ఉద్దం వందిఙ్ యెహోవెఙ్ వెన్‍బాజినిక
22
1 అయావెన్కా సిరియ దేసెమ్‍ది వరిఙ్‍ని ఇస్రాయేలుది వరిఙ్ మూండ్రి పంటెఙ్ ఉద్దం జర్గిఎండ మహాద్. 2 గాని మూండ్రి సమస్రమ్‍దు యూదా లోకుర్ ముస్కు రాజు ఆతి యెహోసాపాతు, ఇస్రాయేలు రాజు ఆతి అహాబుఙ్ దసుల్ ఆదెఙ్ వాతాన్. 3 నస్తివలె అహాబు వన్ని అతికారిఙ వెట, “మాటు, గిలాదు ప్రాంతమ్‍దు మని రామోతు పట్నం సిరియ రాజు కీదాన్ లాగె ఆఎండ పల్లక్ మనాట్. అక్క మాది ఇజి మీరు నెస్నిదెర్ గదె?” ఇజి వరిఙ్ వెహ్తాన్.4 అయావలె అహాబు, “నీను గిలాదు ప్రాంతమ్‍దు మని రామోతు పట్నం ముస్కు ఉద్దం కిదెఙ్ మా వెట వానిదా?” ఇజి యెహోసాపాతుఙ్ వెహ్తిఙ్ వాండ్రు, “నాను మీ వాండ్రునె, నా లోకుర్ నీ లోకుర్‍నె. నా గుర్రమ్‍కు విజు నీ గుర్రమ్‍కునె”, ఇజి వన్నిఙ్ వెహ్తాన్. 5 మరి యెహోసాపాతు అహాబు వెట, “యెలు యెహోవ డగ్రు మాటు సొనాటె వెన్‍బనాట్”, ఇజి వన్నిఙ్ వెహ్తాన్.
ప్రవక్తర్ సలహా వెహ్సినిక
6 అందెఙె ఇస్రాయేలు రాజు అహాబు, ఇంసు మింసు 400 మంది ప్రవక్తరిఙ్ కూక్‍పిస్తాండ్రె వరివెట, “గిలాదు ప్రాంతమ్‍దు మని రామోతు పట్నమ్‍దు నాను ఉద్దం కిదెఙ్ సొండ్రెఙ్‍నా? పోనినా?” ఇజి వరిఙ్ వెన్‍బాతిఙ్, వారు, “ఓ రాజు యెలు నీను ఉద్దం కిదెఙ్ సొండ్రెఙ్ ఆనాద్. యెహోవ ఆ పట్నమ్‍దిఙ్ నీ కీదు ఒప్పజెప్నాన్‍లె”, ఇజి వన్నిఙ్ వెహ్తార్.
7 గాని యెహోసాపాతు, “వీరె ఆఎండ, యెహోవ ప్రవక్తార్ లొఇ మరి ఎయెర్‍బ ఇబ్బెన్ సిల్లెరా?” ఇజి అహాబుఙ్ వెన్‍బతాన్. 8 అందెఙె అహాబు, “ఇమ్లా మరిసి ఆతి మీకాయా ఇని ఒరెన్ ప్రవక్త మనాన్. వన్నివెట యెహోవబాన్ వెన్‍బనాట్. గాని వాండ్రు నెగ్గి మాటెఙ్ వెహ్ఎన్. ఎసెఙ్‍బ నఙి పడిఃఎండ వర్గినాన్. అందెఙె వాండ్రు ఇహిఙ నఙి పడిఃఎద్”, ఇజి వన్నిఙ్ వెహ్తాన్. గాని యెహోసాపాతు, “ఓ రాజు, నీను ఆహు వెహ్‍మ”, ఇజి వన్నిఙ్ వెహ్తాన్. 9 అయావలె అహాబు వన్ని అతికారిఙ లొఇ ఒరెన్ వన్నిఙ్ కూక్తాండ్రె, “నీను బేగి సొన్సి ఇమ్లా మరిసి ఆతి మీకాయెఙ్ కూక్సి తగ్అ”, ఇజి వెహ్తాన్.
