2
Yesu Krɩstʋ tenduu Ɛsɔ ɖɔ-yɔɔ yɔ
1 Men-piya! Mamaɣ-mɩ takayaɣ kanɛ se ɩtaala kɩwɛɛkɩm. Ɛlɛ, ye pɩlabɩ se nɔɔyʋ labɩ kɩwɛɛkɩm yɔ, pʋdʋ ɛtɩlɩ se nɔɔyʋ wɛ Caa Ɛsɔ cɔlɔ nɛ etendiɣ-i se ekpeɣ-ɖʋ ɖa-kɩwɛɛkɩm. Ɛnʋ lɛ Yesu Krɩstʋ, ɛtʋʋzaa. 2 Ɛ-maɣmaɣ ɛ-calɩm kpɛdɩnɩ se Ɛsɔ ɛtɩŋnɩ pʋ-yɔɔ nɛ ekpeɣ-ɖʋ ɖa-kɩwɛɛkɩm. Pɩtaasɩnɩ ɖe-ɖeke, ɛlɛ, ekpeɣ ɖɔɖɔ kedeŋa yɔɔ ɛyaa tɩŋa payɩ pa-ñɩmbʋ.
3 Ye ɖɩɖɔŋ Ɛsɔ paɣtʋ yɔɔ camɩyɛ yɔ, pɩwɩlɩɣ toovenim se ɖɩsɩm-ɩ. 4 Ye nɔɔyʋ ɛtɔm se ɛsɩm Ɛsɔ nɛ ɛɛɖɔŋ ɛ-paɣtʋ yɔɔ yɔ, pʋdʋ kɛ cɛtɩyʋ, ɛtasɩ toovenim. 5 Weyi ɛlɛ ɖɔŋ Ɛsɔ tɔm yɔɔ yɔ, ɛkɛ weyi ɛsɔɔlɩ-ɩ nɛ ɛ-laŋɩyɛ tɩŋa pilim yɔ. Mbʋ pɩwɩlɩɣ se ɖa nɛ Ɛsɔ ɖɩlabɩ nɔɔ kʋɖʋmaɣ yɔ lɛ se: 6 weyi ɛkaɖɩɣ kpayɩ se ɛ nɛ Ɛsɔ pɛkpɛndaa yɔ, pʋwɛɛ se pʋdʋ ɛcaɣ wezuu ɛzɩ Yesu Krɩstʋ caɣʋ yɔ.
Paɣtʋ kɩfatʋ tɔm
7 Mɛ-ɛgbaadɩnaa! Pɩtɛkɛ paɣtʋ kɩfatʋ natʋyʋ tɔm mamaɣ se meheyi-mɩ. Ɛlɛ, kɩbɩndʋ ndʋ peheyi-mɩ ɖooo kiɖe tɛɛ nɛ itisi yɔ, tɩ-tɔm mamaɣ-mɩ. Paɣtʋ kɩbɩndʋ ndʋ lɛ tɔm ndʋ ɩnɩwa yɔ. 8 Paa mbʋ, tɔm ndʋ mamaɣ-mɩ yɔ, tɩkɛ paɣtʋ kɩfatʋ. Mbʋ pʋyɔɔ yɔ, cɩkpɛndʋʋ ɖɔŋnɩ ɖɛʋ nɛ ñalɩmɩyɛ ñapazɩ ñalʋʋ: nɖɩ lɛ toovenim mbʋ pʋwɛ mɩ nɛ Yesu Krɩstʋ mɩ-taa yɔ.
