Jas 2

Paɣtʋ tɔpɔzɩ se pɔcɔnɩ nɔɔyʋ ɛsɩndaa

¹ Man-taabalaa! Đenɖe ɩwɛnɩ lidaʋ ɖa-Kɩpaɣlʋ Yesu Krɩstʋ weyi ɛwɛ Ɛsɔ koboyaɣ taa yɔ ɛ-yɔɔ yɔ, ɩtaacɔnɩ nɔɔyʋ ɛsɩndaa nɛ pʋcɔ ɩlabɩ-ɩ pʋyʋ. ² Pʋtɔma yɔ, ikpeɣlaa nɛ ñɩm tʋ nɔɔyʋ nɛ kʋñɔndʋ nɔɔyʋ pɔkɔɔ. Ñɩm tʋ lɛ ñɩɣlɩ́m kokooye nɛ esuu ñɩɣlɩ́m wondu nɛ piyele kʋñɔndʋ ñosuu cɛkɩŋ. ³ Yee ɩsam weyi esu wondu kɩbandʋ yɔ nɛ ɩyaa-ɩ se: “Đajaa! Kɔɔ cɩnɛ nɛ ŋcaɣ lone kɩbanɖɛ taa” nɛ piyele iheyi kʋñɔndʋ se: “Sɩŋ peeɖe yɔ” yaa: “Kɔɔ ŋcaɣ ɖa-naŋgbanzɩ tɛɛ cɩnɛ tataa” yɔ, ⁴ tayʋʋ lɩmaɣza fɛyɩ mɩ-maɣmaɣ mɩ-ñʋŋ taa yaa we? Ɩtapɩsɩ mbá pɔcɔŋnɩ ɛyáa ɛsɩndaa nɛ pʋcɔ pahʋʋ tɔm yɔ yaa we?

⁵ Man-taabalaa kʋsɔɔlaa! Iwelesi camɩyɛ nɛ ɩnɩɩ: Ɛsɔ lɩzɩ kedeŋa yɔɔ cɩnɛ kʋñɔndɩnaa se pɛkɛ ñɩm tɩnaa pe-lidaʋ wɛnaʋ taa nɛ patɩɣyɩ e-Kewiyaɣ ŋgá ɛɖʋwa se ɛhaɣ mbá pɔsɔɔlɩ-ɩ yɔ. ⁶ Ɛlɛ́, mɩ mɩɩkpakɩɣ kʋñɔndɩnaa se pɛkɛ pʋyʋ! Pɩtɛkɛ ñɩm tɩnaa ɖʋʋnɩ-mɩ kʋñɔŋ naa we? Pɩtɛkɛ ḿbá ɖɔɖɔ yaɣnɩ-mɩ tɔm hʋyaa tɛ yaa we? ⁷ Pɩtɛkɛ ḿbá ɖɔɖɔ wɛɛkɩɣnɩ hɩɖɛ kɩbanɖɛ nɖɩ́ Ɛsɔ ya-mɩ yɔ yaa we?