10 నస్తివలె ఇస్రాయేలు రాజుని యూదా రాజు ఆతి యెహోసాపాతు, రాజుర్ తొడిఃగిని సొక్కెఙ్ పొర్పాజి, సొమ్రోను పట్నమ్‍ది దార్‍బందం డగ్రు మని సిమసనం ముస్కు బస్త మహార్. ఆ రాజుర్ ముఙల ప్రవక్తర్ నిహారె యెహోవబాణిఙ్ వాని మాటెఙ్ నెసె ఆజి, అబ్బె మహి వరిఙ్ వెహ్సి మహార్. 11 అహిఙ కెనయనా మరిసి ఆతి సిద్కియా ఇనికాన్, ఇనుముదాన్ కొమ్‍కు తయార్ కిజి అసి వాతాండ్రె, “సిరియ సయ్‍నమ్‍ది వరివెట ఉద్దం కినివలె, యా ఇనుము కొమ్‍కణిఙ్ వరిఙ్ గుత్సి నాసనం కినిదెర్‍లె”, ఇజి యెహోవ వెహ్సినాన్ ఇహాన్. 12 అందెఙె బాన్ మహి ప్రవక్తర్ విజెరె, సిద్కియా వెహ్తి వజనె, “ఓ రాజు గిలాదు ప్రాంతమ్‍దు మని రామోతు పట్నం యెహోవ నీ కీదు ఒప్పజెప్నాన్‍లె. నీను బాన్ ఉద్దం కిజి గెల్‍స్నిలె”, ఇజి వన్నిఙ్ వెహ్తార్.
13 అహిఙ అహాబు పోకిస్తి ఆ అతికారి, మీకాయా డగ్రు సొహాండ్రె, “ప్రవక్తర్ విజెరె అహాబు రాజు గెల్‍స్నాన్ ఇజి వెహ్సినార్. మరి నీనుబ అయావజనె వెహ్తిఙ బాగ మంజినాద్”, ఇజి వన్నిఙ్ వెహ్తాన్. 14 గాని మీకాయా, “నాను పాణం మని యెహోవ ముస్కు ఒట్టు పొక్సి వెహ్సిన. యెహోవ నఙి వెహ్నికదె నాను వెహ్నా”, ఇజి వన్నిఙ్ వెహ్తాన్.
15 అయావెన్కా మీకాయా, ఇస్రాయేలు రాజు ఆతి అహాబు డగ్రు వాతిఙ్, “ఓ మీకాయా, నీను ఇనిక ఇజిని? రామోతు పట్నమ్‍దు మాపు ఉద్దం కిదెఙ్ సొండ్రెఙ్‍నా? పోనినా? ఇజి వన్నిఙ్ వెన్‍బాతిఙ్ వాండ్రు, సొన్! నీను బాన్ సొన్సి ఉద్దం కిజి గెల్‍స్నాలె ఇజినిసు. గిలాదు ప్రాంతమ్‍దు మని రామోతు పట్నం యెహోవ నీ కీదు ఒప్పజెప్నాన్‍లె ఇజినిసు”, ఇజి వన్నిఙ్ వెహ్తాన్. 16 గాని అహాబు, “యెహోవ పేరుదాన్ పర్మణం కిజి, నఙి నిజమ్‍నె వెహ్అ ఇజి నిఙి ఎసొడు సుట్కు వెహ్తా”, ఇహాన్.
17 నస్తివలె మీకాయా, “గవ్‍డుఃఎన్ సిల్లి గొర్రెఙ్ లెకెండ్ ఇస్రాయేలు లోకుర్ విజెరె గొరొక ముస్కు సెద్రితి మనిక నాను సుడ్ఃజిన, విరిఙ్ నడిఃపిస్ని నెయ్‍కి ఎయెన్‍బ సిల్లెన్. వారు సాంతి సమాదానమ్‍దాన్ వరి వరి ఇల్కాఙ్ మర్‍జి సొనికదె నెగెద్ ఇజి యెహోవ వెహ్సినాన్”, ఇజి అహాబుఙ్ వెహ్తాన్.
