Wezuu caɣʋ kɩbɩm nɛ kɩfam pɔ-tɔm
4
1 Ɩtɛm naʋ se Krɩstʋ nɩ siziŋ e-tomnaɣ taa. Ɩmaɣzɩ pʋ-yɔɔ nɛ ɩkpa ɖoŋ. Mbʋ pʋyɔɔ yɔ, weyi ɛnɩ siziŋ e-tomnaɣ taa yɔ, ɛha kɩwɛɛkɩm siɣye 2 se ɛtaatasɩ wezuu caɣʋ ɛzɩ ɛyaa liu wɛʋ yɔ. Ɛlɛ, ɛcaɣ-kʋ ɛzɩ Ɛsɔ liu wɛʋ yɔ nɛ pʋkɔɔ pɩsɩnɩ kɩyakʋ ŋgʋ ɛkʋyaa yɔ. 3 Ɖooo lɔŋ ɩɩkpaɣ alɩwaatʋ siŋŋ nɛ ɩla ɛzɩ mba paañaŋ Ɛsɔ yɔ palakʋʋ mbʋ pe-liu wɛɛ yɔ. Pɩmaɣ mbʋ. Ɩɖɔŋaɣ ɛzaɣtʋ nʋmɔʋ taa nɛ ɩɖʋʋ ɛza lɛlaa ñɩm yɔɔ nɛ ɩkpaŋɩɣ sʋlʋm nɛ ɩɖɛlɛsɩɣ niye tɔkɩyɛ nɛ ñɔtʋ pa-taa nɛ mɩ nɛ mɩ-taabalaa ɩñɔʋ nɛ pɩɖɛlɛsɩɣ niye nɛ iluŋuu agɔlɩma tɛɛ. 4 Lɛɛlɛɛyɔ, pɩɖɩɣzɩɣ mba paañaŋ Ɛsɔ yɔ nɛ ɛzɩma mbʋ ɩɩtaasɩɣ labʋ ɛzaɣtʋ nɛ ɩɖɛlɛsɩɣ niye ɛzɩ mba yɔ. Pʋ-yɔɔ patʋʋ-mɩ. 5 Pɔkɔŋ sɩŋʋʋ Ɛsɔ ɛsɩndaa nɛ paa weyi eheyi-i mbʋ ɛlaba yɔ. Toovenim lɛ, ɛɖaŋ kpam se ɛhʋnɩ sɩɖaa nɛ ɛza tɩnaa patɩŋa payɩ. 6 Pʋ-yɔɔ Krɩstʋ susi Laŋhɛzɩyɛ Tɔm sɩɖaa se paa pasɩba ɛzɩ pʋpɔzʋʋ ɛyaa tɩŋa payɩ yɔ yɔ, pɩtɩŋnɩ Ɛsɔ Kalɩzaɣ yɔɔ nɛ pɛwɛɛ wezuu.
Ɛzɩma mbʋ pʋwɛɛ se palabɩnɩ Ɛsɔ kʋjɔŋ tʋmɩyɛ yɔ
7 Pɩtɩŋa payɩ pɩwɩzɩ tɛm. Pʋ-yɔɔ lɛ, ɩɖɔkɩ mɩ-tɩ nɛ ɩcaɣnɩ mɩ-ɛza nɛ ɩpɩzɩ ɩsɛɛ Ɛsɔ. 8 Mbʋ pʋwɛɛ kpem se ɩla yɔ lɛ se ɩsɔɔlɩ ɖama siŋŋ. Mbʋ pʋyɔɔ yɔ, sɔɔlɩm hɛzɩɣ kɩwɛɛkɩm sakɩyɛ. 9 Ɩmʋ ɛyaa mba pɔkɔŋ mɩ-tɛ yɔ camɩyɛ. Ɩtaamʋ-wɛ nɛ miduu.