⁸ Toovenim lɛ, yee ɩɖɔŋ Ɛsɔ Kewiyaɣ paɣtʋ yɔɔ yɔ, pʋbʋ, ɩlabɩ camɩyɛ. Pama-tʋ Ɛsɔtɔm Takayaɣ taa, ńdʋ́ lɛ se: “Sɔɔlɩ ña-taabalʋ ɛzɩ ŋsɔɔlʋʋ ña-maɣmaɣ ña-tɩ yɔ.” ⁹ Ɛlɛ́, yee ɩcɔŋnɩ nɔɔyʋ ɛsɩndaa se pʋcɔ ɩlabɩ-ɩ pʋyʋ yɔ, ɩlabɩ kɩwɛɛkɩm. Mbʋ́ paɖʋ paɣtʋ ńdʋ́ tɩ-taa yɔ, pɩwɩlɩɣ se ɩtɔɖɔ tɩ-yɔɔ. ¹⁰ Paɣtʋ wɛʋ yɔ, paa tɩ-taa kʋɖʋmtʋ koŋ yɔɔ nɔɔyʋ ɛtɔɖɔ yɔ, ɛyʋsɩnɩ tɩtɩŋa payɩ. ¹¹ Mbʋ́ pʋyɔɔ yɔ, weyi ɛtɔm se: “Taala hayitu” yɔ, ɛ-maɣmaɣ ɛtɔmna ɖɔɖɔ se: “Taakʋ ɛyʋ.” Pʋ-yɔɔ lɛ, yee ɩtala hayitu, ɛlɛ́, ɩkʋ ɛyʋ yɔ, ɩtɔɖɔ paɣtʋ yɔɔ. ¹² Paɣtʋ ndʋ́ tiyeki se ɛyʋ ɛwɛɛ ɛ-tɩ yɔɔ yɔ, tɩ-yɔɔ pɔkɔŋ-mɩ hʋnaʋ. Pʋ-yɔɔ lɛ, mɩ-yɔɔdaɣ nɛ mɩ-lakasɩ pawɩlɩ se ɩsɩm paɣtʋ ńdʋ́. ¹³ Weyi ɛɛnaɣ lɛlaa pʋtɔdɩyɛ yɔ, Ɛsɔ ɛɛkɔŋ ɛ-ñɩnɖɛ naʋ ɖɔɖɔ alɩwaatʋ ndʋ́ ɛhʋʋnɩ-ɩ yɔ. Ɛlɛ́, weyi ɛ́lɛ́ naɣ lɛlaa pʋtɔdɩyɛ yɔ, piyeki nɛ ɛlɩɩ tɔm hʋʋ taa.

Ɛyʋ ɛwɛnɩ lidaʋ Ɛsɔ yɔɔ nɛ ɛɛwɩlɩɣ-kʋ ɛ-lakasɩ taa yɔ, lidaʋ ŋ́gʋ́ kɩsɩkɩ

¹⁴ Man-taabalaa! Yee ɛyʋ ɛwɛɛ nɛ ɛyɔɔdʋʋnɩ nɔɔ yem se: “Mɛwɛnɩ lidaʋ Ɛsɔ yɔɔ” nɛ ɛɛwɩlɩɣ-kʋ nɛ lakasɩ kɩbanzɩ lɛ, pɩwazɩɣ-ɩ we? Lidaʋ ŋ́gʋ́ kɩpɩzɩɣ kɩya ɛ-ñʋʋ naa we? ¹⁵ Yee Krɩstʋ tʋ halʋ ñɩnʋ yaa abalʋ ñɩnʋ nɔɔyʋ ɛlɩɣ ndaakpeɖe nɛ tɔɔnaɣ tɛɖɩɣ-ɩ ɖɔɖɔ ¹⁶ nɛ mɩ-taa nɔɔyʋ heyi-i se: “Wolo, ña-laŋɩyɛ ɛhɛɛ, suu wondu camɩyɛ nɛ ŋtɔɔ nɛ ŋhaɣ!” Nɛ ɛtaha-ɩ mbʋ́ pɩtɛɖɩɣ-ɩ yɔ lɛ, pɩwazɩɣ we? ¹⁷ Ḿbʋ́ ɖɔɖɔ pʋwɛnɩ Ɛsɔ yɔɔ lidaʋ wɛnaʋ: yee nɔɔyʋ ɛtɔm se ɛwɛnɩ lidaʋ Ɛsɔ yɔɔ nɛ ɛɛwɩlɩɣ-kʋ nɛ lakasɩ kɩbanzɩ yɔ, e-lidaʋ ŋ́gʋ́ kɩsɩba.

