LINJILA
Kawuɍi kǝji Isa Almasiwuyedǝ
________________________________
Kǝlafǝrǝm kǝla Linjilayen
Kawu Linjiladǝa kǝradu badinuwiro,
awo ngǝwu kǝlanjun nayiro wulduwu rayiyena mbeji.
Awi Linjiladǝ?
Linjilaye maananju lawar kǝji.
Linjiladǝ kawuɍi kǝji Bargaande Isa Almasiwuye Ala cakke kitawu dewulan ruwuwada.
Koro kitawu ani fi yayero Linjila cani.
Am laa gadegade kitawu dewu ania ruwujanadǝ,
tayima Matiyu,
Markus,
Luka,
Yahaya wo.
Am dewu ani kitawunjadǝa tǝlam yaudiyaudin gǝni,
gǝreknin ruwuyera,
dalilnjudǝ jaman adǝn am lardu gadegadesoye ngǝwu gǝrek nojana nangaro.
Curo Linjilayen awiro Bargaande Isaa Almasiwulan bowoyera?
Nonowo,
Almasiwu cu gǝni,
kaala.
Maana kaala Almasiwu Alayedǝ kam Ala tia kǝreje mai jamanjuyero galajǝna.
Kidanju cu Kǝmandeyen jama Alayea jawal jireyen nodo,
koro nodo bargaa Alayedǝa dunia ngaro tarduwu.
Adǝ nangaro jaman adǝyen Isaa Almasiwu ye,
Mai Israyilaye yelan bowoyera.
Almasiwu Alaye-a Mai Israyilaye-a yindi samma kaala Bargaande Isa Wakkil Alayedǝye.
Nawi Yahaya Kasalama Bargaande Isaro jawal dabbarduwuro tia burwoje jama Alayero kawuɍi cǝdde:
«Tǝmmowo,
nodo bargaa Alaye del karǝnjǝna!
Kǝmandero jawal dabbargǝnowo,
koduramnju cǝkko dewo!»
yeno.
Isa Almasiwu ise kidanju badiyenniya,
ti ye jamaro kawuɍi kǝji nodo bargaa Alayedǝa kiddo.
Awi gǝle Alaye nodonju bargaadǝ?
Bargaande Isama kam Ala tia kǝreje mai jamanjuyero galajǝnadǝ wo nangaro,
kam Isa Almasiwudǝa kasacce tiro dau koljiyiya,
Ala ye tia ardije gawurje jamanjuro kǝljiye tiro barga dǝpciyi.
Nonowo,
larduwa gǝni,
amba Ala Mai Kura cunodi.
Adǝ nangaro sai kam tuwa cǝde Isa Almasiwu biwunju cinje Ruhu Alaye karwunjuro ngayiya duwon,
rakce jama Alayero kǝldiyi.
Jama dunian Ala tayia ngai cunodidǝ,
janna yen tayia cunodi.
Curo Linjilayen yindiro Ala Isa Almasiwudǝa Tadanju cǝraanalan bowoyeno,
koro Bargaande Isa sa laa laa Alaa Bawanjulan bowoyeno.
Nonowo,
jaman kureyen Mai Israyilaye cu Ala Mai Samemayen jamanju cunodidǝro,
amari Alayen Alaro Bawanju cǝni,
koro ti Alaa wakkiljidǝro Tadanju cani.
Mai jama Alaye samman Bargaande Isama kura wo,
Nawi Mai Dauda-a Nawi Mai Sulemana-aa darajan kojǝna.
Bargaande Isa fuwurawanjuso tima Almasiwudǝ wodǝa jamaro isanojagaiya,
cǝraanni.
Awiro?
Jamadǝ mana nawiyaye kǝla nodo bargaa Alayen kalkallo asujanni.
Tayidǝ Almasiwu isiya,
yaudiyadǝa mukko kǝladowanjayen cǝkkaye caye gairo nankam kǝlaye cawandiro tǝmayera.
Adǝ cakke Isa ngǝwusoro kǝlanjua kaala Tada Kambelan bowoyeno.
Tada Kambeye maananju adamgǝna duwon,
Isa kaala adǝa jauro darajaaro kalakkeno.
Tada Kambedǝ adamgǝna gade-a gade,
tima kuranja wo.
Akko awo kuren Nawi Daniyel kitawun ruwujənadə.
Tiye yeno:
Yim laa kǝnnasimlan kuris Alaye-a malaiyawa kada kadami-aa kiro.
Curui ngai duwon,
alama adamgǝnaye laa curo fofou sameyen ise kuris Alayedǝa nayeyeno.
Ala tiro kǝnduwo-a daraja-a kǝrmai-aa ce jama duniaye samma tiro ambǝtkeyera.
Kǝrmainjudǝ sawisoro dǝgai,
tǝmmaro ceriwawo.
Kam kəlanjun Nawi Daniyel mana cədənadə tima Isa Almasiwudə wo.
