12
1 Ɖa lɛ, mbʋ aseɣɖe tɩnaa samaɣ ŋga kɛwɛnɩ lidaʋ yɔ, kɔcɔ-ɖʋ kondiko. Pʋ-yɔɔ lɛ, ɖɩlɔ ɖa-sʋʋtʋ nɛ ɖa-kɩwɛɛkɩm patɩŋa payɩ nɛ ɖɩpɩzɩ ɖise seya wena paɖʋ-ɖʋ yɔ siŋŋ. Mbʋ pʋyɔɔ yɔ, mba yekina se ɖɩtaala mbʋ pʋpɔzʋʋ-ɖʋ yɔ. 2 Ɖɩkɛzɩ ɛza nɛ Yesu yɔɔ: ɛnʋ sɩnɩ ɖe-lidaʋ kiɖe, ɛnʋ kɔŋnɩ-kʋ tɛzʋʋ. Etisaa nɛ pakam-ɩ *kaamaŋkaɣ yɔɔ nɛ ɛsɩ. Ɛlɛ, fɛyɛ takpa-ɩ nɛ kaamaŋkaɣ yɔɔ sɩm mbʋ, mbʋ pʋyɔɔ yɔ, ɛnawa se ɛkɔŋ wɛʋ laŋhʋlʋmɩyɛ taa. Lɛɛlɛɛyɔ, ɛcaɣ Ɛsɔ kewiyaɣ kpelaɣ cɔlɔ lone kɩbanɖɛ taa.
Pana ñaɣʋ tɔm
3 Ɩmaɣzɩ weyi etisaa nɛ ɛnɩɩ siziŋ pɩtɩɩfɛyɩ kɩwɛɛkɩm laɖaa nesi taa yɔ ɛ-yɔɔ. Pʋbʋ, piitisiɣ mi-toma taa nɛ ɩlɔ liu. 4 Mbʋ pʋyɔɔ yɔ, ɩwɛɛ iyouni kɩwɛɛkɩm. Ɛlɛ, mɩ-taa nɔɔyʋ calɩm tɛkpɛdɩdɩ you ŋgʋ kɩ-taa. 5 Ɩtaasɔɔ tɔm ndʋ Ɛsɔ heyi-mɩ ɛzɩ e-piya se pɩlabɩ-mɩ hʋnʋm yɔ tɩ-yɔɔ. Ndʋ lɛ se:
“Man-pɩɣa, Kɩpaɣlʋ ɛhɔŋ ña-nɩŋgbaŋʋʋ yɔ, pɩtaakɛnɩ-ŋ aleɣya.
Pɩtaatisi ño-toma taa alɩwaatʋ ndʋ ɛkalɩɣ-ŋ yɔ.
6 Weyi Kɩpaɣlʋ sɔɔlɩ-ɩ yɔ, ɛ-nɩŋgbaŋʋʋ ɛhɔŋ,
weyi ɛsɩm-ɩ se ɛkɛ ɛ-pɩɣa yɔ, ɛnʋ ɛmakɩ.”