18 నస్తివలె అహాబు, “సుడ్ఃఅ, యా ప్రవక్త ఎసెఙ్‍బ నా వందిఙ్ నెగ్గి మాటెఙ్ వెహ్ఎన్, సెఇ మాటెఙ్‍నె వెహ్నాన్ ఇజి నిఙి వెహ్తా గదె”, ఇజి యెహోసాపాతుఙ్ వెహ్తాన్. 19-20 అయావలె మీకాయా, యెహోవ సిమసనం ముస్కు బస్తి మనిక, వాండ్రు మంజిని బాడ్డిదు మని సయ్‍నమ్‍కు వన్ని ఉణెర్ దరిఙ్, డెబ్ర దరిఙ్ నిహి మనిక నాను సుడ్ఃత. యెలు యెహోవబాణిఙ్ వాతి మాట మీరు వెండ్రు, “అహాబు, రామోతు గిలాదు పట్నమ్‍దు సొన్సి ఉద్దమ్‍దు ఓడిఃజి సొనాన్‍లె ఇజి మీ లొఇ ఎయిదెర్ వెహ్నిదెర్?” ఇజి వరిఙ్ వెన్‍బతాన్. వారు ఒరెన్ ఒరెన్ ఉండ్రి ఉండ్రి సలహా వెహ్తార్. 21 నస్తివలె ఉండ్రి ఆత్మ, యెహోవ ముఙల వాతాండ్రె, “నాను వన్నిఙ్ సొన్సి వెహ్‍న”, ఇహాన్. అందెఙె యెహోవ, “నీను వన్నిఙ్ ఎలాగ్ వెహ్ని?” ఇజి వెన్‍బాతిఙ్, 22 వాండ్రు, “నాను సొనానె అహాబు ప్రవక్తర్ వెయ్‍దు అబద్దం వెహ్ని ఆత్మ ఆన మంజిన”, ఇజి వెహ్తాన్. అహిఙ యెహోవ, “నీను సొన్సి అహాబు మన్సు లొఇ నానే గెల్‍స్నాలె”, ఇజి వన్నిఙ్ వెహ్‍పిస్అ ఇజి ఆత్మదిఙ్ వెహ్తాన్. 23 అయావలె మీకాయా, “యెహోవ నిఙి సిక్స సీదెఙ్ ఇజి ఒడిఃబితాండ్రె, నీ ప్రవక్తర్ వెయ్‍దు అబద్దం వర్గిని ఆత్మ ఇట్త మనాన్”, ఇజి అహాబుఙ్ వెహ్తాన్.
24 అయావెన్కా కెనయనా మరిసి సిద్కియా, మీకాయా డగ్రు వాజి, “లెప్పద్ డక్తాండ్రె యెహోవ ఆత్మ నఙి డిఃసి, నీ వెట వర్గిజినాన్ ఇజి నీను నిజమ్‍నె నమిజినిదా?” ఇజి వన్నిఙ్ వెహ్తాన్. 25 గాని మీకాయా, “నీనుబ సొన్సి ఉండ్రి గది లొఇ డాఙ్‍నిలె. నస్తివలె ఇనిక జర్గినాద్‍లెనో నీను నెస్ని”, ఇజి సిద్కియెఙ్ వెహ్తాన్. 26-27 నస్తివలె అహాబు, “మీకాయెఙ్ తొహ్సి ఒసి, పట్నమ్‍దు అతికారి ఆతి ఆమోను మరిసి యోవాసుబాన్ విన్నిఙ్ ఒప్పజెప్తు. నాను ఉద్దమ్‍దాన్ నెగ్రెండ ఇండ్రొ మర్‍జి వాని దాక, విన్నిఙ్ జేలిదు ఇడ్‍జి, ఇజ్రి తిండి, బుకెణ్ ఏరు సీజి మండ్రు”, ఇజి వన్ని అతికారిఙ ఆడ్ర సితాన్. 28 అయావలె ఆ మాట మీకాయా వెహాండ్రె, “ఇబ్బె మని లోకురాండె, నాను వెహ్తి మాట యెహోవబాణిఙ్ వాతి మాటనో ఆఎదో ఇజి మీరు నెస్తెఙ్ ఇహిఙ, అహాబు రాజు ఉద్దం కిజి నెగ్రెండ ఇండ్రొ మర్‍జి వానాండ్రొ సిల్లెనో ఎద్రు సుడ్ఃజి మండ్రు, సూణాట్”, ఇహాన్.
