తపు కితి దన్నిఙ్ సీని పూజ వందిఙ్ వెహ్సినిక
6
1-4 మరిబ యెహోవ మోసే వెట, “ఎయెఙ్‍బ వన్ని పడఃకదికాన్ ఇనికబ పాల్లి సితి మహిఙ, యెహోవెఙ్ పడిఃఇ పాపం ఎయెన్ ఇహిఙ కిజినాండ్రొ వాండ్రు ఇహిఙ వన్నిఙ్ సీని మంజినిక ఆతిఙ్‍బ, తన్‍క ఇడ్ని మంజినిక ఆతిఙ్‍బ, డొఙ కినిక ఆతిఙ్‍బ, వన్ని పడఃకాది వన్నివెట అబదం వర్గినికాన్ ఆతిఙ్‍బ, వన్ని పడఃకాది వన్నిబాన్ బెద్రిసి లాగె ఆనికాన్ ఆతిఙ్‍బ, కఙిని మంజినిక దొహ్‍క్తిఙ అక్క దొహ్‍క్తెఙ్ సిల్లె ఇజి సాట్నికాన్ ఆతిఙ్‍బ, లోకు ఇని దన్నిఙ్ సుడ్ఃజి వరి మన్సు బాన్ ఇడ్‍జినారొ అక్కెఙ్ విజు ఇహిఙ ఇని దన్ని లొఇ వాండ్రు అబదం వర్గిజి పర్మణం కిజి, పాపం కిజినాండ్రొ అక్క ఇనిక ఆతిఙ్‍బ వాండ్రు మరి మర్‍జి ఒసి సీదెఙ్ వలె. 5 ఇని దన్ని వందిఙ్ ఇహిఙ అబదం వర్గిన మంజినాన్‍నొ, అక్క పూర్తి మహ్సి సీదెఙ్ వలె. అక్కదె ఆఎండ మరి అయ్‍దు వంతుఙ్‍బ వన్నిఙ్ సీదెఙ్ వలె. యాక వాండ్రు తపుఙ్ మాయ్‍ని పూజ సీని నాండ్రిఙ్‍నె విజెరె ఎద్రు అయా ఎజుమానిఙ్ సీదెఙ్ వలె. 6 వాండ్రు కితి తపు వందిఙ్ యెహోవెఙ్ సీని దన్ని లొఇ నీను ఎసొ సీదెఙ్ ఇజి వెహ్నిదొ నసొ వన్నిఙ్ మంజిని దన్ని లొఇ ఇని జడ్‍పు సిల్లి మెండ పోతు పుజెరి డగ్రు తత్తెఙ్ వలె. 7 వాండ్రు తతిక యెహోవ డిగ్జి వాని టంబు గుడ్సాదు, పుజెరి ఒసి వన్ని పేరుదాన్ వాండ్రు కితి తపు వందిఙ్ పూజ సీదెఙ్ వలె. నస్తివలె వాండ్రు ఇని తపు కిన మంజినాండ్రొ అయా తపు దేవుణు మాయ్‍ప్నాన్”, ఇజి వెహ్తాన్.సుర్ని సీని పూజ వందిఙ్ వెహ్సినిక
8-9 మరి యెహోవ మోసే వెట, “నీను ఆరోనుఙ్‍ని వన్ని మరిసిరిఙ్ వెహ్అ. పొదొయ్‍దాన్ అసి పెందాల్ జాయ్ ఆనిదాక పూజ బాడ్డి ముస్కు దూపం సుర్జినె మండ్రెఙ్ వలె. ఎస్తినస్తివలె పూజ బాడ్డి ముస్కు సిస్సు కసినె మండ్రెఙ్ వలె. సుర్ని సీని పూజ వందిఙ్ మని పద్దతి యాకాదె. 10 పుజెరి వన్ని ఒడొఃల్ తోర్ఎండ సన్నం తిరిజి అడఃపాజి నెయ్‍తి నిరీ సొక్కెఙ్ తొడిఃగిజి దూపం సుర్ని నీరు కెర్‍సి పూజ బాడ్డి ముస్కు ఇడ్‍దెఙ్ వలె. 11 వెన్కా వన్ని సొక్కెఙ్ మారిసి, అయా నీరు తాగ్‌డెఃఙ వెల్లి మంజిని నెగ్గి బాడ్డిదు ఒసి విసిర్‍దెఙ్ వలె. 12 అయా పూజ బాడ్డి ముస్కు సిస్సు కసి మండ్రెఙ్ వలె. అక్క నమ్‍నిక ఆఎద్. రోజు పెందాల్‍నె పుజెరి పూజ బాడ్డి ముస్కు వెహ్కు పహ్సి, దన్ని ముస్కు పూజ వందిఙ్ మని దూపం సుర్జి, సాంతి పూజ వందిఙ్ తని మంజిని కోడ్డి కొడువు లాగ్‌జి సుర్‍దెఙ్ వలె. 13 పూజ బాడ్డి ముస్కు ఎస్తినస్తి వలె సిస్సు కసినె మండ్రెఙ్ వలె, అక్క నమ్‍నిక ఆఎద్.”
