నిర్గమ 9

అయ్‍గుప్తుది వరి పస్వి సాతిక

1 అయావెన్కా యెహోవ, మోసే వెట, “నీను పరో డగ్రు సొన్సి యా లెకెండ్ వెహ్అ. ‘ఎబ్రి లోకురిఙ్ దేవుణు ఆతి యెహోవ నఙి పూజ సీజి మాడిఃస్తెఙ్ నా లోకురిఙ్ పోక్అ. 2 నీను వరిఙ్ ఒకొవేడః పోకిస్ఎండ ఇడ్‍జి మహిఙ, 3 ఇదిలో, మడిఃఙ మని నీ పస్వి ముస్కు యెహోవ వన్ని సత్తు తోరిస్నాన్. నీ కోడ్డిఙ్, నీ గుర్రమ్‍కు, నీ గాడ్ఃదెఙ్, ఒంటెఙ్, గొర్రెఙ్, ముస్కు నండొ బాదకారం ఆతి కల్లర్ జబ్బుఙ్ పోక్నాన్. 4 గాని ఇస్రాయేలు లోకురి పస్విదిఙ్‍ని అయ్‍గుప్తుది వరి పస్విదిఙ్ యెహోవ కేట కినాన్. ఇస్రాయేలు లోకురిఙ్ మని పస్వి లొఇ ఉండ్రిబ సాఎద్. 5 యాక యెహోవ ఎర్‍పాటు కితాన్. యా దేసెమ్‍దు విగెహిఙ్‍నె యా కారెం జర్గినాద్‍లె’”, ఇజి వెహ్తాన్. 6 మహ్సనాండిఙ్ యెహోవ యా కారెం కితాన్‌ కక, అయ్‍గుప్తుది వరి పస్వి విజు సాతె. గాని ఇస్రాయేలురిఙ్ సెందితి పస్వి లొఇ ఉండ్రిబ సాఎతాద్. 7 అయావలె ఇస్రాయేలు లోకురి పస్వి సాతాదొ, సిల్లెనో ఇజి నెస్ని వందిఙ్ పరో వన్ని లోకురిఙ్ పోక్తాన్. ఇస్రాయేలు లోకురి పస్వి లొఇ ఉండ్రిబ సాదెఙ్ సిల్లె ఇజి పరో నెస్తాన్. గాని వన్ని మన్సు మాత్రం గర్ర కితాండ్రె అయా లోకురిఙ్ పోక్‍ఎతాన్.

అయ్‍గుప్తు లోకురిఙ్ పొక్కుఙ్ సోతిక

8 అయావలె యెహోవ, మోసే ఆరోను వెట, “మీ ముట్టి నిండ్రు నీరు కెర్‍సి అస్తు. అక్క పరో సుడ్ఃజి మహిఙనె మోసే ఆగాసం దరిఙ్ గాలిదు విసిర్‍పిన్. 9 అక్క పల్‍సాన్ దూల్లి లెకెండ్ ఆజి అయ్‍గుప్తు దేసెం విజు సెద్రినాద్. అయా దూల్లి అయ్‍గుప్తు దేసెమ్‍దు మని విజు జంతుఙని లోకురిఙ్ కస్తిఙ ఒడొఃల్ విజు పొక్కుఙ్ సోనె”, ఇజి వెహ్తాన్.

10 అందెఙె వారు నీరు గుటదాన్ నీరు కెర్‍త అస్త సొహారె పరో ఎద్రు నిహార్. నస్తివలె మోసే ఆగాసం దరిఙ్ నీరు విసిర్‍తిఙ్‍ సరినె లోకాఙ్, జంతుఙ పొక్కుఙ్ సోతెఙ్ మొదొల్‍స్తె. 11 అయా పొక్కుఙ్ సోతిఙ్ అయ్‍గుప్తుది గురుఙ్ మోసే ఎద్రు నిల్‍తెఙ్ అట్ఎతార్. అయా పొక్కుఙ్ బాన్ మని గురుఙబ సోతె. 12 గాని యెహోవ మోసే వెట వెహ్తి లెకెండ్‍నె పరో మన్సు మాత్రం నండొ గర్ర ఆతాద్. వాండ్రు వరి మాట వెన్ఎతాన్.