7 Itisi nɛ Ɛsɔ hɔ mɩ-nɩŋgbaaŋ: pɩwɩlɩɣ se ɛlakɩ-mɩ ɛzɩ e-piya yɔ. Pɩɣa nakɛyɛ wɛɛ se ka-caa ɛɛhɔŋ ka-nɩŋgbaŋʋʋ naa we? 8 Ye ɛɛhɔŋ mɩ-nɩŋgbaaŋ ɛzɩ piya lɛɛsɩ yɔ yɔ, pʋbʋ, ɩtɛkɛ ɛ-maɣmaɣ e-piya. Ɛlɛ, habɩŋ taa piya ɩkɛnaa. 9 Ɖɩtɔzɩ kedeŋa yɔɔ cɩnɛ ɖa-caanaa yɔɔ: pɔhɔŋaɣ ɖa-nɩŋgbaaŋ nɛ ɖɩñaŋ-wɛ. Ye mbʋ lɛ, ɛzɩma ɖɩɩpɩzɩɣ ɖitisi ɖa-tɩ ɖa-Caa weyi ɛwɛ ɛsɔdaa yɔ ɛ-tɛɛ nɛ ɖɩwɛɛ wezuu yɔ? 10 Toovenim lɛ, ɖa-caanaa hɔŋaɣ ɖa-nɩŋgbaaŋ alɩwaatʋ pazɩ ɛzɩ pamaɣzʋʋ se pʋmʋnaa yɔ. Ɛlɛ, Ɛsɔ ñɔhɔŋ-ɩ ɖɛ-kɛzɛɣ maɣmaɣ yɔɔ se ɖɩtɛzɩ wɛʋ ɛzɩ ɛnʋ yɔ. 11 Kajalaɣ taa lɛ, nɩŋgbaŋʋʋ hɔm wɛ ɛzɩ ɛzɩñɩŋɩyɛ pʋyʋ yɔ, pɩfɛyɩ ɛzɩ laŋhʋlʋmɩyɛ pʋyʋ yɔ. Ɛlɛ, mba pɩsɩɣzɩ-wɛ lɔŋ yɔ, pʋkɔŋ-wɛ sɛʋ: pacakɩ wezuu ŋgʋ kʋtʋʋzaa yɔ laŋhɛzɩyɛ taa.
Paɣʋ tɔm
12 Pʋ-yɔɔ lɛ, mba mɩ pitibi mi-toma taa yɔ, ɩñaɣ pana. 13 Ɩɖɔ nʋmɔŋ weyi ɩtʋʋzaa yɔ ɩ-taa nɛ ɛjandʋ ndʋ ɩwɛna yɔ tɩtaatɛzɩ ɖɔʋ, ɛlɛ, tɩtɛ.
14 Ɩñaɣ pana nɛ mɩ nɛ paa weyi mɩ-laŋa hɛnɩ ɖama nɛ ɩcaɣ wezuu ɛzɩ Ɛsɔ liu wɛʋ yɔ. Pɩtɛkɛ mbʋ, ɛyʋ ɛɛpɩzɩɣ ɛna Kɩpaɣlʋ. 15 Ɩcɔnɩ ɖama yɔɔ camɩyɛ nɛ mɩ-taa nɔɔyʋ ɛtaakɔɔ ɛha lootiye nɖɩ Ɛsɔ labɩ-mɩ yɔ siɣye. Mɩ-taa nɔɔyʋ ɛtaawɛɛ ɛzɩ tɩʋ ñaŋ ñɩŋgʋ ŋgʋ kɩwɛɛ nɛ kʋ-sɔtʋ ɖɛɣ ɛyaa sakɩyɛ nɛ tɩwɛɛkɩɣ-wɛ yɔ. 16 Mɩ-taa nɔɔyʋ ɛtaala hayitu yaa ɛtaakpaɣ Ɛsɔ ñɩm se pɩtɛkɛ pʋyʋ ɛzɩ Ezaayuu yɔ. Tɔm kʋɖʋm tɔɔnaɣ maɣmaɣ yɔɔ ɛɛpɛdɩ ɛ-sɔsɔtʋ. 17 Ɩtɛm naʋ se pʋwayɩ lɛ, ɛɛñɩnaa ɖɔɖɔ se ɛ-caa ɛwazɩ ɛ-yɔɔ nɛ ɛlɛ ɖɔɔnɩ-ɩ. Ŋgʋ, ɛñɩnaɣnɩ ɛzɩtɛɣlɩm kpem se ɛlɛɣzɩ mbʋ ɛlaba yɔ. Ɛlɛ, pɩtaha-ɩ waɖɛ.
