ్ రాజు ఆత మహాన్. వాండ్రు సొమ్రోను పట్నమ్‍దు మని వన్ని మేడః ముస్కుహి కిటికిదాన్ జార్‍జి అర్తాండ్రె గాయమ్‍కు ఆతాన్. నస్తివలె వాండ్రు, “నఙి యా గాయమ్‍కు తగ్గినెనో సిల్లెనో నెస్ని వందిఙ్ మీరు ఎక్రోను పట్నమ్‍దు సొన్సి, వారు మాడిఃస్ని బయల్‍జెబుa ఇని దేవుణుబాన్ పంజి సుడ్ఃజి రద్దు”, ఇజి వరిఙ్ వెహ్తా పోక్తాన్.3 నస్తివలె తిస్‍బి నాటొణి ఏలీయా వెట యెహోవ దూత, “అహజియ రాజు, సొమ్రోను పట్నమ్‍దాన్ వన్ని పణిమన్సిరిఙ్ ఎక్రోను పట్నమ్‍దు పోకిసినాన్. నీను వరిబాన్ బేగి సొన్సి, ‘మీరు ఎక్రోను పట్నమ్‍దు మని దేవుణు ఆఇ బయల్‍జెబు డగ్రు ఎందన్నిఙ్ పంజి సుడ్ఃదెఙ్ సొన్సినిదెర్? ఇస్రాయేలు లోకుర్‍బాన్ దేవుణు సిల్లెండ్రా?’ 4 యెహోవ వెహ్సినిక ఇనిక ఇహిఙ, ‘నీను యా లెకెండ్ కితికక, నీను ఎక్‍తి మంసం మరి డిగ్ఇలె, నీను తప్ఎండ సానిలె’ ఇజి రాజు వెట వెహ్తు”, ఇజి వరిఙ్ ఏలీయా వెహ్తాన్.
5 నస్తివలె వారు అహజియ రాజుబాన్ మర్‍జి సొహిఙ్, “మీరు ఎందన్నిఙ్ మర్‍జి వాతిదెర్?” ఇజి వరిఙ్ వెన్‍బతాన్. 6 అయావలె వారు, “మఙి ఒరెన్ లోకు సర్దు దసుల్ ఆతాండ్రె, మిఙి పోకిస్తి రాజు డగ్రు మర్‍జి సొన్సి వన్నిఙ్ ఈహు వెహ్తు, ‘యెహోవ వెహ్సినిక ఇనిక ఇహిఙ, ఇస్రాయేలు లోకుర్‍బాన్ దేవుణు సిల్లెండ్రా? నీను ఎందన్నిఙ్ ఎక్రోను పట్నమ్‍దు మని దేవుణు ఆఇ బయల్‍జెబు డగ్రు పంజి సుడ్ఃజి రద్దు ఇజి నీ పణిమన్సిరిఙ్ పోకిసిని? నీను యా లెకెండ్ కితికక, నీను ఎక్‍తి మంసం మరి డిగ్ఇలె, నీను తప్ఎండ సానిలె’ ఇజి వాండ్రు మఙి వెహ్తా పోక్తాన్”, ఇజి రాజుఙ్ వెహ్తార్. 7 అహిఙ రాజు, “మిఙి ఎద్రు వాజి యా మాటెఙ్ వెహ్తికాన్ ఎనెట్‍దికాన్?” ఇజి వరిఙ్ వెన్‍బతాన్. 8 అందెఙె వారు, “వాండ్రు బుడుఃస్కుదాన్ తయార్ కితి సొక్క పొర్పాత మనాన్. నడుఃముదు తోలుదాన్ తయార్ కితి బెల్‍టు తొహె ఆత మనాన్”, ఇజి వన్నిఙ్ వెహ్తిఙ్, వాండ్రు, “అహిఙ వాండ్రు తిస్‍బి నాటొణి ఏలీయానె”, ఇజి వరిఙ్ వెహ్తాన్.
అహజియ పోకిస్తి సయ్‍నమ్‍దిఙ్ సుర్‍తిక
9 అయావెన్కా అహజియ రాజు, 50 మన్సి సయ్‍నమ్‍దిఙ్‍ని వరిఙ్ నడిఃపిస్ని అతికారిదిఙ్ ఏలీయాబాన్ పోక్తాన్. అయావలె ఏలీయా ఉండ్రి గొరొన్ ముస్కు బస్త మహాన్. నస్తివలె ఆ సయ్‍నమ్‍ది అతికారి వన్ని డగ్రు ఎక్సి సొహాండ్రె, “ఓ దేవుణు ప్రవక్త, నిఙి రాజు డిగ్జి రఅ ఇజి వెహ్సినాన్”, ఇజి ఏలీయెఙ్ వెహ్తాన్. 10 నస్తివలె ఏలీయా ఆ అతికారిఙ్, “నాను దేవుణు ప్రవక్త ఇహిఙ, ఆగాసమ్‍దాన్ సిస్సు వాజి, నిఙిని నీ వెట మని 50 మన్సిదిఙ్ సురిద్”, ఇజి వెహ్తిఙ్ సరి, వెటనె ఆగాసమ్‍దాన్ సిస్సు వాజి వన్నిఙ్‍ని వన్నివెట మహి 50 మన్సిదిఙ్ సుర్‍తాద్.