వడుఃఙు పిరు వాజినిక

13 అయావలె యెహోవ మోసే వెట, “నీను పెందాల్‍నె నిఙ్‍జి పరో ఎద్రు నిల్అ. ‘నఙి పూజ సీజి మాడిఃస్తెఙ్, నా లోకురిఙ్ పోక్అ ఇజి ఎబ్రి లోకురిఙ్ దేవుణు ఆతి యెహోవ వెహ్సినాన్‌’ ఇజి వన్నిఙ్ వెహ్అ. 14 నీను గాని యెలు నా లోకురిఙ్ పోక్ఎండ మహిఙ నీ ముస్కుని నీ అడ్గి మని అతికారిఙ ముస్కు, నీ లోకురి ముస్కు విజు రకమ్‍కాణి జబ్బు నాను పోకిస్న. నస్తివలె నా నని దేవుణు బూమి ముస్కు ఎయెన్ సిల్లెన్ ఇజి నీను నెసె ఆని. 15 నాను నా సత్తుదాన్ ఉండ్రి రకమ్‍ది జబ్బు తపిస్త ఇహిఙ అక్క నిఙిని నీ లోకురిఙ్ బూమి ముస్కు ఎద్‍గారె సిల్లెండ కితాద్‍మరి. 16 గాని నా పేరు యా బూమిద్ మని లోకుర్ విజెరె నెసె ఆని వందిఙ్, నా గొప్ప సత్తు ఇనికాదొ నిఙి కిని దన్నితాన్ వారు నెసె ఆని వందిఙ్, నిఙి రాజు అతికారమ్‍దు ఇట్తామన. 17 నీను మరిబ గర్ర ఆజి నా లోకురిఙ్ సొండ్రెఙ్ సరి సిఎండ అడ్డు కిజిని. 18 గాని ఇదిలో, విగెహిఙ్ యా టయమ్‍దు లావునండొ ఉడ్డిలమ్‍దాన్ వడుఃఙు పిరు నాను వాక్నాలె. అయ్‍గుప్తు రాజెం లెకెండ్ ఎర్‍పాటు కితి బాణిఙ్ అసి యెలుదాక ఎసెఙ్‍బ నని పిరు వాదెఙ్ సిల్లె. 19 అందెఙె యెలు నీను నీ లోకురిఙ్ పోక్సి, నీ పస్విదిఙ్, బయ్‍లుదు మని విజు, బేగి పాడఃఎండ మంజిని బాడ్డిదు తపిస్తెఙ్ ఆడ్ర సిఅ. ఎందన్నిఙ్ ఇహిఙ బయ్‍లుదు ఇనిక మంజినాదో, దన్ని ముస్కు వడుఃఙు అర్నాద్. నస్తివలె లోకు ఆతిఙ్‌బ, పస్వి ఆతిఙ్‌బ బాన్ మని ఇనిక ఆతిఙ్‌బ సానాద్”, ఇజి యెహోవ వెహ్తి లెకెండ్ మోసే పరోబాన్ సొహ వెహ్తాన్.

20 అయావలె పరో అడ్గి మని అతికారిఙ లొఇ కొకొండార్ యెహోవ మాటదిఙ్ తియెల్ ఆతారె, వెటనె వరి పస్విదిఙ్‍ని వరి పణిమన్సిరిఙ్ ఇల్కాఙ్ తతార్. 21 గాని కొకొండార్ యెహోవ మాటదిఙ్ లెక్క కిఎతార్. ననికార్ విజు వరి పణిమన్సిరిఙ్, పస్విదిఙ్ ఇల్కాఙ్ తెఎండ బానె డిఃస్తార్.