9 Ye nɔɔyʋ ɛtɔm se ɛwɛ ñalɩmɩyɛ taa nɛ ɛpaɖɩɣ ɛ-taabalaa yɔ, pɩwɩlɩɣ se ɛwɛ cɩkpɛndʋʋ taa tam. 10 Ɛlɛ, ye nɔɔyʋ ɛsɔɔlɩ ɛ-taabalaa yɔ, ɛwɛ ñalɩmɩyɛ taa, nabʋyʋ fɛyɩ*fa* se pɩpɩzɩɣ pucoɖi-i Ɛsɔ nʋmɔʋ taa. \fm a \fr (2.10) \fk Nabʋyʋ fɛyɩ: \f papɩzɩɣ pɛɖɛzɩ-tʋ ɖɔɖɔ se: nabʋyʋ fɛyɩ ɛ-yɔɔ se piyeki nɛ pucoɖi nɔɔyʋ Ɛsɔ nʋmɔʋ taa. 11 Ye nɔɔyʋ ɛpaɖɩɣ ɛ-taabalaa yɔ, ɛwɛ cɩkpɛndʋʋ taa. Ɛɖɔŋ ɖɔɖɔ cɩkpɛndʋʋ taa, ɛɛnaɣ ɖenɖe ewoki yɔ, mbʋ pʋyɔɔ yɔ, cɩkpɛndʋʋ yʋlɩsɩ ɛ-ɛza.
12 Men-piya! Mamaɣ-mɩ takayaɣ kanɛ se meheyi-mɩ tɔm tʋnɛ,
mbʋ pʋyɔɔ yɔ, Ɛsɔ tɛm tɩŋnaʋ Yesu Krɩstʋ yɔɔ nɛ
ekpeɣ-mɩ mɩ-kɩwɛɛkɩm.
13 Man-caanaa! Mɩ lɛ, mamaɣ-mɩ,
mbʋ pʋyɔɔ yɔ, ɩsɩm weyi ɛɛwɛɛ nɛ pʋcɔ Ɛsɔ la kedeŋa yɔ.
Evebiya! Mɩ lɛ, mamaɣ-mɩ-tʋ,
mbʋ pʋyɔɔ yɔ, ɩwabɩ *Kañadʋ Satanɩ.
14 Men-piya! Mama-mɩ-tʋ,
mbʋ pʋyɔɔ yɔ, ɩsɩm Caa Ɛsɔ.
Man-caanaa! Mama-mɩ-tʋ,
mbʋ pʋyɔɔ yɔ, ɩsɩm weyi ɛɛwɛɛ nɛ pʋcɔ Ɛsɔ la kedeŋa yɔ.
Evebiya! Mama-mɩ-tʋ,
mbʋ pʋyɔɔ yɔ, ɩwɛ ɖoŋ.
Ɩɖɔkɩ Ɛsɔtɔm mɩ-laŋa taa kpam nɛ
ɩwa *Kañadʋ Satanɩ.
15 Ɩtaasɔɔlɩ kedeŋa kanɛ yaa mbʋ pʋwɛ kɔ-yɔɔ yɔ. Ye nɔɔyʋ ɛsɔɔlɩ-kɛ yɔ, ɛtɔsɔɔlɩ Caa Ɛsɔ. 16 Mbʋ pɩtɩŋa pʋwɛ kɔ-yɔɔ yɔ, mbʋ yɔ: kɩdɛkɛdɩm mbʋ ɛyaa sɔɔlɩ labʋ yɔ, ɛza naɣnaɣ nɛ ñɩm yɔɔ tɩ kpazʋʋ. Pɩtɩŋa payɩ pɩlɩnɩ kedeŋa yɔɔ, pɩtɛkɛ Caa Ɛsɔ cɔlɔ pɩlɩnaa. 17 Ɩtɩlɩ camɩyɛ se kedeŋa ɖɔŋ tɛm nɛ mbʋ pɩtɩŋa payɩ ɛyaa ɖʋʋ pʋ-yɔɔ ɛza yɔ, pɩtɛŋ ɖɔɖɔ. Ɛlɛ, weyi ɛlakɩ mbʋ Ɛsɔ liu wɛɛ yɔ, ɛlɛ cakɩ wezuu tam yɔɔ.