ఉద్దమ్‍దు అహాబు రాజు సాతిక
29 అయావెన్కా ఇస్రాయేలు రాజు ఆతి అహాబుని యూదా రాజు యెహోసాపాతు యా రిఎర్ కూడిఃతారె, గిలాదు ప్రాంతమ్‍దు మని రామోతు పట్నమ్‍దు ఉద్దం కిదెఙ్ సోతార్. 30 నస్తివలె అహాబు, “మాటు ఉద్దం కిదెఙ్ సొనివలె, నాను రాజు ఇజి ఎయెర్‍బ నెస్ఎండ మండ్రెఙ్ ఆఇ సొక్కెఙ్ పొర్పాన. నీను మాత్రం నా సొక్కెఙ్a పొర్పాఅ”, ఇజి యెహోసాపాతుఙ్ వెహ్తాండ్రె, వాండ్రు ఆఇ సొక్కెఙ్ పొర్పాజి ఉద్దం కిదెఙ్ సొహాన్.
31 అయావలె సిరియ దేసెమ్‍ది రాజు, వన్ని రద్దం బండిఙ్ నడిఃపిస్ని 32 మంది అతికారిఙ, “మీరు ఇజ్రిపెరి వరిఙ్ ఎయెఙ్‍బ సప్‍మాట్. ఇస్రాయేలు రాజుదిఙ్‍నె సప్‍తు.”, ఇజి వరిఙ్ ఆడ్ర సితాన్. 32 అందెఙె వారు ఉద్దం కిదెఙ్ సొహివలె యెహోసాపాతుఙ్ సుడ్ఃతారె, ఇస్రాయేలు రాజు ఆతి అహాబు వీండ్రె ఇజి వన్నిఙ్ ఉల్‍ప్సి ఒసి మహిఙ్, వాండ్రు డట్టం డేడిఃస్తాన్‍కక, 33 వాండ్రు ఇస్రాయేలు లోకురి రాజు ఆఎన్ ఇజి ఆ అతికారిఙ్ నెస్తారె వన్నిఙ్ ఉల్‍ప్తెఙ్ డిఃస్తార్. 34 గాని సయ్‍నమ్‍దికాన్ ఒరెన్ గురి సుడ్ఃజి ఎహ్‍ఎండ, మాముల్‍గ ఎహ్‍త డిఃస్తాన్‍కక, అయా అంబు అహాబు పొర్పాతి మహి ఇనుము సొక్క సందుదు గుత్తాద్. నస్తివలె రాజు వన్ని రద్దం బండి నడిఃపిస్ని వన్నిఙ్, “నఙి దెబ్బ తగ్లితాద్, రద్దం బండి బేగి మహ్సి ఉద్దమ్‍దాన్ తప్రిసి పడఃకాద్ ఒఅ”, ఇజి వెహ్తాన్.