Bargaande Isa ngǝwuro kaala Tada Kambedǝn faidade kǝlanjua adamgǝnaye kuranjadǝro ngoyeno.
Nonowo,
jiɍi kitawulan ruwuwadadǝ gai,
Ala kadarjǝna Tada Kambedǝ kuttu tai daje cane wurawa adinwu yaudiyaye tia wajane roro keyeso,
koro kawu yakkua roaro walje ciyeno.
Karmo Tada Kambeyedǝ jauro faidaa.
Bargaande Isaye ronju co am ngǝwu merujoro kadio yeno.
Maananjudǝ ti biwu cǝdannimadǝ biwu am duniaye kǝlanjuro ngoje cujunjaro kano,
gawara cawandoro.
Bargaande Isama Njǝkkayima kǝnduwoa Ala duniaro juwajǝnadǝ wo.
Nanjun kǝnduwo biwu ambe dunialan gawurduye mbeji,
koro ambo wowom gǝnaduwuye ye mbeji.
Kiyama wakkajiya,
Tada Kambedǝ duniaro walde ise jama duniaye sammaro shara cǝddi.
Curo kitawu dewu aniyen lawar kada kǝla awo ajabba ajabba Bargaande Isa ambo cǝddǝnayen kǝranuwi.
Am curo lambiyen dasaana kadaa jauro njunoje jǝktunjan kittuluwo.
Misallo kam tiyinju nunaa isangayeyeno.
Kamu laa kǝrwu mewun yindinno bu fidanju dajǝnni Isaa mǝrsaje ci kalwunjuye leyenniya,
ngayeno.
Kǝlayakku laa bawojǝna duwon Isa tia mukkoyen cǝdane roaro walje ciyeno.
Karuwama laa kaurilan dǝgane sedanna kada tia jauro basarjana duwon Isa sedannadǝro wada ce tayia duje kamdǝ nanlewa kiwando.
Nonowo,
am anidǝ laanja yaudiya,
laa ye fǝrdunja kǝrdi.
Amma am Isa Almasiwua kasaccane mǝrsajanadǝ,
yaudi yen kal,
kǝrdi yen kal,
wundunja yaye tiyen ngadu-a njǝkkawo-a kiwando.
Aaa,
Bargaande Isa awo ajabba ajabba ngǝwu kido.
Koro curo kitawu aniyen lawar kada ye kǝla awo Bargaande Isa jamaro alamjǝgǝnayen kǝranuwi.
Jawawi-a misal-a kadan faidade kawuɍi kǝji Alayedǝa jamaro kiddo.
Jamadǝ alamdunjudǝa ajapkera,
dalilnjudǝ malǝmbanja Attauraye gai gǝni,
kǝnduwoaro tayia alamji nangaro.
Aaa,
Bargaande Isa ye nawi jauro kura,
Nawi Musamaa darajan kojǝna.
Bargaande Isa wurawa adinwu yaudiyayero biwu karwunjan dǝganadǝa isanojǝgǝna nangaro,
tiro jauro gǝrgajagane nia tia njejoye ngoyera.
Nasha daryeye Linjila fi yayen jiɍi Isa bone cane nune roaro walje cijǝnadǝa ruwi.
Wurawa adinwu yaudiyaye tia cadane mukko Gomna Bilatussero kesakko.
Gomna Bilatus Isalan biwu fima cuwandǝnni yaye,
tiro shara ro tuluwoye kiddo.
Mukko sojiyayero tia kekkǝnniya,
cadane basarjane kǝskaro jajagane roro keyeso.
Fuwura Isaye laa ise kaminnju kauriro kekko.
Isaye kǝngayambanju-a fuwurawanju-adǝ alamdunju kǝla karmonju-a karmolan cidunju-ayen kǝrǝnjana yaye,
kǝlanjaro ngaanni.
Isa nuiro tǝmajanni nangaro,
karwunja jauro bannadǝna.
Adǝ nangaro Isa karmolan ciyenniya,
kǝngayambanju-a fuwurawanju kada-aro fǝleyaada.
Ngawo adǝyen dunia kolje tia samero casade tiro kǝnduwo sameye-a cidiye-a sammaa kedo.
Adǝgaima awo Ala kuren ci nawiya ngǝwuyen wuljǝna wakkayeno.
Har cinowo duniaye wakkajiro,
am jama duniaye Isa Almasiwu Alayedǝa kasaccanamadǝ nodo bargaa Alayero ngasaye ro sawisoye cawandi.
Kiyama wakkajiya,
Isa Almasiwu Alayedǝ duniaro walde ise wada ce adamgǝna sanuna yen kal,
roa yen kal sammaro shara cǝddi,
am Alaro ansidǝro wowom kannuye gǝnajiye am nodo bargaa Alayedǝa kasaccanadǝro amari jannaro ngawoye ci.
Kǝrma Linjiladǝa kǝranowo!
Tidǝ mana Alaye!
________________________________