13 Musa cije wakkilnju Yushawua bowoje kǝla kau kuruwu Alayedǝro tattu badiyera.

14 Amwurawa Israyilawuyero:

«Na adǝn danowo,

waldunde gurenowo.

Haruna-a Fur-a nandon napca.

Kam laa wusǝrnjuaa,

nanjaro lejo!»

15 Musa kǝla kau kuruwudǝyero tacce keyera kaudǝa jakkeno.

16-17 Kǝrmai Kǝmandeye kǝla kau kuruwu Sinaiyen kǝrga.

Kǝrmai Kǝmandeyedǝ kannu dama bawo gairo loiloiram kau kuruwudǝyen Israyilawuro fǝlediyi.

Kawu arakkuro keyera kau kuruwudǝa jakkeno.

Yimbe tulurradǝ Kǝmande dawu keyeradǝyen Musaa bowoyeno.

18 Musa curo keyeradǝyero ngaye loiloiram kau kuruwudǝyero tatkeno.

Kǝla kau kuruwu Sinaiyen kawu fidewuro bune-a kausu-aro napkeno.

21 Kǝmandeye:

22 «Musa,

Israyilawuro wulgǝne,

wu nangaro wundunja yaye awo laa njakkudo.

Kam fi duwon karwutilon awo adǝa kiwudoa,

kasadde.

23 Ngo awowa kasaddǝme mowomidǝ:

dinar,

ɍiwulla,

kullo,

wulu kime kime shawa,

24 kaila siriri lin canidǝ,

kanduɍi kaniye,

karawi ngǝlaroye kimero dallada,

25 ngiri kibbu,

kǝska kangarre,

26 kǝndawu jaitunne fatǝlaye,

awowa buwuccai kǝndawu samduye bi kaajiro fidaaye,

27 kauwa tamanna jiɍi jiɍi.

28 Israyilawu wuro kǝndǝgairam saddo dawunjan nammǝkkoro.

29 Jiɍi kǝndǝgairammiyedǝ-a jiɍi awowa curonjuye-a niro fǝlenjǝgǝkki.

Fǝlenjǝgǝkkǝnadǝ gai,

kalkallo tandowo.

110 «Sanduwu kǝska kangarren tandowo.

Nankuruwunju ja yindi redaa,

nanfaraknju ja fal redaa,

dadunju ye ja fal redaa.

111 Curonju-a ngawonju-aa dinarlan jangowo.

112 Talgǝmonju dewu ngusoro kulum dinarre yikkarowo.

113 Ka yindi kangarre sǝrangowo,

tayi yea dinarnin jangowo.

114 Curo kulumbadǝyero ka yindidǝa bowadaro sipkǝnowo,

ngoduram sanduwudǝyero walja.

115 Ka ani sawisoro curo kulumba sanduwudǝyen dasaa.

116 Curo sanduwu adǝyen bam wada amanne njikkidǝa gǝnanǝmi.

117 «Jaktuwuram sanduwudǝye dinar ngǝlanin karowo,

fǝrdu kurisniyero waljo.

118 Sǝgǝri yindi jaktuwurambedǝn alama naptu malaiya sǝɍiwowuye gai yindi dinarnin karowo.

119 Malaiya nguson tǝlam jaktuwurambedǝn kǝrga,

tayi-a jaktuwuramdǝ-a naptu awo falle cadi.

120 Tayi yindi tarui,

fǝkka kǝla cidiyannaro jaktuwuramdǝa carui,

koro fefedowanja kǝla samenna casangǝna jaktuwuramdǝa caɍiwi.

121 Bam wada amanne njikkidǝa curo sanduwudǝyen gǝnanǝmiya,

jaktuwuramnjun tia jange.

Kǝla kuris adǝyen nammǝkke wu-a ni-a tadiye.

122 Same jaktuwuram sanduwu bam amanneadǝn katte malaiyawa yindidǝyen niro awo Israyilawuro wulduwuye sammaa wulnjǝgǝkki.

123 «Tewur kǝska kangarren karowo.

124 Nankuruwunju ja yindi,

nanfaraknju ja fal,

dadunju ye ja fal redaa.

125 Tia dinar ngǝlanin jangowo.

126 Talgǝmonju dewu ngusoro kulum dinarre yakkowo.

Ka yindi kangarre sǝrangowo,

tayi yea dinarnin jangowo.

127 Curo kulumbadǝyero ka yindidǝa yakkowo,

ngodaram tewurdǝyero walja.

128 Kareya gadedǝa dinarnin karowo:

129 faranti,

kǝnjaram,

juluma,

kalwo sadaaram dibenne.