Ɛyʋ ɛwɛnɩ lidaʋ Ɛsɔ yɔɔ yɔ, pʋwɛɛ se ɛla lakasɩ kɩbanzɩ

¹⁸ Ɛlɛ́, yee nɔɔyʋ ɛtɔm se: “ɛwɛnɩ lidaʋ Ɛsɔ yɔɔ nɛ ma malakɩ lakasɩ kɩbanzɩ yɔ” mɔnpɔzʋʋ pʋdʋ se: “Wɩlɩ-m ɛzɩma mbʋ́ ŋwɛnɩ lidaʋ Ɛsɔ yɔɔ nɛ ŋŋlakɩ lakasɩ kɩbanzɩ yɔ nɛ ma mawɩlɩ-ŋ ɛzɩma mbʋ́ mɛwɛnɩ lidaʋ ɛ-yɔɔ yɔ nɛ ma-lakasɩ kɩbanzɩ yɔ.” ¹⁹ Ŋwɛnɩ lidaʋ se Ɛsɔ kʋɖʋm koŋ wɛna, pʋwɛ camɩyɛ. Aleewaa ñɛwɛnɩ-kʋ ɖɔɖɔ, ɛlɛ́ sɔɔndʋ kpaɣ-wɛ nɛ peseliɣ. ²⁰ Kɩmɛlɛŋ ña! Ɛyʋ ɛwɛnɩ lidaʋ Ɛsɔ yɔɔ nɛ ɛɛwɩlɩɣ-kʋ nɛ ɛ-lakasɩ kɩbanzɩ yɔ, pɩɩwazɩɣ pʋyʋ. Ŋcaɣ mawɩlɩ-ŋ nɛ ŋna yaa we? ²¹ Ɛbɛ yɔɔ Ɛsɔ tɔm se ɖɔ-cɔzɔ Abraham kɛ kʋtʋʋzʋ ɛ-ɛsɩndaa? Ɛ-lakasɩ kɩbanzɩ yɔɔ: ɛkpaɣ ɛ-pɩyalʋ Izaakɩ se ewokini-i nɛ ɛlaa-ɩ-ɩ. ²² Ŋnawa: e-lidaʋ nɛ ɛ-lakasɩ kɩbanzɩ pɛkpɛndaa nɛ palakɩ tʋmɩyɛ. Ɛ-lakasɩ ńzɩ́ sɩwɩlɩnɩ se ɛwɛnɩ lidaʋ Ɛsɔ yɔɔ siŋŋ. ²³ Ḿbʋ́ tɔm ndʋ́ pama Ɛsɔtɔm Takayaɣ taa yɔ, tɩlaba. Ńdʋ́ lɛ se: “Abraham wɛnɩ lidaʋ Ɛsɔ yɔɔ yɔɔ, ɛ́lɛ́ kpaɣ-ɩ se ɛkɛ kʋtʋʋzʋ.” Đɔɖɔ lɛ, ɩtɩlɩ se Ɛsɔ ya-ɩ se ɛ-taabalʋ. ²⁴ Yee ḿbʋ́, ɛyʋ lakasɩ kɩbanzɩ yɔɔ ɛpɩsɩɣ kʋtʋʋzʋ Ɛsɔ ɛsɩndaa, pɩtɛkɛ e-lidaʋ wɛnaʋ yɔɔ ɖeke.

²⁵ Ɩtɔzɩ ɖɔɖɔ Rahaabɩ weyi ɛpɛdɩɣ ɛ-tɩ yɔ ɛ-yɔɔ. Feŋiyaa kowobi pɛmɛlɩ ɛ-tɛ nɛ ɛsɩnɩ-wɛ nɛ ɛwɩlɩ-wɛ nʋmɔʋ lɛɛkʋ nɛ pekpe. Ɛ-lakasɩ ńzɩ́ sɩ-yɔɔ ɛpɩsɩ kʋtʋʋzʋ Ɛsɔ ɛsɩndaa. ²⁶ Toovenim lɛ, ɛzɩma mbʋ́ ɛyʋ ɛfɛyɩnɩ fezuu, ɛsɩba yɔ, ḿbʋ́ ɖɔɖɔ yee nɔɔyʋ ɛwɛnɩ lidaʋ Ɛsɔ yɔɔ nɛ ɛɛlakɩ lakasɩ kɩbanzɩ yɔ, e-lidaʋ ŋ́gʋ́ kɩsɩba.