Krɩstʋ koyindinaa tɔm
18 Men-piya! Kedeŋa wɩzɩ tɛm! Ɩnɩwa se paa pɩɩla ɛzɩma Krɩstʋ koyindu kaɣ kɔm. Pʋcɔ ɖɩnawa se alɩwaatʋ tʋnɛ tɩ-taa lɛ, e-koyindinaa sakɩyɛ lɩwa. Mbʋ ɖɩnanaa se kedeŋa wɩzɩ tɛm. 19 Pɩtɛ ɛyaa mba, ɖɛ-hɛkʋ taa palɩnaa, ɛlɛ, pataakɛ ɖa-ñɩma siŋŋ. Toovenim lɛ, ye paakɛ ɖa-ñɩma yɔ, paawɛ ɖɛ-hɛkʋ taa. Pɩlabɩ mbʋ se ɛyaa ɛna se patɩŋa pataakɛ ɖa-ñɩma siŋŋ.
20 Mɩ lɛ, Ɛsɔ Ñɩnʋ ha-mɩ ɛ-Kalɩzaɣ ɛzɩ papɩyʋʋ ɛyʋ ñʋʋ taa num yɔ nɛ mɩtɩŋa payɩ ɩnaɣ mbʋ pɩkɛ toovenim yɔ.
21 Pʋ-yɔɔ lɛ, pɩtɛkɛ se ɩtasɩ toovenim yɔɔ mamaɣ-mɩ. Ɛlɛ, ɩsɩm-pʋ yɔɔ mamaɣ-mɩ. Ɩnawa ɖɔɖɔ se cɛtɩm nabʋyʋ ɛɛlɩɣnɩ toovenim taa.
22 Anɩ lɛ cɛtɩyʋ yɔ? Ɛnʋ lɛ weyi ɛkpɛzɩɣ se pɩtɛkɛ Yesu lɛ *Weyi Ɛsɔ Lɩzaa yɔ. Pʋdʋ kɛ Krɩstʋ koyindu: ekizi Caa Ɛsɔ nɛ ɛ-Pɩyalʋ pa-naalɛ. 23 Toovenim lɛ, weyi ekiziɣ Ɛsɔ Pɩyalʋ yɔ, ɛtasɩ ɖɔɖɔ Caa Ɛsɔ. Weyi ɛlɛ tisiɣ se ɛsɩm Ɛsɔ Pɩyalʋ yɔ, ɛsɩm ɖɔɖɔ Caa Ɛsɔ.
24 Pʋ-yɔɔ lɛ, iyele se tɔm ndʋ ɩnɩ ɖooo kiɖe tɛɛ yɔ, tɩcaɣ mɩ-taa. Ye tɔm ndʋ ɩnɩ ɖooo kiɖe tɛɛ yɔ, tɩwɛ mɩ-taa yɔ, pʋbʋ, mɩ nɛ Caa Ɛsɔ nɛ ɛ-Pɩyalʋ ɩkpɛndaa. 25 Mbʋ Yesu Krɩstʋ ɖʋwa se ɛhaɣ-ɖʋ yɔ lɛ: wezuu pɩɩtɛŋ.
26 Ɛyaa mba pacaɣ se pɛcɛtɩ-mɩ yɔ, pɔ-tɔm mamaɣ se meheyi-mɩ. 27 Mɩ lɛ, Kalɩzaɣ ŋga Yesu Krɩstʋ ha-mɩ ɛzɩ papɩyʋʋ ɛyʋ ñʋʋ taa num yɔ, kɛwɛ mɩ-cɔlɔ. Ye mbʋ, pɩtatasɩ pɔzʋʋ se nɔɔyʋ ɛkpɛlɩkɩ-mɩ, mbʋ pʋyɔɔ yɔ, kawɩlɩɣ-mɩ pɩtɩŋa payɩ nɛ toovenim, cɛtɩm fɛyɩ pɩ-taa. Pʋ-yɔɔ lɛ, mɩ nɛ Yesu Krɩstʋ mɩ-kpɛndʋʋ ɛwɛɛ mbʋ ɛzɩ Kalɩzaɣ ŋga kawɩlʋʋ-mɩ yɔ.