130 Kǝla tewur adǝyen mawu nguson fuwunin burodi mewun yindin gǝnanowo.

Burodiya ani naptu sheda wu curo jama Israyilawuyen dǝgakkǝnaye cadi.

131 «Fatǝla gǝnaduram dinar ngǝlanin karowo.

Tia kǝska fǝɍea gairo karowo.

132 Fǝrdu kura kǝskadǝyen dǝlam arakku kǝla samenna cija,

yakku kanji fiyen yaye.

137-138 Fatǝla tulurdǝa karuwiya,

tandia kǝla fatǝla gǝnaduramdǝyero gǝnanowo fuwunja wassa.

139 Kilo fiakku dinar ngǝlayen fatǝla gǝnaduram-a kareyanju-aa karowo.

141 «Curo leima Alayedǝro kaila siriri dunoa kǝska lin canidǝye-a wulu kime kime shawa-an bandǝr mewu battaye caanowo.

Kǝlanjan alama malaiyawa sǝɍiwowuye jajarnowo.

142 Bandǝr nguson dadunju ja findin wuskun,

nanfaraknju ye ja dewu.

143 Bandǝr uwu burwon ngonowo,

tayia cinja cinjayen kǝlluwe duduwiya,

koro uwu gapcǝnadǝ yea burwoyedǝ gairo kǝllowo.

146 Sǝmo kǝldaram fiwu dinarlan karowo,

ci yindi leimayedǝa kǝldaro.

147 «Kanduɍi kaniyen bandǝr mewun tilon caanuwiya,

leima Alayedǝa yindiro kawakca.

148 Bandǝr nguson dadunju ja fiakku,

nanfaraknju ye ja dewu.

149 Na falnin uwu kǝlluwiya,

na fal yen arakku kǝllowo.

Bandǝr arakkuyedǝ fuwu leimadǝyen tǝmduwo.

151 Sǝmo kǝldaram kulloye fiwu karowo,

ci yindi leimadǝyedǝa kǝldaro.

154 «Kǝla leimayedǝro jakturam karawi ngǝlaroye kimero dallada fergǝnowo,

koro jakturam ngiri kibbuye kǝladǝro fergǝnowo.

155 «Kadǝrra katako kangarre tandowo,

leima Alaye rodaro.

156 Kadǝr nguson dadunju ja mewu,

nanfaraknju ye ja fal redaa.

158 Kadǝr findi findi sǝgǝri anǝmbe-a yalaye-aro yittandowo.

Koro kadǝr arakku sǝgǝri fǝdeyero yittandowo.

Kadǝr fi yayero roduram yindi ɍiwullanin yikkarowo.

166 «Kǝska kangarre ngawo kadǝrrayero tudaaye karowo:

uwu sǝgǝri anǝmbe,

167 uwu yalaye,

koro uwu ye fǝdeye.

169 Kadǝrra-a kǝska ngawonjaro tudaayedǝ-a sammaa dinarlan jangowo.

Kulumba curonjayelan kǝskawa ani kojaidǝa dinarlan karowo.

170 «Leima Alayedǝa jiɍi kǝla kau kuruwu adǝyen fǝlenjǝgǝkkǝnadǝ gai kalkallo tandowo.

171 «Juwa curoye kaila siriri linne-a wulu kime kime shawa-an caanowo.

Kǝlanjun alama malaiyawa sǝɍiwowuye jajarnowo.

172 Kaɍauji kangarre dewu sǝranguwiya,

tayia dinarlan jangowo.

Tayia kǝla roduram ɍiwullaye dewuyen gǝnanowo.

Curo leimadǝyen kaɍauji dewudǝa kastu ja findiyen konguwiya,

juwadǝa laskǝnowo.

173-174 Sanduwu bam amanneadǝa juwadǝye ngawonju jauro darajaadǝn gǝnanuwiya,

jakturamdǝa kǝlanjun gǝnanowo.

Juwa adǝ tima curo leimadǝyen na darajaadǝ-a na jauro darajaadǝ-a faiji.

175 Tewurdǝa na darajaadǝye yalanjun fuwu juwadǝyen gǝnanowo.

Fatǝla gǝnaduramdǝa fuwu tewurdǝyen na darajaadǝye anǝmnjun gǝnanowo.

176 «Juwa cinnaye kaila linne-a wulu kime kime shawa-an caanowo.

177 Kaɍauji uwu kangarre sǝrangowo,

tayia dinarlan jangowo.

Tayia kǝla roduram kulloye uwuyen cinnadǝn gǝnanuwiya,

juwadǝa tayiro laskǝnowo.

201 «Laya duwaduram katako kangarren tandowo.

Sǝgǝrinju dewu samma kalkallo walja:

nankuruwunju-a nanfaraknju-a ja uwu,

dadunju ye ja yakku.