10 Ɛsɔ labɩ paa mɩ-taa weyi kʋjɔʋ nɛ kɩ-ndɩ se ɛla tʋma ndɩ ndɩ. Pʋ-yɔɔ lɛ, pʋwɛɛ se paa weyi ɛkpaɣ-kʋ nɛ ɛlabɩnɩ tʋmɩyɛ camɩyɛ nɛ ɛsɩnɩ lɛlaa. 11 Ye Ɛsɔ ɛha nɔɔyʋ se esusi ɛ-tɔm yɔ, ndʋ pʋwɛɛ se esusi. Ye ɛha nɔɔyʋ se ɛsɩnɩ lɛlaa yɔ, pʋwɛɛ se ɛsɩnɩ-wɛ nɛ ɖoŋ weyi Ɛsɔ ha-ɩ yɔ. Mbʋ yekina nɛ ɛyaa tɩŋnɩ Yesu Krɩstʋ yɔɔ nɛ pasa Ɛsɔ mbʋ pɩtɩŋa payɩ ɩlakɩ yɔ pɩ-taa. Ɛnʋ tɩnɩ koboyaɣ nɛ ɖoŋ tam yɔɔ. Pɩla mbʋ!
Ɩtɔɔ kʋñɔŋ ɛzɩ Krɩstʋ yɔ
12 Mɛ-ɛgbaadɩnaa! Pɩtaaɖɩɣzɩ-mɩ nɛ kʋñɔmɩŋ sɔsɔŋ weyi pamaɣzɩɣnɩ-mɩ se pana yɔ. Ɩtaakɛnɩ-mɩ ɛgɔndʋ pʋyʋ. 13 Ɛlɛ, pʋwɛɛ se mɩ-laŋa ɛhʋlʋmɩ se mɩ nɛ Krɩstʋ ɩtɔkɩnɩ kʋñɔŋ. Mbʋ pʋyɔɔ yɔ, mbʋ yekina nɛ mɩ-laŋa tɛzɩ hʋlʋmʋʋ ɖɔɖɔ siŋŋ puwiye nɖɩ ɛlɩzɩɣ e-koboyaɣ nɛ ɛwɩlɩ ɛyaa yɔ. 14 Ye patʋʋ-mɩ Krɩstʋ yɔɔ yɔ, ihiɣ mɩ-tɩ! Mbʋ pʋyɔɔ yɔ, Ɛsɔ Kalɩzaɣ koboyaɣ ñɩŋga wɛ mɩ-cɔlɔ. 15 Mɩ-taa nɔɔyʋ ɛtaatɔɔ kʋñɔŋ se ɛkɛ ɛyaa kʋyʋ yaa mɩlʋ yaa kɩdɛkɛdɩm laɖʋ yaa weyi ɛɖʋʋ ɛ-nɔɔ lɛlaa tɔm taa yɔ. 16 Ɛlɛ, ye nɔɔyʋ ɛtɔkɩ kʋñɔŋ se ɛkɛ Krɩstʋ tʋ yɔ, fɛyɛ ɛtaakpa-ɩ. Pʋwɛɛ se ɛsa Ɛsɔ se ɛkɛ mbʋ.
17 Mbʋ pʋyɔɔ yɔ, alɩwaatʋ talaa se Ɛsɔ ɛhʋnɩ ɛyaa tɔm. Ɛ-ñɩma ɛpazɩɣna. Ye ɖa ɛpazɩɣna lɛ, ɛbɛ pʋkɔŋ tɛmnaʋ mba paaɖɔŋ ɛ-Laŋhɛzɩyɛ tɔm yɔɔ yɔ? 18 Pʋwɛ ɛzɩ pamaʋ se: “Ye ɛyʋ kʋtʋʋzʋ ɛwɩɣnɩ ñʋʋ yabʋ hiɣu lɛ, ɛbɛ pʋkɔŋ tɛmnaʋ kpem ɛzaɣʋ nɛ kɩwɛɛkɩm laɖʋ yɔ?”
19 Pʋ-yɔɔ lɛ, mba pɔtɔkɩ kʋñɔŋ ɛzɩ Ɛsɔ liu wɛʋ yɔ, pʋwɛɛ se pakpaɣ pa-tɩ pilim nɛ paɖʋzɩ e-nesi taa nɛ pala camɩyɛ. Mbʋ pʋyɔɔ yɔ, ɛnʋ manɩ-wɛ, ɛlakɩ ɖɔɖɔ mbʋ ɛɖʋwa yɔ.