35 అయా నాండిఙ్ నండొ ఉద్దం జర్గిజినె మహాద్‍కక, అహాబు వన్ని రద్దం బండి ముస్కు బస్తాండ్రె సిరియ సయ్‍నం దరొట్ బేసినె మహాన్. వన్నిఙ్ తగ్లితి దెబ్బదాన్ నెత్తెర్ సోతాదె రద్దం బండిదు గడ్డ తొహ్తాద్‍కక, వాండ్రు పొదొయ్ వేడఃదు సాతాన్. 36 అహిఙ పొద్దు డిగ్ని వేడఃదు ఇస్రాయేలు సయ్‍నమ్‍ది వరిఙ్, మీ మీ ప్రాంతమ్‍కాఙ్, పట్నమ్‍కాఙ్ మర్‍జి సొండ్రు ఇజి డేడిఃసి వెహ్తార్.
37 అయా లెకెండ్ ఆజి అహాబు సాతిఙ్, వన్ని పీన్‍గుదిఙ్ సొమ్రోను పట్నమ్‍దు ఒతారె ముస్తార్. 38 అయావలె సొమ్రోనుదు రంకు బూలానికెఙ్ ఏరు ఈబాని గడ్డదు, వన్ని రద్దం బండి ఒతారె నొహ్‍తిఙ్, యెహోవ వెహ్తి మహి మాట వజ, నుక్కుడిఃఙ్ వాతెనె వన్ని నెత్తెర్ నాక్‍తె. 39 అహిఙ అహాబు కితి ఆఇ ఆఇ పణిఙ్‍ని వాండ్రు కితి విజు పణిఙ్, ఆహె వాండ్రు తొహిస్తి బంగ్ల వందిఙ్, పట్నమ్‍క వందిఙ్, ఇస్రాయేలు రాజుర్ ఏలుబడిః కితివలె వారు కిబిస్తి పణిఙ్ విజు రాసి ఇట్తి పుస్తకమ్‍దు రాస్త మనార్. 40 అయావలె అహాబు సాతాండ్రె వరి అన్నిగొగొర్‍బాన్ సొహాన్. (నస్తివలె వన్ని పీన్‍గుదిఙ్ వరి అన్నిగొగొరిఙ్ ముస్తి దూకిదు ఒత ముస్తార్.) అయావెన్కా అహాబు బదులు వన్ని మరిసి ఆతి అహజియ ఇనికాన్ రాజు ఆతాన్.
యెహోసాపాతు వందిఙ్ వెహ్సినిక
41 ఇస్రాయేలు లోకురిఙ్ రాజు ఆతి అహాబు ఏలుబడిః కిజి నాల్గి పంటెఙ్ ఆతి మహిఙ్, ఆసా మరిసి యెహోసాపాతు యూదా లోకుర్ ముస్కు రాజు ఆత మహాన్. 42 వాండ్రు రాజు ఆతివలె వన్ని వయ్‍సు 35 పంటెఙ్ ఆత మహాద్. వాండ్రు యెరూసలేమ్‍దు 25 పంటెఙ్ ఏలుబడిః కితాన్. వరి యాయ పేరు అజూబా ఇనికాద్. ఇది సిల్‍హి ఇని వన్ని పొటదికాద్. 43 అహిఙ యెహోసాపాతు వరి బుబ్బ నడిఃతి వజనె వీండ్రుబ నడిఃజి, యెహోవ ఎద్రు ఎదార్దమ్‍దాన్ బత్కిజి వాతాన్. గాని వాండ్రు గొరొక ముస్కు మని పూజ బాడ్డిఙ్ లాగ్జి పొక్ఎతాన్‍కక, ఆ బాడ్డిఙనె లోకుర్ పూజెఙ్ సీజి, దూపం సుర్‍జి మహార్. 44 అయావలె యెహోసాపాతు ఇస్రాయేలు రాజు ఆతి అహాబు వెట సాంతిదాన్ మండ్రెఙ్ ఇజి ఉండ్రి ఒపుమానం కిబె ఆతాన్. 