202-208 Kareya laya duwadurambe sammaa kullonin karowo:

kalwo buwu fidaaram,

fel,

kalwo bu jǝjǝrduram,

da ngodaram,

kanduwol ngodaram.

Katako laya duwaduramdǝa kullonin jangowo.

Curonju bowuro waljo.

Su caɍicaɍi kulloye karuwiya,

talgǝmonju dewu ngusoro kulum kulloye yakkowo.

Ka yindi kangarre sǝrangowo,

kullonin jangowo.

Tayia curo kulumbadǝyero yakkowo,

ngodaram laya duwaduramdǝyero walja.

209-211 «Balballa leima Alayedǝa juwawa kaila linnen caaadalan garnowo.

Sǝgǝri anǝmbe-a yalaye-an juwa ani ja miaro walja.

Juwawadǝa sǝgǝri nguson kǝla kaɍauji kulloye findiyen rogǝnowo.

212-215 Sǝgǝri fǝdedǝn juwa ani ja fiwuro walja.

Tayia kǝla kaɍauji kulloye mewuyen rogǝnowo.

Adinnamnin,

ngaworambe sǝgǝrinju yindison juwa ja mewu wuriye kaɍauji yakkun rogǝnowo.

216-218 Ngaworam balballayedǝn juwa ja findiye kaɍauji dewunin rogǝnowo.

Juwa adǝa kaila linne-a wulu kime kime shawa-an caaja,

ado kǝladǝn tǝdo.

Balballa adǝye nankuruwunju ja mia,

nanfaraknju ja fiwu.

Dadu juwadǝye ja uwu.

220 «Musa,

Israyilawuro wulgǝne kullum kǝndawu jaitunne fatǝlaro fidaaye njakkudo.

221 Haruna-a tadawanju-a curo leima Ala-a tadoramben fuwu juwa sanduwu bam amanneadǝa gǝradumayen fatǝla ania casasa,

magariwun tamiya suwaro yadero fuwu wu Kǝmandoyen wassa.

231 «Musa,

yeiyanǝm Haruna-a tadawanju Nadab-a Abifu-a Yeliyasar-a Yitamar-aa bowone nanǝmbo isa.

Curo Israyilawuyen tayimaa ngone nanɍiman saddo.

232 Harunaro kajǝmu adinne darajaa yiddudowo.

233 Am kida mukkoye diowu goniyaro dikkǝna sammaro wulgǝne kajǝmu Harunaro caddudo,

nanɍiman sǝddoro.

234 Ngo jiɍi kajǝmu cadudidǝ:

batta nganjiram,

ɍiwu,

kalwu gari,

gǝmaje caaada,

aɍiawu,

canja geroram.

236 «Kida mukkoye diowu maskuwadǝ batta nganjiramdǝa kaila linne-a wulu kime kime shawa-an caaja,

garasan dinarren fǝkka fijaa.

237 Cinju yindison luduwuram cado.

239 Kau tamanna yindi ngonowo kǝlanjan cu tadawa Yakuba Israyila caniye kurnowo ruwunowo.

240 Kǝlanjan cu arakku arakku kurnowo,

kuranjayen tamiya ganayero are.

241 Kau yindi ania curo fadowa dinarrero yakkuwiya,

luduwuram batta nganjirambedǝro tangǝnowo.

Kau ani naptu jiɍi mewun yindin Israyilawuye cadi.

242 Adǝgai sa Haruna naniro ngayiya,

cunja ngawananna nasiyi,

wu Kǝmando ye tayia tangǝkki.

245 «Kida mukkoye diowudǝ ɍiwu cadudo,

kareya Alaa koroye curodǝro njakkoro.

Ɍiwudǝa kaila linne-a wulu kime cit-an caaja,

koro garasan dinarren fǝkka fijaa.

246 Yindiro kawakcaiya,

sǝgǝrinju dewu nguson dadu kawaa fal.

247 Kau tamanna mewun yindin gadegade ngonowo,

jeɍe dewu kau yakku yakkuye bakkǝnowo.

251 Kǝla kau mewun yindin aniyen cu tadawa mewun yindin Israyilaye kurnowo.

Kǝla kau fi yayeyen cu jiɍi Israyilawuye fal kurnowo.

259 «Ɍiwu adǝa fuwu batta nganjirambero tugǝnowo.

Adǝgai sa Haruna na darajaadǝro ngayiya,

ɍiwu nganjinjuyen cu tadawa Israyilayea nasiyi,

wu Kǝmando ye nayia tannjakki.

260 Koro curo ɍiwudǝyero kareya Alaa koroyedǝa yakkowo,

Haruna sa naniro ngayiya,

nganjinjun tayia cuwudo nangaro.