అగ్గం పూజ వందిఙ్ వెహ్సినిక
14 మరి ఆరోను మరిసిర్ యెహోవ డిగ్జి వాని టంబు గుడ్సా డగ్రు మని దూపం సుర్ని పూజ బాడ్డి ముస్కు అగ్గం తనిక విజు సుర్జి పూజ కిదెఙ్ వలె. అగ్గం తని పూజ వందిఙ్ మని పద్దతి యాకాదె. 15 అయా అగ్గం తని దన్ని లొఇ పుజెరి గొదుము దూరు ముటెణ్ కెర్‍సి, నూనె, గుగ్గిలం దన్ని లొఇహాన్ లాగ్‌జి ఉండ్రి గుర్తు వజ యెహోవెఙ్ నెగ్గి వాసన సొని లెకెండ్ పూజ బాడ్డి ముస్కు సుర్జి పూజ కిదెఙ్ వలె. 16 అయా అగ్గం లొఇ ఎంజ్ని మంజినిక ఆరోనుని వన్ని మరిసిర్ తిండ్రెఙ్ వలె. యెహోవ డిగ్జి వాని టంబు గుడ్సా డగ్రు అక్క పుల్లఙ్ కిఎండ తిండ్రెఙ్ వలె. ఇహిఙ నెగ్గి బాడ్డి డగ్రు అక్క తిండ్రెఙ్ వలె. 17 అక్క పుల్లఙ్ కిజి పిట్టం సుర్జి తినిక ఆఎద్. ఎందన్నిఙ్ ఇహిఙ నఙి పూజ వజ సుర్జి సీదెఙ్ వారు తతి దన్ని లొఇ నాను వరిఙ్ వాట సితి మన. పాపం మాయ్‍ని వందిఙ్ సీని పూజ వజ, తపు మాయ్‍ని వందిఙ్ సీని పూజ వజ యాక ఒద్దె నెగ్గిక. 18 ఆరోను కుటుమ్‍దికార్ విజెరె యాక తిండ్రెఙ్ వలె. యాకాదె సుర్ని సీని అగ్గమ్‍క లొఇ ఎల్లకాలం మిఙి మని ఉండ్రి పద్దతి. పూజ బాడ్డి ముస్కు ఒనిక విజు నెగ్గిక ఆనాద్.
19-20 మరిబ యెహోవ మోసే వెట, “ఆరోనుఙ్ దీవిసి ఎర్‍పాటు కితి నాండిఙ్ వాండ్రుని వన్ని కుటుమ్‍దికార్ అగ్గం సీని పూజ ఇనిక ఇహిఙ, తూమెణ్ గొదుము దూరు లొఇ సెగం కిజి పెందాల్‍దిఙ్ సెగం, పొదొయ్‍దిఙ్ సెగం పది వంతుఙ్ లాగ్‌జి సీదెఙ్ వలె. 21 పెనమ్‍దు నూనె వాక్సి పిట్టం సుర్‍దెఙ్ వలె. పిట్టమ్‍కు సుహ్తి వెన్కా అయా పిట్టమ్‍క లొఇ సెగం యెహోవెఙ్ నెగ్గి వాసన సొని లెకెండ్ పూజ బాడ్డి ముస్కు ఒసి సుర్‍దెఙ్ వలె. 22 ఆహె ఆరోనుఙ్ బద్లు వన్ని మరిసిర్ లొఇ పెరి పుజెరి వందిఙ్ కేట ఆనికాన్‍బ అయావజనె కిదెఙ్ వలె. యాక యెహోవ ఎర్‍పాటు కితి పద్దతి కక, అక్క విజు వారు పూర్తి సుర్‍దెఙ్ వలె. 23 అగ్గం వందిఙ్ లాగ్‌జి తనిక విజు పుజెరి సిస్సుదు సుర్‍దెఙ్ వలె. అక్క తినిక ఆఎద్.”
పాపం సొని వందిఙ్ కిని పూజ.
24-25 మరిబ యెహోవ మోసే వెట, “నీను ఆరోనుఙ్‍ని వన్ని కుటుమ్‍ది వరిఙ్ ఈహు వెహ్అ. యెహోవ డిగ్జి వాని టంబు గుడ్సా డగ్రు ఇహిఙ, నీను సుర్ని సీని పూజ వందిఙ్ కోడ్డి కత్ని బాన్‍నె, పాపం సొని పూజ వందిఙ్ తతి కోడ్డిబ కతెఙ్ వలె. యాక ఒద్దె నెగ్గిక ఆనాద్. 26 పాపం మాయ్‍ని వందిఙ్ పూజ కితి పుజెరినె అయా కండ తిండ్రెఙ్ వలె. అయాక యెహోవ డిగ్జి వాని టంబు గుడ్సా డగ్రు తిండ్రెఙ్ వలె. ఇహిఙ ఒద్దె నెగ్గి బాడ్డి డగ్రు ఒసి తిండ్రెఙ్ వలె. 27 అయా కండదు రోస్ని వస్తుఙ్ విజు దన్నిఙ్ సెందితికెఙ్ ఆనె. అయా కోడ్డిది నెత్తెర్ ఎయె సొక్కద్‍బ కరాజితిఙ అయా సొక్క నెగ్గి బాడ్డిదునె నొర్‍బదెఙ్ వలె. 28 అయా కండ వర్ని కుండ పెడెఃల్ డెఃయ్‍దెఙ్ వలె. ఒకొవేడః అక్క కంసు తబ్లదు వహ్తిఙ, సుబ్బరం మిడిఃసి ఏరుదాన్ నొర్‍దెఙ్ వలె. 29 పుజెర్‍ఙు ఆతికార్ విజెరె అక్క తిండ్రెఙ్ వలె. యాక ఒద్దె నెగ్గిక. 30 మరి పాపం సొని పూజ వందిఙ్ తని మంజిని కోడ్డి యెహోవ డిగ్జి వాని టంబు గుడ్సాదు తసి కత్సి, ఒద్దె నెగ్గి బాడ్డిదు నెత్తెర్ వడిఃప్తిఙ, అయా కోడ్డి కండ తినిక ఆఎద్. అయా కోడ్డి విజు సిస్సుదు సుర్‍దెఙ్ వలె.”