45 అహిఙ యెహోసాపాతు కితి ఆఇ ఆఇ పణిఙ్‍ని వాండ్రు కితి ఉద్దమ్‍క వందిఙ్, వాండ్రు కితి ఏలుబడిః వందిఙ్, యూదా రాజుర్ ఏలుబడిః కితివలె వారు కిబిస్తి పణిఙ్ విజు రాసి ఇట్తి పుస్తకమ్‍దు రాస్త మనార్. 46 అహిఙ వరి బుబ్బ ఆసా ఏలుబడిః కిజి మహి కాలమ్‍దు, మొగ్గకొడొఃదిఙ్ మొగ్గకొడొః కూడ్ఃజి మహికార్ ఎంజిత మహార్‍కక, వరిఙ్ యెహోసాపాతు వన్ని ప్రాంతమ్‍దాన్ డక్సి పేర్‍తాన్. 47 ఆ కాలమ్‍దు ఎదోము దేసెమ్‍దు రాజు సిల్లెండ మహాన్‍కక, బాన్ ఒరెన్ అతికారి ఏలుబడిః కిజి మహాన్. 48 అహిఙ యెహోసాపాతు బఙారం తపిస్తెఙ్ ఇజి ఓపిరు దేసెమ్‍దు సొండ్రెఙ్ తర్సీసు సొని ఓడెఃఙ్ తయార్ కిబిస్తాన్. గాని ఆ ఓడెఃఙ్ ఓపిరు దేసెమ్‍దు సొన్ఎండనె ఎసోన్‍గెబెరు ఇని పట్నం డగ్రు అక్కెఙ్ బద్దెఙ్ ఆజి ముడిఃగితె సొహె. 49 నస్తివలె అహాబు మరిసి ఆతి అహజియ, “నా సేవ పణిమన్సిరిఙ్, నీ సేవ పణిమన్సిర్ వెట ఓడెఃఙ పోకిస్అ”, ఇజి యెహోసాపాతుఙ్ వెహ్తాన్. గాని యెహోసాపాతు అక్క ఒపుకొడెఃఎతాన్. 50 అయావెన్కా యెహోసాపాతు సాతాండ్రె వరి అన్నిగొగొర్‍బాన్ సొహాన్. నస్తివలె వన్ని పీన్‍గుదిఙ్ వరి అన్నిగొగొ ఆతి దావీదు పట్నమ్‍దు మని దూకిదు ఒత ముస్తార్. అయావలె యెహోసాపాతు బదులు వన్ని మరిసి ఆతి యెహోరాము ఇనికాన్ రాజు ఆతాన్.
ఇస్రాయేలు లోకుర్ ముస్కు అహజియ రాజు ఆతిక
51 అయావెన్కా యూదా లోకుర్ ముస్కు రాజు ఆతి యెహోసాపాతు ఏలుబడిః కిజి 17 పంటెఙ్ ఆతి మహిఙ్, అహాబు మరిసి అహజియ ఇస్రాయేలు లోకుర్ ముస్కు రాజు ఆతాండ్రె, సొమ్రోను పట్నమ్‍దు మంజి రుండి పంటెఙ్ ఏలుబడిః కితాన్. 52 గాని అహజియ యెహోవ ఎద్రు సెఇ పణి కిజి నడిఃతాన్. వీండ్రు వరి యాయ బుబ్బర్b కితి సెఇ పణిఙ్ వజని, మరి నెబాతు మరిసి యరొబాము ఇస్రాయేలు లోకురిఙ్ సెఇ పణిఙ్ కిబిసి పాపం దరిఙ్ నడిఃపిస్తి వజనె అహజియబ ఇస్రాయేలు లోకురిఙ్ సెఇ పణిఙ్ కిబిసి నడిఃపిస్తాన్. 53 అహజియ బయలు దెయమ్‍కాఙ్ మాడిఃసి పూజ కిజి మహాన్. వాండ్రు వరి బుబ్బ కితి వజనె, ఇస్రాయేలు లోకురిఙ్ దేవుణు ఆతి యెహోవెఙ్ ఒద్దె కోపం రేప్తాన్.