Adǝgainin Haruna sawiso dǝlwu jaawuni kǝla koro Israyilawuyen noduye nganjiramnjuro tangaadaa nasiyi.

266 «Awo fatatal laa dinar ngǝlanin naptu fǝɍe gai karowo,

kǝlanjun adǝa kurnowo ruwunowo:

"Ti Kǝmandeye".

267 Tia je kimenin aɍiawudǝro tikkero.

268 Haruna dinar adǝa ngumnjun rojo.

Ngainin sa Israyilawu wu nangaro bu fida so,

awo wu nangaro njukkudo so cadiya,

biwu laa ngojairo walyenoa,

Haruna biwudǝa kǝlanjuro ngoji.

Dinar adǝ sawiso ngumnjun napco,

wu Kǝmando sadaando kasaddǝkko nangaro.

269 «Kalwu gari wulu kimelan caanowo,

kǝlanjuro Haruna batta nganjiram lujuwo.

270 Koro gǝmaje linne-a aɍiawu linne-a canja geroram kidaada-a Harunaro yiddowo.

271 Tadawanju yero gǝmaje-a canja geroram-a jawa-a darajaa yiddudowo.

272 Koro bande linne tayi sammaro yiddowo.

273 Yeiyanǝm Haruna-a tadawanju-aro kare ania lugǝne,

koro kǝndawulan kǝlanja sammǝmiya,

kidanja tayiro ye.

Adǝgainin tayia yakkǝme kidani nanɍimanne saddi.

301 «Kaajiram kǝska kangarre karowo.

302 Nankuruwunju-a nanfaraknju-a ja fal,

dadunju ye ja yindi.

303 Tia dinar ngǝlanin jangowo.

304-305 Sǝgǝrinju yindidǝro kulum yindi yindi dinarre yikkarowo.

Ka yindi kangarre sǝrangowo,

dinarlan jangowo.

Ka ania curo kulumbadǝyero yakkowo,

ngoduram kaajirambedǝyero walja.

306 «Kaajiramdǝa na darajaadǝn fuwu juwa sanduwu bam amanneadǝa gǝradumayen gǝnanowo.

Wu na jauro darajaadǝn same jakturam sanduwuye naptu kuris kǝrmaiye cǝdidǝn dǝgakkǝna duwon ni-a tadiye.

307 Was wajiya,

suwa sa Haruna fatǝlawadǝa na darajaadǝn cassaiya,

koro magariwu ye sa fatǝlawadǝa wassiya,

kaaji kǝji con cakko.

318 «Kalwo wolloye kullonin karowo,

kǝla su kulloyen gǝnanowo.

Katte leima Ala-a tadoram-a laya duwaduram-alan kongowo,

inginin yimbǝɍowo.

319 Ingi adǝn Haruna-a tadawanju-adǝ mukkonja-a sinja-a tulja.

320 Kawu leima Ala-a tadorambo ngasayidǝro,

bi laya duwadurambo bu wu nangaro fidaro lejaidǝro,

mukkonja-a sinja-a tulja,

bare sanunniro.

325 «Kawudi kǝji kǝji jiɍi gadegade-a awowa buwuccai-a kǝndawu jaitunne-a manowo.

Tayia kǝllowo kǝndawu samduye dewo.

326 Tia ngone leima Ala-a tadoram-a sanduwu bam amannea-a,

327 tewur-a fatǝla gǝnaduram-a kaajiram-a,

328 laya duwaduram-a kalwo wolloye-a kareyanja samma-a cinne,

329 yakke jauro tayirro walja.

Kam yen kal,

kare yen kal,

awo duwon kareya kǝndawun samgadadǝa lejǝnadǝ kakkero walji.

330 Haruna-a tadawanju-a yero cingǝgǝne,

nanɍiman saddo.

401 «Musa,

hangal gǝnane,

ngǝlaro kida adǝa jiɍi niro kǝla kau kuruwudǝyen fǝlenjǝgǝkkǝnadǝ gairo de!

402 Ngo,

Basalel kaduwu Yahudayea kǝrekkǝna.

403 Tiro Ruhuni yakkǝkke masku ye,

ilmua ye,

dǝgal ye,

kida fi yayea cǝdiro dikkǝna.

406 Wofoliyab kaduwu Dannea tiro banajuworo yikkǝna.

Kida mukkoye diowu sammaa maskuro dikkǝna,

awo wulnjǝgǝkkǝna sammaa cado nangaro.»

418 Ala-a Musa-a kǝla kau kuruwu Sinaiyedǝn jandejane keserǝnniya,

Ala Musaro allowa kauye yindi kǝlanjan bam wada aman katte ti-a Israyilawu-aye kurjǝnadǝa keno.