11 అయావెన్కా అహజియ రాజు, మరి 50 మన్సి సయ్‍నమ్‍దిఙ్‍ని వరిఙ్ నడిఃపిస్ని అతికారిఙ్ ఏలీయాబాన్ పోక్తాన్. నస్తివలె ఆ సయ్‍నమ్‍ది అతికారి వన్ని డగ్రు ఎక్సి సొహాండ్రె, “ఓ దేవుణు ప్రవక్త, నిఙి రాజు గజిబిజి డిగ్జి రఅ ఇజి వెహ్సినాన్”, ఇజి వన్నిఙ్ వెహ్తాన్. 12 నస్తివలె ఏలీయా, “నాను దేవుణు ప్రవక్త ఇహిఙ, ఆగాసమ్‍దాన్ సిస్సు వాజి, నిఙిని నీ వెట మని 50 మన్సిదిఙ్ సురిద్”, ఇజి వెహ్తిఙ్ సరి, వెటనె ఆగాసమ్‍దాన్ సిస్సు వాజి వన్నిఙ్‍ని వన్నివెట మహి 50 మన్సిదిఙ్ సుర్‍తాద్.
13 మరిబ అహజియ రాజు 50 మన్సి సయ్‍నమ్‍దిఙ్‍ని వరిఙ్ నడిఃపిస్ని అతికారిఙ్ ఏలీయాబాన్ పోక్తాన్. నస్తివలె అయా అతికారి వన్ని డగ్రు ఎక్సి సొహాండ్రె, ముణుకుఙ్ ఊర్‍జి ఈహు బత్తిమాల్‍తాన్, “ఓ దేవుణు ప్రవక్త, నా పాణమ్‍దిఙ్‍ని నీ పణిమన్సిర్ ఆతి యా 50 మన్సి పాణమ్‍కు నీ కణకదు నెగ్గెణ్ తోరితిఙ నఙిని వరిఙ్ కాపాడ్ఃఅ. 14 ఎందన్నిఙ్ ఇహిఙ మఙి ఇంక ముఙల వాతి రిఎర్ సయ్‍నమ్‍ది అతికారిఙని వరివెట వాతి మహి సయ్‍నమ్‍ది వరిఙ్ ఆగాసమ్‍దాన్ సిస్సు వాజి వరిఙ్ విజెరిఙ్ సుర్‍తాద్. అందెఙె నీను మా ముస్కు కనికారం తోరిసి మా పాణమ్‍కు కాపాడ్ఃఅ”, ఇజి ఏలీయెఙ్ బత్తిమాల్‍జి వెహ్తాన్.
15-16 అయావలె యెహోవ దూత, “నీను తియెల్ ఆఎండ ఆ సయ్‍నమ్‍ది అతికారి వెట సొన్”, ఇజి ఏలీయెఙ్ వెహ్తిఙ్, వాండ్రు నిఙితాండ్రె ఆ సయ్‍నమ్‍ది అతికారి వెట గొరొన్ డిగ్జి రాజు డగ్రు సొహాండ్రె, “యెహోవ వెహ్సినిక ఇనిక ఇహిఙ, ఇస్రాయేలు లోకుర్‍బాన్ దేవుణు సిల్లెండ్రా? నీను ఎందన్నిఙ్ ఎక్రోను పట్నమ్‍దు మని, దేవుణు ఆఇ బయల్‍జెబు డగ్రు పంజి సుడ్ఃజి రద్దు ఇజి నీ పణిమన్సిరిఙ్ పోకిస్తి. అందెఙె నీను ఎక్‍తి మంసమ్‍దాన్ మరి డిగ్ఇలె, నీను తప్ఎండ సానిలె”, ఇజి అహజియెఙ్ వెహ్తాన్.
యెహోరాము యూదా ప్రాంతమ్‍దు రాజు ఆతిక
17 యెహోవ ఏలీయా వెట వెహ్తి మాట వజనె అహజియ రాజు సాతాన్. అహిఙ వన్నిఙ్ కొడొః కొక్రార్ సిల్లిఙ్ వన్ని బదులు యెహోరాముb ఇనికాన్ రాజు ఆతాన్. యాక యెహోసాపాతు మరిసి యెహోరాము యూదా లోకురిఙ్ రాజు ఆజి రుండి పంటెఙ్ ఏలుబడిః కితి మహివలె యాక జర్గితాద్. 18 అహిఙ అహజియ రాజు కితి ఆఇ ఆఇ పణిఙ్ విజు, ఇస్రాయేలు రాజుర్ ఏలుబడిః కినివలె వారు కిని పణిఙ్ విజు రాసి ఇట్తి పుస్తకమ్‍దు రాస్త మనార్.
రాజుర్ కితి పణిఙ్ విజు రాసి ఇట్తి పుస్తకం (13:8)