22 అయావలె యెహోవ మోసే వెట, “నీ కియు ఆగాసం దరిఙ్ సాప్అ. యా అయ్‍గుప్తు దేసెమ్‍దు మని లోకుర్ ముస్కుని పస్వి ముస్కు, మడిఃఙ మని పంట ముస్కు వడుఃఙు పిరు వాఙ్‍నాద్”, ఇజి వెహ్తాన్. 23 నస్తివలె మోసే, వన్ని కీదు మని డుడ్డు ఆగాసం దరిఙ్ సాప్తిఙ్ సరినె, యెహోవ ఉర్‍ముఙ్ ఉర్‍మిసి, మెర్‍పుఙ్ మెర్‍పిసి, ఉడ్డిలమ్‍దాన్ వడుఃఙు పిరు బూమి ముస్కు వాక్తాన్. అయ్‍గుప్తు దేసెం విజు పిడుఃగుఙ్ అర్‍ప్సి వడుఃఙుఙ్ వాక్తాన్. 24 అయా లెకెండ్ వడుఃఙు పిరు వాజి మహిఙ్, మెర్‍పుఙ్ మెర్‍స్తిఙ్, పిడుఃగుఙ్ అర్తె. యా లెకెండ్ పిరు లావునండొ ఆతిఙ్ అయా దేసెం విజు వడుఃఙు వాఙితాద్. అయ్‍గుప్తు ఉండ్రి దేసెం లెకెండ్ ఆతి బాణిఙ్ అసి ఎసెఙ్‍బ నని వడుఃఙు పిరు వాదెఙ్ సిల్లె. 25 అయ్‍గుప్తు దేసెమ్‍దు బయ్‍లుదు మహిక విజు యా వడుఃఙు పిరుదాన్ నాసనం ఆతాద్. బయ్‍లుదు మహి లోకు, పస్వి, మడిఃఙ మహి పంట విజు నాసనం ఆతాద్. మర్రెక్ విజు నాసనం ఆతె. 26 గాని ఇస్రాయేలు లోకుర్ బత్కిజి మహి గోసెను ప్రాంతమ్‍దు వడుఃఙు పిరు ఇజ్రికబ అర్ఎతాద్.

27 అయావలె పరో అక్క సుడ్ఃతాండ్రె మోసేఙ్‍ని ఆరోనుఙ్ కూక్సి, “యా సుట్టు నాను తపు కితికాన్ ఆత. యెహోవ నీతి నిజాయితి మనికాన్. తపు నాదిని నా లోకుర్‍ది. 28 యా ఉర్‍ముఙ్, వడుఃఙుఙ్ ఒద్దె బయంకారమ్‍దాన్ మనె. ఇక్కెఙ్ ఆగ్ని లెకెండ్ యెహోవెఙ్ పార్దనం కిదు. నాను మిఙి పోక్నా. యెలు మిఙి ఇని అడ్డు కిఎ”, ఇజి వెహ్తాన్. 29 నస్తివలె మోసే పరో వెట, “నాను యా పట్నమ్‍దాన్ వెల్లి సొహిఙ్ సరినె యెహోవ దరిఙ్ కికు పెర్జి పార్దనం కిన. వాఙ్‍జిని యా వడుఃఙుఙ్‍ని ఉర్‍ముఙ్ ఆగ్నె. దిన్నితాన్ నీను యా బూమి యెహోవది ఇజి నెసె ఆని. 30 గాని యెలుదాక నీనుని నీ అడ్గి మని అతికారిఙ్ దేవుణు ఆతి యెహోవెఙ్ తియెల్ ఆదెఙ్ సిల్లె ఇజి నాను నెస్నా”, ఇజి వెహ్తాన్.

31 అయావలె జనప ఇని మొక్క పూఙు పూసి మహాద్. గట్టె గింజ అసి మహాద్. గాని అయా పంట విజు నాసనం ఆతాద్. 32 నస్తివలె పునాస్ గోదుముఙ్‍ని పెరి గోదుముఙ్ సోపాఎండ మహె. అందెఙె అయాకెఙ్ నాసనం ఆఉతె. 33 మరి మోసేని ఆరోను అయా పట్నమ్‍దాన్ వెల్లి సొహారె, యెహోవ దరిఙ్ వన్ని కికు పెహ్తిఙ్ అయా ఉర్‍ముఙ్, వడుఃఙుఙ్ ఆగితె. నస్తివలె అయా దేసెమ్‍దు పిరు ఓతాద్. 34 ఉర్‍ముఙ్, వడుఃఙు, పిరు ఆగితిక పరో సుడ్ఃతాండ్రె, వాండ్రు మరి ఒద్దె తపు కితాన్. వాండ్రుని వన్ని అడ్గి మని అతికారిఙ్ వరి మన్సు గర్ర కితార్. 35 యెహోవ మోసేఙ్ వెహ్తి లెకెండ్‍నె పరో మరిబ వన్ని మన్సు గర్ర కితాన్. ఇస్రాయేలు లోకురిఙ్ సొండ్రెఙ్ సరి సిఎతాన్.