18 Ɩtɔñɔtɩnɩ Ɛsɔ ɛzɩ *Izrɛɛlɩ ñɩma yɔ. Paba kɔñɔtɩnɩ kedeŋa yɔɔ cɩnɛ pʋʋ nakʋyʋ: ŋgʋ lɛ Sinayii Pʋʋ. Alɩwaatʋ ndʋ lɛ, miŋ sɔsɔŋ nɩɩyɩ mʋwaɣ kʋ-yɔɔ nɛ cɩkpɛndʋʋ yu kpemm nɛ heɣlim sɔsɔm nabʋyʋ makɩ. 19 Panɩɣaɣ ɛgandɩyɛ naɖɩyɛ nɛ nɔɔ nakɛyɛ pa-taŋ. Mba paanɩ nɔɔ ŋga yɔ, pɔtɔm se pataatasɩ-wɛ natʋyʋ heyuu nɛ pɩtasɩnɩ ndʋ panɩwa yɔ, 20 mbʋ pʋyɔɔ yɔ, tɩkɩlɩ-wɛ. Ndʋ lɛ se: “Paa kpɩnɛ maɣmaɣ etukunini pʋʋ yɔ, ɩkʋ-ɖɩ nɛ pɛɛ.” 21 Mbʋ pɩlabɩ peeye yɔ, pɩɩwɛ sɔɔndʋ siŋŋ. Pʋ-yɔɔ *Mooyiizi tɔm se: “Sɔɔndʋ kɩlɩ-m kpem nɛ menseliɣ.”
22 Ɛlɛ, mɩ mɩñɔtɩnɩ Siiyɔɔ Pʋʋ nɛ Ɛsɔ wezuu tʋ tɛtʋ: ndʋ lɛ ɛsɔdaa Yeruusalɛm, Ɛsɔ tiyiyaa ɛgbaŋ ɛgbaŋ wɛ tɩ-taa. 23 Iwobi Ɛsɔ kajalaɣ piya nzɩ pama sɩ-hɩla ɛsɔdaa nɛ sikpeɣli ɖama nɛ sɩtɔkɩ kazanɖʋ yɔ sɩ-ɛgbɛyɛ taa. Iwobi Ɛsɔ cɔlɔ ɖɔɖɔ, ɛnʋ hʋʋnɩnɩ ɛyaa tɩŋa payɩ: toovenim tɩnaa mba pasɩba nɛ ɛtɛzɩ-wɛ pɩsʋʋ mba pamʋnaa yɔ. 24 Iwobi Yesu nɛ ɛ-calɩm mbʋ pɩkpɛdaa nɛ pɩkɩlɩ wazaɣ Aabɛɛlɩ ñɩmbʋ yɔ pɔ-cɔlɔ. Ɛnʋ lɛ ceyiyu *nɔɔ haʋ kɩfam mbʋ pʋwɛ Ɛsɔ nɛ ɛyaa pɛ-hɛkʋ taa yɔ pɩ-taa.
25 Ye mbʋ, ɩɖɔkɩ mɩ-tɩ! Ɩtaakizi se iiwelesiɣni Ɛsɔ weyi ɛyɔɔdʋʋnɩ-mɩ yɔ. Mbʋ pʋyɔɔ yɔ, *Izrɛɛlɩ ñɩma kizaa se paawelesiɣni weyi eheyaɣ-wɛ kedeŋa yɔɔ cɩnɛ mbʋ ɛwɩlɩ-ɩ yɔ nɛ patatʋlɩ nɩŋgbaŋʋʋ hɔm taa. Pʋ-yɔɔ lɛ, ye ɖa ɖahaɣ siɣye weyi ɛyɔɔdʋʋnɩ-ɖʋ nɛ ɛsɔdaa yɔ yɔ, ɖɩɩpɩzɩɣ ɖɩlɩɩ pɩ-taa ɖɔɖɔ. 26 Ɛɛyɔɔdɩnɩ-wɛ nɛ tɛtʋ ñamsɩ, ɛlɛ, lɛɛlɛɛyɔ eheyi-ɖʋ se: “Mɔnkɔŋ tasʋʋ tɛtʋ ñamsʋʋ. Ɛlɛ, pɩɩsɩɣnɩ ti-ɖeke, mañamsɩɣ ɖɔɖɔ ɛsɔtɔnʋʋ.” 27 Tɔm pee anɛ, atasɩɣ wɩlʋʋ se mbʋ ɛlaba yɔ, pɩñamsɩɣ-pʋ nɛ pʋmʋʋ nɛ piyele mbʋ pɩfɛyɩ ñamsʋʋ yɔ pʋwɛɛ.